काठमाडौं- भोजपुरमा सुन्तलाको फल खस्ने रोग देखिएपछि किसान समस्या परेका छन् । सुन्तलाका दानाका भेट्नो कुहिएर झर्न थालेसँगै व्यावसायिक सुन्तलाखेतीमा लागेका किसान समस्यामा परेका हुन् ।
सुन्तलाको फल झर्ने समस्याले किसानलाई चिन्तित बनाएको भोजपुर नगरपालिका–३ गुप्तेश्वरका किसान डम्बर बस्नेतले बताए । ‘सुन्तलामा विभिन्न खालका रोग देखिएपछि किसान समस्यामा परेको छौँ, सुन्तलामा पछिल्लो समय फल झर्ने समस्या देखिएको छ’, उनले भने,‘भेट्नो कुहिएर फल झरिरहेको छ, सुन्तलाको फल झर्ने रोगले चिन्तित बनाएको छ ।’
गुप्तेश्वरका तमना, रबे, सिमलबोटे, बलौटे, वाछलालगायत ठाउँका करिब ३०० किसानले सुन्तलाखेती गर्दै आएको उनले जानकारी दिए । सुन्तलामा रोग देखिएपछि किसान उपचारको खोजीमा रहेको उनको भनाइ छ । सुन्तलामा फल झर्ने, हाँगा सुक्ने, ढुसी लाग्ने, पात बेरिने समस्या देखिएको स्थानीय किसान शारदा थापाले बताए । ‘फल झर्ने रोगले कतिपय बोट खाली नै भइसकेको छ ’, उनले भने,‘ गत वर्ष १० लाख रुपैयाँको सुन्तला बेचेको भए पनि यस वर्ष रोगका कारण उत्पादन घट्ने चिन्ता बढेको छ ।’ आफ्नो बगानमा साना ठूला गरी करिब ७०० बोट सुन्तला रहेको थापाको भनाइ छ ।
भुइँमा झरेको सुन्तलाको दाना काटेर हेर्दा कुनै पनि किरा नरहेको अर्का किसान तीर्थ प्रधानले बताए । ‘राज्यले रोगको निराकरणको लागि ध्यान दिन आवश्यक रहेको छ,’ उनले भने,‘प्रायः यहाँका सबै किसानको सुन्तला बगैँचामा फल खस्ने रोग देखिएको छ ।’
