मनहरी - मनहरी गाउँपालिका वडा ९ रजैयामा लागूपदार्थ दुव्र्यसनी सम्बन्धी सचेतना कार्यक्रम भएको छ । केदारेश्वर युवा क्लबको आयोजना तथा ९ नं. वडा कार्यालयको समन्वयमा सचेतना कार्यक्रम गरिएको हो ।
युवावर्ष गंगा आधारभूत विद्यालयमा सञ्चालन भएको कार्यक्रम क्लबका अध्यक्ष राजेन्द्र कुँवरको अध्यक्षता तथा ९ नं. वडाका अध्यक्ष राजकुमार श्रेष्ठको प्रमुख आतिथ्यता रहेको थियो । सचेतना कार्यक्रमलाई मामाघर नेपालका संरक्षक एंव प्राध्यापक अर्पण पराजुलीले सहजीकरण गरेका थिए ।
पछिल्लो समय बालबालिका तथा किशोर किशोरीहरु लागूपदार्थ सेवनमा आकर्षित भएकाले त्यसलाई न्यूनिकरण गर्न विद्यालय स्तरबाटै सचेतना दिनुपर्छ भन्ने उद्देश्यका साथ कार्यक्रम सञ्चालन गरिएको क्लबका अध्यक्ष कुँवरले बताए । दुव्र्यसनले शारिरीक तथा मानसिक रुपमा जटिल असर पर्ने बताउँदै उनले आगामी दिनहरुमा क्लबले विद्यालय स्तरबाटै सचेतना फैलाउने कार्य गरिने प्रतिवद्धता जनाए ।
कार्यक्रममा सामूदायिक प्रहरी सेवा केन्द्रका देवकुमार श्रेष्ठ, नेपाल प्रहरी सम्झना गिरि, भक्ति सुधार केन्द्रका सुरज श्रेष्ठलगायतको आतिथ्यता रहेको थियो । कार्यक्रममा विद्यालयका शिक्षक, विद्यार्थी र अभिभावकहरुको सहभागिता रहेको थियो ।
