चौतारा- बागमती प्रदेशका स्थानीय तहहरूमा सरकारी कामकाजमा तामाङ र नेपाल भाषाको प्रयोगलाई प्रभावकारी रूपमा कार्यान्वयन गर्ने उद्देश्यले आयोजित जनप्रतिनिधिहरूसँगको अन्तरक्रिया कार्यक्रम सिन्धुपाल्चोकको चौतारा साँगाचोकगढीस्थित न्यु अरनिको रिसोर्टमा सम्पन्न भएको छ।
नेपाल तामाङ घेदुङको आयोजनामा तथा नेवा देयः दबू र बागमती प्रदेश सरकारको संस्कृति तथा पर्यटन मन्त्रालयको सहकार्यमा सम्पन्न कार्यक्रममा स्थानीय तहका जनप्रतिनिधि, भाषा अभियन्ता, विभिन्न सामाजिक तथा सांस्कृतिक संस्थाका प्रतिनिधिहरूको उल्लेखनीय सहभागिता रहेको थियो।
कार्यक्रममा नेपाल तामाङ घेदुङका संघीय उपमहासचिव तथा भाषा संयोजक बिलाम मोक्तानले सहजीकरण गर्दै मातृभाषाको संरक्षण, प्रवर्द्धन र सरकारी कामकाजमा प्रयोगको संवैधानिक तथा कानुनी आधारबारे विस्तृत प्रस्तुति दिएका थिए।उनले नेपालको संविधानले मातृभाषाको संरक्षण र प्रयोगको अधिकार सुनिश्चित गरेको उल्लेख गर्दै स्थानीय सरकारहरूलाई भाषामैत्री नीति तथा कार्यक्रम निर्माण गर्न आग्रह गरेका छन् ।
कार्यक्रमका प्रमुख वक्ता नेपाल तामाङ घेदुङका पूर्वअध्यक्ष तथा प्रमुख सल्लाहकार मोहन गोले तामाङले भाषा केवल सञ्चारको माध्यम मात्र नभई समुदायको पहिचान, इतिहास र सभ्यताको आधार भएको उल्लेख गर्दै सरकारी कामकाजमा मातृभाषाको प्रयोगलाई व्यवहारमा उतार्न सबै तहका सरकारहरू प्रतिबद्ध हुनुपर्ने बताए।त्यसैगरी भाषा आयोगका पूर्व कायममुकायम सचिव तथा शिक्षा तथा खेलकुद मन्त्रालयका उपसचिव डा. लोकबहादुर लोप्चानले मातृभाषामा सेवा प्रवाहले नागरिकको राज्यप्रतिको पहुँच सहज र प्रभावकारी बन्ने धारणा राखे। उनले स्थानीय तहमा भाषिक अधिकारको कार्यान्वयनका लागि नीति, जनशक्ति र आवश्यक स्रोतसाधनको व्यवस्थापन अपरिहार्य रहेको बताएका छन् ।
नेवा देयः दबूका उपाध्यक्ष उमेश स्थापित ले नेपाल भाषाको संरक्षण र सरकारी प्रयोगको अभियानमा तामाङ समुदायसँगको सहकार्यलाई थप सुदृढ बनाउँदै लैजानुपर्नेमा जोड दिए। उनले भाषिक विविधता नेपालको साझा सम्पत्ति भएकाले यसको संरक्षणमा सबै समुदायको संयुक्त प्रयास आवश्यक रहेको बताए। कार्यक्रममा नेपाल तामाङ घेदुङका संघीय सदस्य फुर्वा ग्याल्बो मोक्तान, नेपाल तामाङ घेदुङ सिन्धुपाल्चोकका अध्यक्ष प्रतापसिं तामाङ, नेवा देयः दबूका प्रतिनिधिहरू, भाषा अभियन्ताहरू तथा विभिन्न पालिकाका जनप्रतिनिधिहरूले आ-आफ्ना धारणा व्यक्त गरेका थिए।
अन्तरक्रियाका क्रममा स्थानीय तहका सूचना, सिफारिस, पत्राचार, अभिलेख व्यवस्थापन, सार्वजनिक सूचना प्रणाली तथा सेवा प्रवाहमा तामाङ र नेपाल भाषाको प्रयोग विस्तार गर्ने विषयमा गहन छलफल भएको थियो। सहभागीहरूले मातृभाषाको प्रयोगले सेवाग्राही र सरकारबीचको दूरी घटाउनुका साथै समावेशी शासन प्रणालीलाई थप मजबुत बनाउने निष्कर्ष व्यक्त गरेका थिए। कार्यक्रमका सहभागी जनप्रतिनिधिहरूले स्थानीय सरकारको नीति, योजना तथा कार्यक्रमहरूमा मातृभाषाको प्रयोगलाई प्राथमिकता दिने, सार्वजनिक सूचनाहरू स्थानीय भाषामा समेत प्रकाशन गर्ने तथा भाषिक अधिकार कार्यान्वयनका लागि आवश्यक पहल गर्ने प्रतिबद्धता जनाएका थिए।
नेपाल तामाङ घेदुङले मातृभाषाको संरक्षण, संवर्द्धन तथा सरकारी कामकाजमा तामाङ भाषाको प्रयोग विस्तारका लागि देशव्यापी अभियान सञ्चालन गर्दै आएको छ। चौतारामा सम्पन्न यस अन्तरक्रिया कार्यक्रमले तामाङ र नेपाल भाषाको सरकारी प्रयोगलाई संस्थागत र प्रभावकारी बनाउन महत्वपूर्ण योगदान पुर्याउने विश्वास सहभागीहरूले व्यक्त गरेका छन्।
