काठमाडाैं - निर्वाचन आयोगले निर्वाचनको अन्तिम प्रतिवेदन राष्ट्रपति कार्यालयलाई बुझाइसकेसँगै मुलुकमा नयाँ सरकार गठनको संवैधानिक प्रक्रियाले तीव्रता पाएको छ। यस पटकको निर्वाचनमा राष्ट्रिय स्वतन्त्र पार्टी (रास्वपा) ले झन्डै दुई-तिहाइ बहुमत प्राप्त गरेपछि आगामी १३ गते बालेनको नेतृत्वमा नयाँ सरकार बन्ने बलियो सम्भावना देखिएको छ। रास्वपाको यो ऐतिहासिक जित र नयाँ सरकार गठनको तयारी भइरहँदा बजारमा भने ५०० र १००० दरका नेपाली नोटहरू बन्द हुन लागेको भन्ने हल्ला व्यापक रूपमा फैलिएको छ।
विशेषगरी आगामी बालेन नेतृत्वको सरकारले भ्रष्टाचार गरेर लुकाइएको पैसा राष्ट्रियकरण गर्नका लागि नोटबन्दीको कदम चाल्न लागेको भन्दै सामाजिक सञ्जाल र सार्वजनिक स्थलहरूमा विभिन्न अड्कलबाजीहरू भइरहेका छन्। बजारमा फैलिएको यस संवेदनशील हल्लाका सम्बन्धमा हामीले नेपाल राष्ट्र बैंकका सूचना अधिकारी गुरुप्रसाद पौडेलले प्रभाव संवाददातालाई यसमा कुनै सत्यता नरहेको बताएका छन् । पौडेलका अनुसार नोटबन्दी हुने कुरा निराधार रहेको छ । उनले भने ,'नोटबन्दी हुने कुरा पूर्णतः निराधार हुन् । यस्तो भ्रमको पछि नलाग्न सबैलाई आग्रह छ । '
यस्तो भ्रमको पछि नलाग्न उनले सर्वसाधारणलाई आग्रह गरेका छन् । उनले कुनै पनि आधिकारिक निर्णय नभई फैलाइएका यस्ता हल्लाले सर्वसाधारणमा अनावश्यक त्रास पैदा गर्ने उल्लेख गर्दै राष्ट्र बैंकको आधिकारिक सूचनालाई मात्र आधार मान्न र आधिकारिक माध्यमबाट आउने जानकारी हेर्ने अनुरोध गरेका छन् ।
यसै विषयमा राष्ट्रिय स्वतन्त्र पार्टीका सह-प्रवक्ता रमेश प्रसाईले पनि नोटबन्दीको चर्चामा कुनै सत्यता नभएको र यो केवल एक 'प्रपोगाण्डा' मात्र भएको प्रभाव संवाददातालाई बताएका छन्। प्रसाईले नयाँ सरकार गठनको संघारमा जनतालाई भ्रमित पार्ने उद्देश्यले यस्ता कपोलकल्पित कुराहरू बाहिर ल्याइएको उल्लेख गर्दै यसमा विश्वास नगर्न आग्रह गरेका छन् । सरकारले सुशासन र आर्थिक सुधारका कामहरू गर्ने भए पनि बजारमा फैलाइएको जस्तो नोटबन्दीको कुनै योजना वा आधिकारिक तयारी नरहेको उनको भनाइ छ।
