- बहुमत सचिवालय सदस्य ओलीले नेतृत्वबाट मार्गप्रशस्त गर्नुपर्ने पक्षमा
- उपाध्यक्षहरू विष्णु पौडेल, पृथ्वीसुब्बा गुरुङ, गोकर्ण विष्ट र रघुजी पन्त, महासचिव शंकर पोखरेल र उपमहासचिव योगेश भट्टराईले मागे ओलीको राजीनामा
- उपाध्यक्ष रामबहादुर थापा, उपमहासचिव लेखराज भट्ट र सचिवद्वय महेश बस्नेत र पद्मा अर्याल ओलीको पक्षमा
- सचिवहरू शेरधन राई, राजन भट्टराई, खगराज अधिकारी र भानुभक्त ढकालले धारणा राख्न बाँकी
- पद त्याग नगर्ने ओलीको अडान
काठमाडौं- नेकपा एमालेका अध्यक्ष केपी शर्मा ओली जेन-जी विद्रोहले प्रधानमन्त्रीबाट अपदस्त भएको नौ महिनामै पार्टी नेतृत्वबाट बहिगर्मनको दबाबमा परेका छन् । विगतमा आफूनिकट मानिएका सचिवालय सदस्यहरू नै अध्यक्ष ओलीको अनिवार्य बहिगर्मनको पक्षमा उभिएका छन् । झापा विद्रोहको बेला विद्यार्थी मोर्चामा आबद्ध हुँदै राजनीति थालेका ओलीको राजनीतिक जीवनको दुःखान्तपूर्ण अन्त्य हुने सम्भावना बढेर गएको छ ।
उनको नेतृत्वलाई लिएर शुक्रबार र शनिबारको सचिवालय बैठकमा गम्भीर बहस भयो । हालसम्म बोलेकामध्ये बहुमत पार्टी सचिवालय सदस्यले ओलीको नेतृत्वमा पार्टी अघि नबढ्ने स्पष्ट धारणा राखेका छन् । पार्टी पुनर्गठन, पुस्तान्तरण र नयाँ नेतृत्वको आवश्यकता औंल्याउँदै उनीहरूले ओलीले नेतृत्वबाट मार्गप्रशस्त गर्नुपर्ने बताएका छन् ।
उपाध्यक्षहरू विष्णु पौडेल, गोकर्ण विष्ट, पृथ्वीसुब्बा गुरुङ, रघुजी पन्त, महासचिव शंकर पोखरेल र उपमहासचिव योगेश भट्टराईले नेतृत्वबाट ओलीको विस्थापन अनिवार्य हुनुपर्ने मत राखेका छन् । यसले गर्दा ओलीलाई नेतृत्वमा रहिरहन गम्भीर संकट निम्तिएको छ । शनिबारको सचिवालय बैठकमा उपमहासचिव योगेश भट्टराईले प्रस्ट शब्दमा भने, ‘अब तपाईंबाट पार्टी चल्दैन । राजीनामा दिनुस् ।’
भट्टराईले जसरी राजीनामा शब्द प्रयोग नगरे पनि महासचिव शंकर पोखरेलले पनि नेतृत्वमा ओलीको विकल्प खोजेका छन् । ‘यसरी पार्टी जान सक्दैन । समीक्षा जरुरी छ । यही स्थितिमा अघि जान सकिँदैन । परिस्थिति सजिलो छैन,’ पोखरेलको भनाइ उद्धृत गर्दै एक नेताले भने ।
उपाध्यक्ष पौडेलले त ओलीलाई विधान संशोधन गरेर तेस्रो कार्यकालका लागि अध्यक्ष बनाउनु नै गम्भीर गल्ती भएको भन्दै ओली नेतृत्वमा रहिरहनु औचित्यपूर्ण नभएको बताएका छन् । ‘७० वर्षे उमेर हद र दुई कार्यकाल अध्यक्षको प्रावधान हटाउनु नै गल्ती भयो र २३ गते (२०८२ को भदौ) बेलुकी राजीनामा दिएको भए आज राजनीति यहाँ आइपुग्थेन,’ उनले भनेका छन् ।
ओलीले राजीनामा दिनुपर्ने शब्द उच्चारण नगरे पनि पद त्याग गरेर एमालेलाई जोगाउनुपर्ने अर्का उपाध्यक्ष विष्टले बताएका थिए । ‘प¥यो भने मेरो ठाउँ त्याग्न तयार छु । हामी सबैले पद त्याग्न पनि तयार हुनुपर्छ,’ उनको भनाइ थियो । त्यसैगरी अर्का उपाध्यक्ष गुरुङले एमाले ओलीको प्राइभेट कम्पनी नभएको भन्दै उनले पद त्याग्नुपर्ने बताएका छन् । भनिन्छ, सचिवालय बैठकको पहिलो दिन शुक्रबार ओली र गुरुङबीच चर्काचर्की नै परेको थियो । अर्का उपाध्यक्ष रघुजी पन्त पनि ओलीको विपक्षमा उभिए । उनले पनि ओलीको नेतृत्वमा एमालेलाई अगाडि लान नसकिने बताएका थिए ।
यसरी नेतृत्वमा ओलीको विकल्प खोजेका नेताहरूले पार्टीले गत प्रतिनिधिसभा निर्वाचनमा प्राप्त गरेको परिणाम, जनाधारमा आएको गिरावट, आन्तरिक असन्तुष्टि र संगठनात्मक कमजोरीको जिम्मेवार पनि ओलीलाई नै ठह¥याएका छन् । उनीहरूले कम्युनिस्ट आन्दोलनलाई नयाँ ढंगले अघि बढाउन पनि ओलीले नेतृत्वबाट मार्गप्रशस्त गर्नुपर्ने बताइरहेका छन् ।
सचिवालय बाहिरबाट पनि ओलीमाथि नेतृत्व त्याग्न उत्तिकै दबाब बढेको छ । शनिबार नै सामाजिक सञ्जाल फेसबुकमा स्टाटस लेख्दै पूर्वउपाध्यक्ष अष्टलक्ष्मी शाक्यले सचिवालय बैठकबाटै पार्टी नेतृत्वबाट बिदा लिन ओलीलाई सुझाइन् । उनले भनिन्, ‘कमरेडले यही बैठकबाट स-सम्मान अध्यक्ष पदबाट बिदा लिनु राम्रो हुन्छ ।’
ओलीको दम्भ, घमण्ड र गुटगत सोचका कारण पार्टी कमजोर स्थितिमा पुगेको भन्दै नेतृत्व पुस्तान्तरण गर्न अनिवार्य भएको उनले बताएकी छन् । अध्यक्ष ओलीले तीन कार्यकाल नेतृत्व गरिसकेको स्मरण गराउँदै उनले अब युवा पुस्तालाई विश्वास गरेर नेतृत्व हस्तान्तरण गर्नुपर्ने बताएकी छन् । ‘सास रहुञ्जेल एमाले पार्टीको अध्यक्ष भइराख्ने तपाईंको सोच गलत,’ उनले भनिन् ।
सचिवालयका केही सदस्यले भने ओलीलाई नेतृत्वबाट अलग गर्नुपर्ने अभिव्यक्तिको प्रतिवाद गरेका छन् । उपाध्यक्ष रामबहादुर थापा, उपमहासचिव लेखराज भट्ट, सचिव महेश बस्नेत र पद्मा अर्याल प्रतिवादमा उत्रिएका हुन् । उपाध्यक्ष थापाले पार्टी संकटमा रहेको र यो बेला नेतृत्वको रक्षा गर्नु कर्तव्य भएको धारणा राखेका छन् । ‘पार्टी संकटमा छ । यस्तो बेला हामीले नेतृत्वको विकल्प खोज्ने होइन, रक्षा गर्ने हो,’ थापाले शुक्रबार भनेका थिए ।
शनिबार सचिव बस्नेतले यही आशयमा ओलीको नेतृत्वमा विकल्प खोज्न नहुने बताए । उनले भने, ‘संकटको बेलामा नेतृत्व जोगाउनुपर्छ । संरक्षण गर्नुपर्छ ।’
उपमहासचिव भट्टले ओलीको प्रतिरक्षा गर्दै यदि राजीनामा दिनु परे ६० वर्षमाथिका सबै नेताले पदबाट राजीनामा दिनुपर्ने बताए । पार्टी रुपान्तरणका लागि पुनर्गठन गर्नुपर्ने भन्दै ओलीको विकल्प खोजेका नेताहरूलाई उनले भने, ‘पार्टी रूपान्तरण नै गर्ने भए ६० वर्षमाथिका सबै नेताहरू पदमा नबसौं । त्यसो हुँदा पार्टी युवाको हातमा पुग्छ ।’
सचिवालय बैठकमा आज (आइतबार) सचिवहरू शेरधन राई, भानुभक्त ढकाल, राजन भट्टराई र खगराज अधिकारीले आफ्ना धारणा राख्ने छन् । हालसम्म धारणा राखेकामध्ये बहुसंख्यक सचिवालय सदस्य ओलीको विस्थापनको पक्षमा छन् । एमाले सचिवालय बैठकमा उठेको नेतृत्व बहस अब स्थायी कमिटी र केन्द्रीय कमिटीसम्म पुग्ने भएको छ ।
पद नछाड्ने ओली अडान
नेकपा एमालेका अध्यक्ष केपी शर्मा ओलीले पार्टी नेतृत्वबाट नहट्ने अडान लिएका छन् । शुक्रबार र शनिबार भक्तपुरको गुण्डुस्थित ओलीनिवासमा बसेको सचिवालय बैठकमा राजीनामाको दबाब बढ्दै जाँदा उनले आफू राजीनामाको मनस्थितिमा नरहेको बताएका हुन् ।
शनिबार बैठकमा ओलीले राखेको भनाइ उद्धृत गर्दै एक नेताले भने, ‘मलाई यसरी सम्झाएर सक्नुहुन्न । म सम्झिन्नँ । म यसरी छाड्दिनँ ।’ शुक्रबार भने ओली पदबाट मार्गप्रशस्त गर्नु भन्ने पाँचमध्ये चार उपाध्यक्ष विष्णु पौडेल, रघुजी पन्त, गोकर्ण विष्ट र पृथ्वीसुब्बा गुरुङमाथि थर्काउने गरी प्रस्तुत भएका थिए ।
