सोमबार संघीय संसद्को संयुक्त बैठकमा राष्ट्रपति रामचन्द्र पौडेलले सरकारको नीति तथा कार्यक्रम सार्वजनिक गर्दै थिए । राष्ट्रपति रहुञ्जेल सदनमा प्रधानमन्त्रीदेखि सबै सांसदले शिष्टाचार पालना गर्नुपर्छ । मर्यादा र शिष्टाचार पालना गर्ने स्थानको रुपमा संसद्लाई लिइन्छ । अझ सत्तापक्षका सांसदले यो विषयमा विशेष ख्याल राख्नैपर्छ । तर राष्ट्रपतिले सदनमा नीति तथा कार्यक्रम प्रस्तुत गर्दै गर्दा प्रधानमन्त्री वालेन्द्र शाह भने बीचैमा उठेर बेपत्ता भए । नेपालको संसदीय इतिहासमा प्रधानमन्त्रीले यस खालको अशोभनीय कार्य गरेको पहिलोपटक हो ।
के यो सरकारका प्रधानमन्त्री जनता, संसद् र राष्ट्रपतिभन्दा माथिको हो ? प्रधानमन्त्रीको यस्तो अशोभनीय र अभद्र व्यवहारले सरकारको शिष्टतामाथि प्रश्न उठेको छ । चौतर्फी प्रश्न उठेपछि राष्ट्रपतिका राजनीतिक सल्लाहकार असिम शाहले बचाउ गर्ने कोसिस गरे । असिमले प्रधानमन्त्री अस्वस्थ भएकोले विश्राम गर्न पुगेको र पछि सदनको बैठकमा फर्केको दाबी गरे । जबकि प्रधानमन्त्री शाह निस्केपछि बैठकमा फर्केका थिएनन् । आफूले फेसबुकमा राखेको बचाऊ सन्देश असिमले केहीबेरमै डिलिट गरे ।
‘मलाई बोल्न दे सरकार !’ गीतबाटै चर्चामा छाएका र्यापर बालेन उर्फ वालेन्द्र शाह विसंगतिमाथि प्रश्न गरेकै कारण अहिले जनताको रोजी प्रधानमन्त्री बनेका छन् । वालेन्द्रलाई प्रधानमन्त्री बनाउनु समयको माग पनि हो । तर उनै वालेन्द्रलाई अहिले प्रश्न गर्न जोकोही डराउँछन् । अरु त अरु दुईतिहाइ नजिक मत पाएको राष्ट्रिय स्वतन्त्र पार्टी (रास्वपा)का अध्यक्ष रवि लामिछाने वालेन्द्रसँग प्रश्न गर्न सक्दैनन् । संसद्मा कसरी प्रस्तुत हुने भन्ने पार्टीको सहजीकरण कार्यक्रममा वालेन्द्र जाँदैनन् । सरकार पूर्णतया वालेन्द्रको सचिवालयको नियन्त्रणमा छ । रास्वपाका १८० सांसद वालेन्द्रका अगाडि ‘ज्यू हजुर’ गरी टाढैबाट नमस्कार गर्नेबाहेक अरु बोल्न सक्दैनन् ।
एकप्रकारले रास्वपामा राणाशासनको झल्को सुरु भएको छ । यसबारे बोल्न नसक्दा रास्वपामा पनि उकुसमुकुस सुरु भएको छ । यस्तो उकुसमुकुस धेरै थुनेर राख्न सकिँदैन । यस्तो सम्बन्ध धेरै टिक्दा पनि टिक्दैन र यस्तो अशोभनीय व्यवहार गर्ने लामो समय टिक्दा पनि टिक्दैन । रास्वपामा एकप्रकारको प्रशंसक पनि छन् जो वालेन्द्रलाई ‘राजाको नयाँ कपडा’ कथा शैलीमै उच्च प्रशंसा गरिरहेका छन् । शक्तिको उन्मादमा विगतका दुईतिहाइ निकट सरकार सत्ताबाट सडकमा पुगेको उदाहरण वालेन्द्र र तिनका प्रशंसकले सम्झनुपर्छ । बेलैमा यस्ता अशोभनीय व्यवहारको प्रयाश्चित गरेकै राम्रो ।
