काठमाडौं- म्याग्दीमा विपद्का कारण क्षति ब्यहोरेका किसानलाई राहत उपलब्ध गराउन गराउने भएको छ । प्रदेश सरकारले पशुपंक्षी, खाद्यान्न, फलफूल, तरकारी बालीको राहत उपलब्ध गराउने भएको हो ।
गण्डकी प्रदेश सरकारले प्राकृतिक प्रकोपका कारण क्षति भएका पशुपंक्षी, खाद्यान्न, फलफूल, तरकारी बालीको राहत उपलब्ध गराउन म्याग्दीमा आर्थिक वर्ष २०८२/८३ का लागि १८ लाख रुपैयाँ बजेट बिनियोजन गरेको छ । यसअघि बजेट नहुँदा असिना, बाढी पहिरो, चट्याङका कारण क्षति ब्यहोरेका किसानले सरकारबाट सुविधा पाउन सकेका थिएनन् । प्राकृतिक प्रकोप पीडित किसानलाई राहत उपलब्ध गराउन पहिलो पटक बजेट प्राप्त भएको कृषि ज्ञान केन्द्र म्याग्दीका प्रमुख सञ्जिव बास्तोलाले बताए । ‘यसअघि क्षतिको विवरण सङ्कलन गरेर राहतका लागि मन्त्रालयमा सिफारिस गर्ने गरिएको थियो,’ उनले भने,‘जिल्लामै बजेट आएपछि किसानलाई छिटो राहत उपलब्ध गराउन सकिने भएको छ ।’
कृषि ज्ञान केन्द्रलाई आकस्मिक सेवाटेवा तथा राहत कार्यक्रम शीर्षकमा आठ लाख रुपैयाँ र भेटेरीनरी अस्पताल तथा पशु सेवा विज्ञ केन्द्रमा पशुपंक्षी तथा मत्स्य व्यवसायमा राहत तथा पुनःस्थापना सहयोग कार्यक्रमका लागि १० लाख रुपैयाँ बजेट प्राप्त भएको हो । यसैगरी चीन र भारत जोड्ने कालीगण्डकी कोरिडोर सडकले छोएको म्याग्दीका स्थानीय तहमा लोकमार्ग÷कोरिडोर केन्द्रित कृषि उत्पादन तथा प्रवद्र्धन कार्यक्रम सञ्चालन हुने भएको छ । यस कार्यक्रमका लागि कृषि र पशुतर्फ २०/२० लाख रुपैयाँ बजेट प्राप्त भएको छ ।
रघुगङ्गा, अन्नपूर्ण गाउँपालिका र बेनी नगरपालिकामा व्यावसायिक तरकारी खेती, गाईभैसी, कुखुरा, बाख्रा, बङ्गुरपालन विस्तार गरी राजमार्गका होटल तथा रेष्टुराँमा आवश्यक कृषि उपज स्थानीयस्तरमै उत्पादन गर्ने कार्यक्रमको उद्देश्य रहेको भेटेरीनरी अस्पताल तथा पशु सेवा विज्ञ केन्द्रका प्रमुख गोपाल गिरीले बताए । ग्रामीण कृषि पर्यटन प्रवद्र्धन कार्यक्रमका लागि रु पाँच लाख र कृषि उद्यम विकास कार्यक्रमलाई २५ लाख रुपैयाँ बजेट प्राप्त भएको छ । कृषि उद्यम कार्यक्रममार्फत कृषि उपजको ग्रेडिङ, लेवलिङ, प्याकेजीङ तथा प्रशोधनसम्बन्धी र कृषि पर्यटन कार्यक्रममार्फत होमस्टे, फार्मस्टेलाई सहयोग गरिने कृषि ज्ञान केन्द्रले जनाएको छ ।
