मोरङ -नेपाल तामाङ घेदुङ प्रदेश नं. १ को नयाँ नेतृत्व सर्वसम्मत चयन गरी दोस्रो अधिवेशन सम्पन्न भएकाे छ । नेपाल तामाङ घेदुङ प्रदेश नं. १ को दोस्रो ऐतिहासिक अधिवेशन पथरी शनिश्चरे–७, लामाटोलस्थित तामाङ बौद्ध सांस्कृतिक भवनमा भव्य रूपमा सम्पन्न भएको हाे ।
प्रदेश अध्यक्ष रेखबहादुर घिसिङको अध्यक्षतामा संघीय अध्यक्ष मोहन गोले तामाङको प्रमुख आतिथ्यमा उक्त अधिवेशन सम्पन्न भएको थियो। कार्यक्रममा संघीय सहअध्यक्ष कुमार घिसिङ, वरिष्ठ उपाध्यक्ष रामकृष्ण ल्बोन तामाङ, कोषाध्यक्ष रुप योन्जान, प्रहरी सेना कर्मचारी समन्वय विभाग प्रमुख मित्रसेन तामाङ, संघीय सदस्य बिलाम मुक्तान, दिलबहादुर पख्रिन, शान्ता मोक्तान, धनबहादुर तामाङ युवा घेदुङ संघीय उपाध्यक्ष मनोज योन्जान, सशिकार लामा लगायतको विशेष उपस्थिति रहेको थियो।
साथै प्रदेशका १४ जिल्लाबाट आएका प्रतिनिधि तथा विभिन्न संघसंस्थाका प्रतिनिधिहरूको उल्लेखनीय सहभागिता रहेको थियो। उद्घाटन सत्रलाई सम्बोधन गर्दै प्रमुख अतिथि मोहन गोले तामाङले तामाङ समुदाय नेपालको अत्यन्तै पुरानो समुदाय भए पनि राज्यको नीतिका कारण पछाडि परेको उल्लेख गरे। उनले तामाङ समुदायको शैक्षिक अवस्था अझै कमजोर रहेको र सुधारका लागि सामूहिक प्रयास आवश्यक रहेको बताए।
संघीय सहअध्यक्ष कुमार घिसिङले नेपाल तामाङ घेदुङ २००८ सालदेखि सुरु भई २०१३ सालदेखि संस्थागत रूपमा अगाडि बढेको उल्लेख गर्दै देश तथा विदेशमा संगठन विस्तार हुँदै आएको बताए। उनले तामाङहरूको संस्कार, संस्कृति जोगाउन अग्रजहरूको योगदान महत्त्वपूर्ण रहेको धारणा व्यक्त गरे।
वरिष्ठ उपाध्यक्ष रामकृष्ण ल्बोन तामाङले समुदायलाई सचेत र एकताबद्ध हुन आग्रह गर्दै राजनीतिक पहुँच विस्तार गर्न आवश्यक रहेको बताए। “पहिले जाति र त्यसपछि पार्टी” भन्ने भावनाले मात्र एकता सम्भव हुने उनको भनाइ थियो।त्यसैगरी मित्रसेन तामाङले लामो समयदेखि प्रशिक्षण र अभियान सञ्चालन हुँदा पनि अपेक्षित एकता नआएको उल्लेख गर्दै अब एकताबद्ध भएर राजनीतिक रूपमा सशक्त बन्नुपर्नेमा जोड दिए।
संघीय कोषाध्यक्ष रुप बहादुर योन्जानले नवनिर्वाचित नेतृत्वलाई बधाई दिँदै सफल कार्यकालको शुभकामना व्यक्त गरेका छन् ।अधिवेशनको बन्दसत्रबाट निर्वाचन प्रक्रिया सम्पन्न गर्दै नयाँ नेतृत्व सर्वसम्मत रूपमा चयन गरिएको छ।
अधिवेशनबाट सर्वसम्मत चयनमा अध्यक्षमा जगत तामाङ,दुई उपाध्यक्षमा एकराज तामाङ र रुपनारायण तामाङ गोले, महिला उपाध्यक्षम बिनिता थिङ तामाङ,मुख्य सचिवमा फणीन्द्र तामाङ रहेका छन् ।सदस्यहरूमा हस्ताबहादुर तामाङ, खड्का कुमार तामाङ, धनबहादुर तामाङ, टेकबहादुर तामाङ, इन्द्रकुमार योन्जान, जयबहादुर तामाङ, जितेन्द्र तामाङ निर्वाचित भएका छन् ।
अधिवेशनले नवनिर्वाचित पदाधिकारीहरूलाई बधाई तथा सफल कार्यकालको शुभकामना व्यक्त गरेको छ। साथै तामाङ समुदायको पहिचान, अधिकार संरक्षण तथा समग्र विकासका लागि आगामी दिनमा अझ सशक्त रूपमा अघि बढ्ने प्रतिबद्धता व्यक्त गर्दै कार्यक्रम सम्पन्न भएको जनाइएको छ।
