काठमाडौं - त्रिभुवन विश्वविद्यालयअन्तर्गत “सार्वजनिक नीति, सुशासन तथा भ्रष्टाचार निवारण” विषयका विद्यार्थी सस्मित पोखरेलले आफ्नो सम्पत्ति विवरण सार्वजनिक गर्दै पारदर्शितालाई भ्रष्टाचार नियन्त्रणको मुख्य माध्यम भएको बताएका छन्।सामाजिक सञ्जालमार्फत सार्वजनिक गरिएको वक्तव्यमा पोखरेलले व्यक्तिगत मात्र नभई बुवा, आमा तथा मामाघर पक्षसम्मका सम्पत्तिहरू खुलाएर प्रस्तुत गरेको उल्लेख गरेका हुन्।
उनले आफ्नो बुवाको सवारीसाधनसमेत विवरणमा समावेश गरेको जनाउँदै प्राविधिक रूपमा व्यक्तिगत सम्पत्ति मात्र देखाउँदा पर्याप्त हुने भए पनि पूर्ण पारदर्शिताका लागि विस्तृत विवरण सार्वजनिक गरिएको बताएका छन्। उनले आफ्नो परिवारको सम्पत्ति इमान्दार मेहनतबाट आर्जित भएको दाबी गर्दै कुनै प्रकारको आशंका नरहेको स्पष्ट पारेका छन्। पोखरेलका अनुसार उनका बुवा नेपाल राष्ट्र बैंकमा करिब ३० वर्ष सेवा गरी कार्यकारी निर्देशक पदबाट अवकाश प्राप्त गरेका हुन् भने अन्तर्राष्ट्रिय मुद्रा कोष (आईएमएफ), वाशिङ्टन डी.सी. मा समेत काम गरेकाे खुलाए ।
काठमाडौंमा रहेको जग्गाको मूल्यबारे उनले विगतमा आना अनुसार निकै कम मूल्यमा खरिद गरिएको र हाल बजार मूल्य ५० गुणाभन्दा बढीले वृद्धि भएको बताएका छन्। पारदर्शितालाई ध्यानमा राख्दै उनले खरिद मूल्य नभई हालको बजार मूल्य नै उल्लेख गरेको जनाएका छन्।
पोखरेलले आफू ‘प्रिभिलेज्ड’ पृष्ठभूमिबाट आएको स्वीकार गर्दै व्यक्तिगत खर्च व्यवस्थापनमा आत्मनिर्भर रहेको दाबी गरेका छन्। स्नातक अध्ययनकै क्रममा पार्ट टाइम र पछि फुल टाइम काम गर्दै आफ्नै आम्दानीबाट खर्च धान्दै आएको उनले बताएका छन्। साथै, विवरणमा उल्लेख गरिएको ऋणसमेत आफ्नै आम्दानीका आधारमा गाडी खरिदका लागि लिएको उनले स्पष्ट पारेका छन्।
PAN नम्बरको विषयमा भने व्यक्तिगत सुरक्षाका कारण सार्वजनिक विवरणमा समावेश नगरेको भए पनि आफूले वैध PAN नम्बर लिएको उनले उल्लेख गरेका छन्। पोखरेलले पारदर्शिता केवल शब्दमा नभई व्यवहारमा देखिनुपर्नेमा जोड दिँदै आगामी दिनमा पनि सोही अभ्यासलाई निरन्तरता दिने प्रतिबद्धता व्यक्त गरेका छन्।
