काठमाडौं– साताकाे पहिलाे दिन आज नेपाल स्टक एक्सचेन्ज (नेप्से) परिसूचक दोहोरो अंकले ओरालो लागेको छ । आज नेप्से परिसूचक २६.५१ अंकले घटेर २६४९.५२ विन्दुमा बन्द भएको हाे ।
बजार घटे पनि कारोबार रकम भने उत्साहजनक नै देखिएको छ। आज कुल ७ अर्ब ८ करोड ५४ लाख ४९ हजार रुपैयाँ बराबरको सेयर खरिद-बिक्री भएको छ । ३४२ वटा स्क्रिप ८४ हजार १५६ पटकको कारोबारमा १ करोड ५७ लाख ३६ हजार ३७२ कित्ता सेयर खरिदबिक्री भएका छन् ।
आजको बजारमा २५७ कम्पनीको कारोबार भएकोमा २११ वटा कम्पनीको सेयर मूल्य घटेको छ भने ४५ वटा कम्पनीको सेयर मूल्य बढेको छ भने एउटा कम्पनीको मूल्य भने स्थिर रहेको छ। ५ वटा कम्पनीको सेयर मूल्यमा सकारात्मक सर्किट लागेको छ । सागर डिस्टिलरी, निफ्राको ऋणपत्र, स्वस्तिक लघुवित्त, झापा इनर्जी र आत्मनिर्भर लघुवित्तको मूल्यमा सकारात्मक सर्किट लागेको छ । त्यसैगरी एनएमबि बैंकको डिवेञ्चरमा सर्वाधिक ८.९९ प्रतिशतको गिरावट देखिएको छ ।
कारोबार रकमका आधारमा आज हिमालयन रिइन्स्योरेन्स शीर्ष स्थानमा रहेको छ । उक्त कम्पनीको २३ करोड ५ लाख रुपैयाँ बराबरको कारोबार भएको छ। त्यसैगरी जोशी हाइड्रोपावर, ग्रीन भेञ्चर र एनआरएन इन्फ्रास्ट्रक्चरमा पनि लगानीकर्ताको उच्च आकर्षण देखिएको छ।
