चितवन- व्यवसायिक किट विकास फार्म भण्डाराले रातो च्याउ (ग्यानोडर्मा)को उत्पादन सुरु गरेको छ । पहिलो पटक फार्मले यो च्याउ उत्पादन सुरु गरेको हो ।बीउ राखेको ६० दिनदेखि उत्पादन दिन सक्ने यो च्याउ फार्मको च्याउ खेती प्रविधि प्रदर्शनी कार्यक्रम अन्तर्गत उत्पादन गर्न सुरु गरेको हो ।
कार्यालयका सूचना अधिकारी जीवन सापकोटाले उत्पादन लिन सुरु गरिएको जानकारी दिए । उनका अनुसार फार्मले अहिले ६ सयवटा पोकामा यो च्याउको परिक्षण उत्पादन गरेको छ । काठमाडौंबाट ल्याइएको बीउलाई काठको धुलो, चोक्कर, चुन र जिप्सनको मिश्रणगरी बनाईएको पोकामा राखेर यसको परीक्षण गरिएको हो । उनले भने “अहिले हामीले दोस्रो चरणको उत्पादन लिई सकेका छौ । अब तेस्रो चरणको उत्पादन लिन तयारी भएको छ ।”
अहिले नेपाको काठमाडौंमा केही ठाउँमा यो च्याउ उत्पादन हुने गरेको छ । यस च्याउलाई तापक्रम र आद्रता मिलाएर सुकाएर धुलो वनाएर प्रयोग गर्ने गरिएको फार्मकी प्रमुख सुरुचि त्रिपाठीले जानकारी दिइन् । नसर्ने रोगका बिरामीहरुले यो च्याउ नियमित प्रयोग गर्ने गरेको पाईएको उनले बताइन् । उनले भनिन् “यो च्याउमा औषधि जन्य गुणहरु हुने गर्दछ ।”
यस च्याउको प्रयोगले उच्च रक्तचापलाई नियन्त्रणमा राख्ने, मधुमेह नियन्त्रणमा सहयोग पुर्याउने, क्यान्सर प्रतिरोधी गुण भएको, शरिरको रोग प्रतिरोधात्मक क्षमता बृद्धि गर्ने, डिप्रेसन एबं अनिदोपना हटाउन सहयोग गर्ने गुण भएको त्रिपाठीले बताइन् । यसकाकारण यसलाई नसर्ने रोग लागेकाहरु बिहान दिउँसो चिया कफीमा प्रयोग गरेर खाने गरेको उनले जानकारी दिइन् । यसलाई दुध खुवाउदै गरेको आमा, ५ वर्ष मुनिका बच्चा र शल्यक्रिया गरेर बसेका बिरामीहरुलाई प्रयोग गर्न दिन नहुने भएकाले यसको महत्व र उपयोगिता अध्ययनका लागि पहिलो पटक परीक्षण गरिएको हो । यो च्याउ अहिले नेपालमा बिदेशबाट आउने गरेको उनले बताइन् ।
