- घटनाको थप अनुसन्धान गर्न सीआईबी टोली सुर्खेतमा
- १६ वर्षीय प्रेमीले बयानमा सहमतिमै करणी भएको तर अचानक अत्यधिक रक्तश्राप भएर इनिसा अचेत भएको दाबी
- पक्राउ परेकामध्ये तीन जनाको संलग्नता नभएको भनाइ
- इनिसाको शव छ दिनदेखि प्रदेश अस्पतालको शवगृहमा
काठमाडौं- १६ वर्षीया इनिसा विकको बलात्कारपछि भएको हत्या प्रकरणको थप अनुसन्धान गर्न नेपाल प्रहरीको केन्द्रीय अनुसन्धान ब्युरो (सीआईबी)को विशेषज्ञ टोली सुर्खेत पुगेको छ । शव परीक्षण प्रतिवेदनमा बलपूर्वक यौनसम्पर्कका कारण अत्यधिक रक्तस्राव भएर इनिसाको मृत्यु भएको औँल्याइएपछि सीआईबी टोलीले थप वैज्ञानिक अनुसन्धान गर्ने भएको हो ।
सीआईबीका प्रवक्ता तथा प्रहरी वरिष्ठ उपरीक्षक शिवकुमार श्रेष्ठले घटनाको जटिलता र संवेदनशीलता हेरेर अनुसन्धानलाई थप वैज्ञानिक ढंगले अघि बढाइएको बताए । २३ फागुनमा इनिसाको हत्या भएको हो । भेरी अस्पताल नेपालगञ्जको फरेन्सिक विभागका वरिष्ठ अधिकृत अर्विन शाक्यका अनुसार इनिसाको यौनांगको भित्री र बाहिरी भाग गम्भीर रूपमा च्यातिएको पाइएको छ ।
शाक्यले भने, ‘यौनांगमा गहिरो चोट लागेको छ । त्यसका कारण अत्यधिक रक्तस्राव भएको पाइयो । उनको मृत्युको कारण त्यही भएको देखियो ।’ शव परीक्षण प्रतिवेदनमा मृतकको ढाडमा घस्रिएको चोटसमेत देखिएको उल्लेख छ । यद्यपि सामूहिक बलात्कार भएको वा नभएकोबारे प्रतिवेदनले स्पष्ट निष्कर्ष दिएको छैन । इनिसा सुर्खेतको उषा बालवाटिका विद्यालयमा कक्षा-११ मा अध्ययनरत थिइन् । उनी यही २३ फागुन बिहान ६ बजे ट्युसन पढ्न भन्दै घरबाट निस्किएकी थिइन् ।
वीरेन्द्रनगर-१ मा बस्दै आएकी उनी लामो समयसम्म घर नफर्किएपछि आमा तिला विक चिन्तित बनेकी थिइन् । त्यसबीच करिब तीन घण्टापछि इनिसा जनजागरण सामुदायिक वन क्षेत्रमा अचेत अवस्थामा भेटिइन् । स्थानीय र प्रहरीले उद्धार गरी प्रदेश अस्पताल सुर्खेत पु¥याए तर चिकित्सकले उनलाई मृत घोषणा गरेका थिए । घटनाको अनुसन्धान जिल्ला प्रहरी कार्यालय सुर्खेतले पनि गरिरहेको छ । घटनामा संलग्न भएको आरोपमा प्रहरीले चार जना किशोरलाई पक्राउ गरेको छ । पक्राउ परेकामध्ये एक जना १६ वर्षीय किशोर इनिसाको प्रेमी भएको बताइएको छ ।
प्रहरीलाई दिएको बयानमा उनले इनिसासँग दुई वर्षदेखि प्रेम सम्बन्ध रहेको बताएका छन् । उनका अनुसार २३ फागुन बिहान ७ बजेतिर इनिसासँग सल्लाह गरेरै उनीहरू सहिद पार्क नजिकको जंगलतर्फ गएका थिए । ती किशोरको बयान उद्धृत गर्दै अनुसन्धानमा संलग्न एक प्रहरी अधिकृतले भने, ‘हामी दुई वर्षदेखि सम्बन्धमा थियौं । पहिले पनि शारीरिक सम्पर्क भएको थियो ।’ उनका अनुसार त्यहाँ पुगेपछि केहीबेर गफगाफ भएको र त्यसपछि दुवैको सहमतिमा शारीरिक सम्बन्ध भएको थियो ।
तर, त्यसक्रममा अचानक इनिसाको यौनांगबाट अत्यधिक रक्तस्राव हुन थालेको उनले बताएका छन् । त्यसपछि आफू आत्तिएको उनको भनाइ छ । लगत्तै आफ्ना साथीहरूलाई बोलाएको र तीन जना घटनास्थलमा आएको पनि बताएको अनुसन्धानमा संलग्न एक प्रहरी अधिकृतले बताए । ती किशोरहरूले नजिकैको गाउँमा गएर स्थानीयलाई घटनाबारे जानकारी गराएको र स्थानीयले बिहान ९ ः४५ मा प्रहरीलाई खबर गरेका थिए । प्रहरी घटनास्थलमा पुगेर उनलाई अस्पताल पु¥याउँदा बिहान १० बजिसकेको थियो ।
जिल्ला प्रहरी कार्यालय सुर्खेतका प्रवक्ता मोहनजंग बुढथापाका अनुसार प्रहरी घटनास्थलमा पुग्दा किशोरीको अवस्था अत्यन्त गम्भीर रहेको देखेको थियो । ‘हामी घटनास्थल पुग्दा इनिसाको शरीरमा कपडा थिएन । तल्लो भाग रगतले भिजेको थियो र उनी अचेत अवस्थामा थिइन्,’ उनले भने ।
घटनाको अनुसन्धान गरिरहेको प्रहरीले सीसीटीभी फुटेजको पनि विश्लेषण गरेको छ । फुटेज हेर्दा घटनाअघि इनिसा र उनका प्रेमी वीरेन्द्रनगर क्षेत्रमा सँगै हिँडिरहेको दृश्य देखिएको छ । उनीहरू जनजागरण सामुदायिक वनतर्फ हात समाएर हिँडिरहेको फुटेज प्रहरीले फेला पारेको जनाएको छ । घटनाको संवेदनशीलता र जटिलतालाई ध्यानमा राख्दै थप अनुसन्धानका लागि बिहीबार नै सीआईबीबाट प्रहरी निरीक्षकको टोली सुर्खेत पुगेको हो । टोलीले अनुसन्धान थालेको छ ।
सुर्खेतका प्रहरी प्रमुख (एसपी) सुधीरराज शाहीले घटनासँग सम्बन्धित डिजिटल प्रमाण, मोबाइल फोन र अन्य विद्युतीय सामग्री फरेन्सिक परीक्षणका लागि विधि विज्ञान प्रयोगशाला पठाएको बताए । उनका अनुसार नशालु पदार्थ प्रयोग भएको थियो कि थिएन भन्ने पत्ता लगाउन रगतको नमुना पनि पठाइएको छ । कर्णाली प्रदेश प्रहरी कार्यालयबाट पोलिग्राफ परीक्षण गर्ने टोली पनि सुर्खेत पुगेको एसपी शाहीले बताए ।
मृतकको शव भने छ दिन बितिसक्दा पनि प्रदेश अस्पताल सुर्खेतको शवगृहमा राखिएको छ । परिवारले भने सामूहिक बलात्कारपछि हत्या भएको दाबी गर्दै न्याय सुनिश्चित नभएसम्म शव नबुझ्ने अडान लिएका छन् । घटनापछि इनिसाको बुबा इन्द्रबहादुर विक पनि दुबईबाट वीरेन्द्रनगर आइपुगेका छन् । उनले घटनाको सत्यतथ्य छानबिन गरेर दोषीलाई कडा कारबाहीको माग गरेका छन् ।
