- जसरी हुन्छ प्रतिपक्षीलाई थकाएर सदन सञ्चालन गर्ने तयारीमा सत्तापक्ष
- राजीनामालाई ‘बटमलाइन’ बनाएको माओवादी केन्द्र लचक बन्दै
- राजीनामाको विकल्पमा उच्चस्तरीय छानबिन समिति बनाउनुपर्ने माओवादीको प्रस्ताव, तर सत्तापक्षबाट अस्वीकार
- गृहमन्त्रीको राजीनामाकै अडानमा रास्वपा
काठमाडौं– प्रतिपक्षी दलले भिजिट भिसा प्रकरणमा निष्पक्ष छानबिनका लागि गृहमन्त्रीबाट रमेश लेखकको राजीनामा मागिरहेका छन् । जसकारण मंगलबारको प्रतिनिधिसभा बैठक बस्न सकेन । सत्तापक्ष भने जसरी हुन्छ प्रतिपक्षीलाई थकाएर सदन सञ्चालन गर्ने तयारीमा देखिन्छ ।
त्रिभुवन अन्तर्राष्ट्रिय विमानस्थल अध्यागमन कार्यालयका तत्कालीन प्रमुख तीर्थराज भट्टराईलाई अख्तियारले जेठ ७ गते नियन्त्रणमा लिएपछि गृहमन्त्री लेखक विवादमा तानिएका हुन् । त्यसयता प्रतिपक्षी दलहरुले सदन अवरोध गर्दै आएका छन् । गृहमन्त्रीको राजीनामा माग्दै आएका उनीहरुले बजेट भाषणमा सदन खुलाए पनि त्यसपछि आफ्नो अडान छाडेका छैनन् ।
भिजिट भिसा प्रकरणमा पनि सुत्तापक्षले जबरजस्ती गर्न खोजेका थिए । हामीले छानबिनको विषय मुख्य भएकाले सरकारको भनाइ के छ ? भनेपछि अहिले सदन स्थगित भयो । त्यहाँ पनि हाम्रो लडाइँ जारी छ ।
पुष्पकमल दाहाल
अध्यक्ष, माओवादी केन्द्र
यद्यपि, प्रतिपक्षी दलहरुमा दरार देखिएको छ । अहिले राष्ट्रिय प्रजातन्त्र पार्टी (राप्रपा) राजसंस्थाको पुनस्र्थापनाको मागसहित सडक आन्दोलनमा छ । प्रमुख प्रतिपक्षी दल नेकपा माओवादी केन्द्र यो मागको घोर विरोधी हो । यता राष्ट्रिय स्वतन्त्र पार्टी (रास्वपा)प्रति पनि माओवादीले भर गर्न सकेको छैन । जसकारण सत्तापक्षीय दल नेपाली कांग्रेस र नेकपा एमालेले आफूले विकल्प दिनुको साटो प्रतिपक्षी दललाई गृहमन्त्रीको राजीनामाको विकल्प मागिरहेका छन् ।
माओवादी लचक बन्दै
विदेसिने युवाबाट प्रतिव्यक्ति ५० हजारदेखि ७५ हजार रुपैयाँसम्म र युरोपियन मुलुक माल्टा, पोर्चुगललगायत देशमा चार लाख रुपैयाँसम्म अध्यागमन कार्यालयको कर्मचारीले उठाउने गरेको तथ्य बाहिरिएपछि सबैभन्दा पहिले गृहमन्त्रीका राजीनामा माओवादीले मागेको थियो । माओवादी अध्यक्ष पुष्पकमल दाहालले लेखकको राजीनामालाई ‘बटमलाइन’ बनाएका थिए । तर यही माओवादी यस विषयमा लचक बन्दै गएको छ । मंगलबार ११ बजेका लागि डाकिएको सदन गृहमन्त्रीलाई बोल्न दिने सहमतिमा पुगेपछि २ बजे चल्ने तयारी भयो ।
गृहमन्त्रीमाथि प्रश्न उठेपछि जवाफ दिन पाउने उहाँको हक हो । उहाँ जवाफ दिन तयार हुनुहुन्छ । उहाँले जवाफ दिएपछि मात्रै विपक्षी दलहरूको मागबारे छलफल हुन्छ ।
महेश बर्तौला
प्रमुख सचेतक, नेकपा एमाले
सभामुख देवराज घिमिरेसँगको छलफलपछि सत्तापक्ष पनि यो विषयमा राजी भयो । तर रास्वपाले गृहमन्त्रीको राजीनामालाई मुख्य माग बनाउनुपर्ने अडान राखेपछि माओवादीले यस विषयमा उच्चस्तरीय छानबिन समिति बनाउनुपर्ने सर्त अघि सा¥यो । सत्तापक्षले उक्त प्रस्ताव अस्वीकार गरेपछि सदन आज (बुधबार) १ बजेसम्मका लागि स्थगित भएको छ ।सदन स्थगितपछि माओवादी अध्यक्ष दाहालले आफूहरुलाई सरकारले जबरजस्ती गर्न खोजेको दाबी गरे । ‘भिजिट भिसा प्रकरणमा पनि सुत्तापक्षले जबरजस्ती गर्न खोजेका थिए । हामीले छानबिनको विषय मुख्य भएकाले सरकारको भनाइ के छ ? भनेपछि अहिले सदन स्थगित भयो । त्यहाँ पनि हाम्रो लडाइँ जारी छ,’ काठमाडौंमा नेवाः–तामाङ जागरण अभियान सुरू गर्दै दाहालले भने ।
राष्ट्रिय सभामा भने माओवादीले गृहमन्त्रीको राजीनामा माग गरेको थियो । बैठकमा माओवादीकी प्रमुख सचेतक गंगाकुमारी बेलवासेले नैतिकताको आधारमा गृहमन्त्रीको राजीनामा आउनुपर्ने माग गरेकी हुन् । ‘गृहमन्त्री रमेश लेखक बौद्धिक, शालीन, कानुन बुझेको मन्त्री हुनुहुन्छ । उहाँले बुझ्नुपर्छ नैतिकताका आधारमा राजीनामा दिने भनेको पुनः उहाँ निर्दोष ठहरिएमा त्यही पदमा बहाल भएर आउन सक्नुहुन्छ । त्यसैले गृहमन्त्री रमेश लेखकले निष्पक्ष छानबिन गर्नका लागि नैतिकताका आधारमा राजीनामा दिएर मार्गप्रशस्त गर्न माग गर्दछु,’ बेलवासेले भनिन् ।
सत्तापक्ष तयार नहुँदा सदन सञ्चालन हुन नसकेको माओवादी सांसद राजन दाहालले आरोप लगाए । सत्तापक्ष सहमतिबाट पछि हट्दा सदन सञ्चालन हुन नसकेको उनी बताउँछन् । ‘सबै दलको तर्फबाट बोल्ने त्यसपछि गृहमन्त्रीले पनि बोल्ने र त्यसअघि सरकारको तर्फबाट न्यायिक होस् वा संसदीय छानबिन समितिको टिओआरसहित आएपछि सदनको अवरोध हटाउने हामीबीच सहमति थियो । तर, सत्तापक्ष तयार भएको छैन,’ सांसद दाहालले भने ।
नेकपा एमालेका प्रमुख सचेतक महेश बर्तौलाले गृहमन्त्री लेखकले सदनमा नबोली छानबिन आयोगबारे छलफल नहुने बताए । ‘गृहमन्त्रीले जवाफ दिन पाउनुपर्छ हाम्रो लगातारको आग्रह त्यही हो । गृहमन्त्री जवाफ दिन तयार हुनुहुन्छ । उहाँले जवाफ दिएपछि मात्रै विपक्षी दलहरूको मागबारे छलफल हुन्छ । त्यसमा उहाँहरू तयार हुनुभएन । उहाँहरूले राजीनामा नभए छानबिन समिति बनाउनुप¥यो भन्नुभयो,’ मंगलबार सदन स्थगितपछि बर्तौलाले भने, ‘जवाफ दिँदा नै विपक्षीहरू खुसी पनि हुन सक्छ । सन्तुष्ट पनि हुन सक्छ । भोलिका दिनमा गलत नजिर नबसोस् ।’
पद जोगाइदिन गृहमन्त्रीको ‘हारगुहार’
गृहमन्त्री रमेश लेखकले आफ्नो राजीनामाको माग चर्किएपछि आफूनिकट पत्रकारलाई फोन गरी तीर्थराज भट्टराईलाई अख्तियारले बयान नलिएको समाचार लेखाएका थिए । त्यसपछि बजेटका कारण मिडियामा केही समय भिजिट भिसा प्रकरण सेलायो । यही क्रममा लेखकले पूर्वडिएसपी गोविन्द पन्थी प्रयोग गरे । पन्थीले माओवादीबाट गृहमन्त्री बनेका नारायणकाजी श्रेष्ठकै पालामा यस्तो लेनदेन सुरु गरेको भन्दै विपक्षीको मागलाई कमजोर बनाउनेगरी सामाजिक सञ्जालमा पोस्टहरु गर्न थाले ।
यस विषयमा तत्काल ‘रेस्पोन्स’ गर्दै गृह मन्त्रालयले आन्तरिक छानबिन थालेको जनायो । विपक्षी नहट्ने र माथिका हारगुहारले काम नगरेपछि गृहमन्त्री लेखकले अहिले भने विपक्षी दलका नेताहरुलाई नै फोन गरी अनुनय गर्न थालेका छन् । गृहमन्त्री लेखकले आफ्नो पद जोगाइदिन भन्दै विपक्षी दलका नेताहरुलाई हरदिन फोन गर्न थालेका हुन् । जसले गर्दा माओवादी नेताहरु यो प्रकरणबाट ‘ब्याक’ हुने सम्भावना बढेको बताइन्छ ।
