काठमाडौं- किष्ट मेडिकल कलेज तथा शिक्षण अस्पताल नेपालकै पहिलो अन्तर्राष्ट्रिय रुपमा गुणस्तरीय स्वास्थ्य सेवा प्रदान गर्ने मान्यता प्राप्त मेडिकल कलेज तथा शिक्षण अस्पताल बनेको छ ।अन्तर्राष्ट्रिय रुपमा गुणस्तरीय स्वास्थ्य सेवाको मान्यता प्रदान गर्ने संस्था भारतको नेसनल एक्रिडियसन बोर्ड फर हस्पिटल एण्ड हेल्थ केयर प्रोभाइडर्स (न्याब) ले लामो समयको अनुगमन र परीक्षणपश्चात् तोकिएका ६०० भन्दा बढी मापदण्डहरू पूरा गरेपछि गत अप्रिल २४ मा अस्पताललाई यो मान्यता प्रदान गरेको हो ।
उक्त मान्यता प्राप्त गरेसँगै अब अस्पतालले संस्थाले तोकेको अन्तर्राष्ट्रिय गुणस्तर कायम गर्नुपर्ने छ । यसले बिरामीको सेवाका लागि अस्पताल थप उत्साही भएको तथा सेवाको गुणस्तरमा सेवाग्राहीले थप विश्वास गर्ने वातावरण बनेको अस्पतालका प्रबन्ध निर्देशक अविशेक थापाले बताए । जुनसुकै प्रकारका बिरामीले स्वास्थ्य सेवामा अन्तर्राष्ट्रिय गुणस्तरको उपचार सेवा पाउने अवसर अस्पतालले प्रदान गरेकोले अस्पताललाई थप जिम्मेवार बनाएको उनको भनाइ छ । यसले अस्पतालप्रति सेवाग्राहीको थप विश्वास बढ्नेसमेत उनले बताए ।
के हो एनिबएच मान्यता
न्याबले भारत तथा भारतबाहिरका स्वास्थ्य सेवा प्रदायकहरुको गुणस्तर मापन गर्ने गर्दछ । न्याबले अस्पताल एक्रेडिटेसन कार्यक्रम यसै वर्ष सुरु गरेको हो । सार्वजनिक तथा निजी अस्पतालमा स्वास्थ्य सेवा गुणस्तर सुधार गर्ने र बिरामीको सुरक्षामा ध्यान दिने उद्देश्यले यो कार्यक्रम सुरु गरेको न्याबको भनाइ छ ।न्याबको यो कार्यक्रम भारतसँगै विभिन्न देशमा फैलिएको छ । न्याब इन्टरनेसनल सोसाइटी फर क्वालिटी एसुरेन्स इन हेल्थ केयरबाट प्रमाणित भएको जनाइएको छ।
न्याबको गुणस्तर मापदण्ड प्राप्त गर्नका लागि अस्पतालले बिरामीको सुरक्षा र स्वास्थ्य सेवाको गुणस्तरमा केन्द्रित भएर अस्पतालको सेवा सुधार गर्ने आधारहरु प्रस्तुत गर्नुपर्छ । त्यस्तै, अस्पतालको पूर्वाधार, उपकरणलगायतका मापदण्ड पालना गर्नुपर्छ ।न्याबको गुणस्तर प्राप्त गर्न अस्पतालले स्वास्थ्य सेवा क्षेत्रमा अन्तर्राष्ट्रिय रुपमा प्रमाणित ६०० भन्दा बढी मापदण्डहरूमा परीक्षण गराउनुपर्छ । सेवा सुरक्षादेखि संक्रमण नियन्त्रण, बिरामीको अधिकार, कर्मचारीको तालिम, दस्तावेज व्यवस्थापन, आकस्मिक सेवा तयारीजस्ता विभिन्न क्षेत्रहरूमा अस्पतालले मापदण्ड पूरा गर्नुपर्छ । यी मापदण्ड पूरा नगर्ने अस्पताललाई न्याबले गुणस्तर मान्यता प्रमाणपत्र दिँदैन । किष्ट अस्पतालले दुई वर्षभन्दा बढी समय लगाएर सम्पूर्ण आन्तरिक प्रक्रिया पूरा गरी यो मान्यता प्राप्त गरेको जनाएको छ ।
ललितपुर ग्वार्कोस्थित यो अस्पताल वि.सं. २०६२ सालमा स्थापना भएको हो । अस्पतालले सामान्य स्वास्थ्य सेवादेखि विशिष्टीकृत सेवा प्रदान गर्दै आएको छ । पछिल्लो समय मिर्गौला तथा कलेजो प्रत्यारोपण, मुटु रोग तथा क्यान्सर रोगसम्बन्धी सेवासमेत अस्पतालले दिँदै आएको छ । नेपालमै पहिलोपटक एकै व्यक्तिमा कलेजो र मिर्गौलाको सफल प्रत्यारोपणसमेत अस्पतालले गरिसकेको छ ।
