काठमाडौं - खानेपानी मन्त्री प्रदीप यादवले नेपालमा दन्त चिकित्सकहरूको आवश्यकता, महत्व र माग दिनानुदिन बढ्दै गएको बताएका छन्। पिपल्स डेन्टल कलेज एण्ड हस्पिटलद्वारा दिवंगत संस्थापक स्व. तीर्थरत्न बज्राचार्यको २२औँ पुण्यतिथिको अवसरमा आयोजित कार्यक्रममा सम्बोधन गर्दै मन्त्री यादवले दन्त स्वास्थ्य सेवाको पहुँच अझै धेरै ग्रामीण तथा दुर्गम क्षेत्रहरूमा कमजोर रहेको उल्लेख गरे।
“नेपालमा अझै धेरै ग्रामीण तथा दुर्गम क्षेत्रहरूमा दन्त स्वास्थ्य सेवाको पहुँच कमजोर छ, जसका कारण त्यहाँ दन्त चिकित्सकहरूको माग अत्यन्तै उच्च छ,” मन्त्री यादवले भने, “सरकारले यस दिशामा ध्यान दिइरहेको छ र आगामी दिनमा दन्त स्वास्थ्य सेवा विस्तार गर्ने योजनामा पनि काम भइरहेको छ।”
मन्त्री यादवले दिवंगत तीर्थरत्न बज्राचार्यलाई नेपाली दन्त चिकित्सा शिक्षाको आधार निर्माणमा महत्वपूर्ण योगदान पुर्याएको व्यक्तित्वको रूपमा स्मरण गरे। “दन्त स्वास्थ्य सेवाका लागि स्व. तीर्थरत्न बज्राचार्यको योगदान उच्च छ। उहाँको सपना साकार पार्न र नेपाली जनतालाई सहज तथा सुलभ सेवा पुर्याउन यो अस्पताल र यहाँका विद्यार्थीहरूको भूमिका महत्वपूर्ण छ,” उनले थपे।
कार्यक्रममा विशिष्ट अतिथि जनता समाजवादी पार्टीका संघीय परिषद अध्यक्ष राजेन्द्रप्रसाद श्रेष्ठले दन्त स्वास्थ्यप्रति चेतना अभिवृद्धि, ग्रामीण क्षेत्रमा सेवा विस्तार र गुणस्तरीय शिक्षा विकासका लागि सरोकारवाला निकायबीच सहकार्य आवश्यक रहेकोमा जोड दिए।पिपल्स डेन्टल कलेजका प्रमुख कार्यकारी अधिकृत भीमबहादुर चन्दले कलेजमा एमबिबिएस शिक्षाका लागि आवश्यक भौतिक पूर्वाधार तयार पारिए पनि हालसम्म अनुमति नपाएको गुनासो गरे।
कार्यक्रममा बागमती प्रदेश सभा सदस्य सैलेन्द्र बज्राचार्य, खानेपानी तथा ढल व्यवस्थापन विभागका महानिर्देशक ईञ्जिनियर रामकुमार श्रेष्ठ, कलेजका अध्यक्ष विद्याभूषण बज्राचार्य, प्रवन्ध निर्देशक रोशन लुइटेल, प्राचार्य प्रा. डा. सुरेन्द्रमान श्रेष्ठ, विद्यार्थीहरू तथा स्वास्थ्य क्षेत्रका विभिन्न प्रतिनिधिहरूको उपस्थिति थियो।कार्यक्रममा उपस्थित वक्ताहरूले दिवंगत बज्राचार्यको योगदानको स्मरण गर्दै नेपालमा दन्त स्वास्थ्य सेवा सुधार गर्नुपर्ने आवश्यकता औंल्याएका थिए।
