काठमाडौं- विद्यार्थीको हातमा पुस्तक पर्याउने धादिङ बेनीघाट रोराङ्गमा पठन पुनर्जागरण अभियान सम्पन्न भएको छ । विद्यार्थीलाई किताबसँग जोड्न कवि महान त्यागीले अभियान सम्पन्न गरेका हुन् ।
‘विद्यार्थीलाई किताबसँग मित्रता गर्न सिकाउनु नै भविष्य सुरक्षित गर्ने उपाय हो,’ भन्ने विश्वासका साथ बेनीघाट रोराङ्ग गाउँपालिकामा पठन पुनर्जागरण अभियान चलाएको कवि महान त्यागीले बताए । ‘सात दिनसम्म सञ्चालन गरिएको अभियान अन्तर्गत गाउँपालिकाका सबै १२ वटा माध्यमिक विद्यालयमा पुगेर विद्यार्थीहरूसँग प्रत्यक्ष संवाद गरेको थिए,’उनले भने,‘ सो क्रममा ७२ थान पुस्तक विद्यालय पुस्तकालयलाई हस्तान्तरण गरेको छु ।’ यी पुस्तकहरूले दीर्घकालीन रूपमा विद्यार्थीलाई पढाइसँग जोड्ने उनको अपेक्षा रहेको छ ।
पुस्तक पाउँदा विद्यार्थीहरू उत्साहित बनेका छन् । कक्षा ८ की छात्रा एकताले भनिन्,‘अब हामीले पनि घरमा पढ्ने बानी बसाल्छौं ।’
कार्यक्रममा बोल्दै कवि त्यागीले भने,‘पुनर्जागरणको बिउ रोप्दै हिँडेको छु। आशा छ विद्यार्थीहरूकै हातबाट यो ठूलो वृक्ष बन्नेछ ।’हालै डेनमार्कमा सम्पन्न अन्तर्राष्ट्रिय साहित्य समाजको कविता प्रतियोगितामा प्रथम भएका त्यागी यसअघि पनि गजल गङ्गा मासिक, मालश्री भित्ते पत्रिका र भित्ते कविता अभियानमार्फत गाउँमा साहित्यिक चेतना फैलाइसकेका छन् ।
यसपटक उनले पुस्तकलाई मुख्य माध्यम बनाएर समुदायलाई नजिक ल्याउने प्रयास गरेकाे बताएका हुन् ।
