काठमाडौं- नेपाल दूरसञ्चार प्राधिकरण (एनटीए) ले फिफा विश्वकप फुटबल २०२६ का खेलहरू अनधिकृत रूपमा प्रसारण तथा स्ट्रिमिङ हुन नदिन देशभरका मोबाइल तथा इन्टरनेट सेवा प्रदायकहरूलाई आवश्यक व्यवस्था मिलाउन निर्देशन दिएको छ। केही पाइरेटेड (Pirated) तथा अनधिकृत वेबसाइट र मोबाइल एपहरूबाट विश्वकपका खेलहरू नेपालभित्र निःशुल्क स्ट्रिमिङ गर्ने तयारी भइरहेको सूचनापछि यस्तो कदम चालिएको प्राधिकरणले जनाएकाे हो।
प्राधिकरणको अनुमतिपत्र तथा अनुगमन शाखाबाट जारी पत्रअनुसार, नेपालभित्र विश्वकप फुटबल २०२६ को विशेष तथा आधिकारिक प्रसारण अधिकार हिमालय टेलिभिजन नेटवर्क अन्तर्गतको 'हिमालय स्पोर्ट्स' र 'डिशहोम डिजिटल प्रालि. अन्तर्गतको DGO' को संयुक्त उपक्रम 'एचटिभि–डिजिओ ब्रोडकास्टिङ कन्सोर्टियम जेभी' ले प्राप्त गरेको जानकारी सञ्चार तथा सूचना प्रविधि मन्त्रालयमार्फत प्राप्त भएको जनाएको छ।
एनटीएले सेवा प्रदायकहरूलाई ती वेबसाइट र एपमार्फत विश्वकपका खेलहरू अनधिकृत रूपमा स्ट्रिमिङ हुन नदिने व्यवस्था मिलाई त्यसको जानकारी प्राधिकरणलाई उपलब्ध गराउन अनुरोध गरेको छ। प्राधिकरणले अनधिकृत प्रसारणमा संलग्न रहेको आशंकामा ३५ वटा वेबसाइट तथा एपहरूको सूची समेत सार्वजनिक गरेको छ।
प्राधिकरणलेबौद्धिक सम्पत्ति अधिकार तथा आधिकारिक प्रसारण अधिकारको संरक्षणका लागि आवश्यक निगरानी र नियन्त्रणलाई थप प्रभावकारी बनाउने जनाएको छ।यस कदमसँगै नेपालमा विश्वकप २०२६ का खेलहरू हेर्न चाहने दर्शकहरूले आधिकारिक प्रसारण प्लेटफर्ममार्फत मात्र खेलहरूको प्रत्यक्ष प्रसारण हेर्नुपर्ने अवस्था रहनेछ।
प्राधिकरणले ३५वटा संख्यामा रहेका ती वेबसाइट र एपहरुकाे नामवली प्रकाशन गरेकाे छ । सूचीमा Kick.com, Cricfy TV सम्बन्धी विभिन्न डोमेन, Crichd.com, Webcric.eu, StreamEast, Ronaldo7.net, Sportzfy समूहका वेबसाइट तथा अन्य स्ट्रिमिङ प्लेटफर्महरू समावेश छन्।
