काठमाडौं– काठमाडौं महानगरपालिका (कामपा)का प्रमुख बालेन्द्र (बालेन) साहका ‘राइट ह्याण्ड’ मानिने महानगर प्रहरी प्रमुख राजुनाथ पाण्डेलाई स्पष्टीकरण सोधिएको छ । महानगरका प्रमुख प्रशासकीय अधिकृत सरोज गुरागाईले सोमबार उनलाई सातबुँदे स्पष्टीकरण सोधेका हुन् । स्पष्टीकरणपत्रमा आफूलाई चैत २१ गते कार्यालय प्रवेश गर्दा रोक्ने काम गरेकोदेखि गाडीको ह्वील लक लगाएकोलगायतका विषयमा किन कारबाही नगर्ने ? भनी जवाफ मागेका छन् ।
पाण्डेले महानगर प्रमुख साहको मौखिक आदेशमा काम गर्दै आएका थिए । महानगर प्रहरी प्रमुख प्रशासकीय अधिकृत मातहत हुने भए पनि साहको आडमा ‘सिंघम शैली’मा उत्रिने गरेका पाण्डे कारबाहीको भागीदार बन्ने सम्भावना बढेको छ ।उपप्रमुख, प्रमुख प्रशासकीय अधिकृत, वडाध्यक्षहरू र कार्यपालिका सदस्यहरूले पटक–पटक अनुरोध गर्दासमेत प्रमुख प्रशासकीय अधिकृतको कार्यकक्षको ताला खोल्ने काममासमेत उनले महानगर प्रमुख साहको मौखिक आदेशमा अवरोध सिर्जना गरेका थिए । त्यसपछि उपप्रमुख सुनिता डंगोलले लिखित वा कुनै त्यस्तो पत्र छ अवरोध गर्नलाई ? भनेपछि उनले महानगर प्रमुखको मौखिक आदेश पालना गरेको जवाफ दिएका थिए ।
काठमाडौं महानगरपालिका महानगर प्रहरी ऐन, २०८० को दफा ५ बमोजिम काम गर्नुपर्नेमा किन ऐन पालना नगरेको भन्दै स्पष्टीकरण सोधिएको हो । स्पष्टीकरणपत्र बुझेको मितिले सात दिनभित्र जवाफ पेस गर्न भनिएको छ ।‘म्यादभित्र स्पष्टीकरण नबुझाएमा वा स्पष्टीकरण चित्तबुझ्दो नभएमा कानुनबमोजिम कारबाही हुने ब्यहोरासमेत जानकारी गराउँदछु,’ स्पष्टीकरणपत्रमा भनिएको छ ।
पाण्डेको बहिर्गमन कति नजिक ?
काठमाडौं महानगरपालिकामा केही वडाध्यक्ष र महानगर प्रमुख साहको साथ पाएपछि मैमत्त बनेका प्रहरी प्रमुख पाण्डे अन्ततः कारबाहीमा तानिने भएका छन् । नगरप्रमुखको मौखिक आदेशमा जस्तोसुकै कदम चाल्छु भन्दै आतंक फैलाउन उद्धत देखिन्थे उनी ।उसो त पाण्डेले राष्ट्रिय परिचयपत्र बनाउँदासमेत तनाव व्यहोरेका थिए । महानगरमा राष्ट्रिय परिचयपत्र बनाउन जाँदा दुई पत्नीका कारण बन्न नसक्दा एक कर्मचारीलाई तीन महिनासम्म शक्तिको दुरुपयोग गर्दै निलम्बनमा नै राखेका थिए ।
उनलाई स्पष्टीकरण सोधेर कारबाहीको प्रक्रिया अगाडि बढाउँदा उनी मातहतकै प्रहरीहरु नै खुसी देखिएको स्रोतको दाबी छ । त्यसो त पाण्डेले पाएको प्रहरी प्रमुखको जिम्मेवारी नै वैध नभएको बताइन्छ । महानगर प्रमुख साहले फुली लगाइदिए पनि त्यसले औपचारिकरुपमा वैधता पाइनसकेको महानगर स्रोतको दाबी छ ।
महानगर प्रमुख साहलाई झट्का
पाण्डेलाई कारबाही हुँदा महानगर प्रमुख साहलाई झट्का लाग्ने देखिन्छ । साहले प्रमुख प्रशासकीय अधिकृत गुरागाईलाई महिनौंसम्म कार्यालयमा हाजिर गर्न रोक लगाएका थिए । निर्माणाधीन काठमाडौं भ्युटावरको नक्सा स्वीकृति गर्दा अनियमितता गरेको आरोपमा उनले गुरागाईमाथि अवरोध सिर्जना गरेका थिए । सोही विवादका कारण गुरागाई गत पुस ७ गतेदेखि बिदामा बसेका थिए । उनी बिदामा बसेपछि प्रशासन प्रमुखविहीन बनेको महानगरमा तीन महिनासम्म तलब र अन्य भुक्तानी रोकिएको थियो ।
महानगर प्रमुख साहको अवरोधकाबीच गत चैत २१ गते गुरागाई कार्यालयमा हाजिर भएका थिए । जतिबेला उनलाई रोक्न प्रमुख साहले पाण्डे नेतृत्वको महानगर प्रहरी परिचालन गरेका थिए । गुरागाईलाई कार्यालयमा हाजिर गराउन उपप्रमुख डंगोल, वडाध्यक्षहरु र कार्यपालिका सदस्यहरु लागेका थिए ।
यस्ता छन् मुख्य आरोप
– प्रमुख प्रशासकीय अधिकृतको सवारीसाधनमा ह्वील लक लगाएर काममा अवरोध सिर्जना गरेको
– प्रमुख प्रशासकीय अधिकृत काममा आउँदा प्रहरी साङ्लो बनाइ अवरोध सिर्जना गरेको र हुलहुज्जत गरेको
– कार्यालयमा उपस्थित जनप्रतिनिधिकोसमेत बाटो छेकी अमर्यादित एवं अभद्र व्यवहार गरेको
– प्रमुख प्रशासकीय अधिकृतको कार्यकक्षमा ताला लगाएको र उपप्रमुखदेखि अन्यले आग्रह गर्दा पनि अस्वीकार गरेको
– हाजिर पुस्तिका कब्जामा लिएको
– कर्मचारीले पालना गर्नुपर्ने कानुन पालना नगरेको
– सञ्चारमाध्यममा अनधिकृत बयानवाजी गरेको
-1745656903.jpeg)