पोखरा- पोखरा महानगरपालिका आर्थिक विकास महाशाखाद्वारा आयोजित तरबुजा मेला सम्पन्न भएको छ । पोखरा महानगरपालिका वडा नं.१३ कार्यालयको समन्वयमा भएको उक्त मेलामा तरबुजा प्रदर्शनी, तरबुजा विक्री वितरण, तरबुजा खाने प्रतियोगिता, उत्कृष्ट कृषक सम्मान लगायत गतिविधिहरू सम्पन्न गरिएका छन् ।
पोखरा महानगरपालिका क्षेत्रमा उत्पादन भएका तरबुजाहरू मेलामा राखिएका थिए । महानगरपालिकाको करिब २ सय रोपनी क्षेत्रफलमा ५० बढी व्यवसायीक कृषकहरूले तरबुजा खेती गरेका छन् । करिब २ सय टन उत्पादनको अनुमान गरिएको यस खेतीबाट २ करोडको कारोबार हुने अनुमान गरिएको छ ।
पछिल्लो समय पोखरा महानगरपालिका क्षेत्रमा यसको उत्पादन राम्रो भएको र यसखेति प्रति कृषकहरूको समेत आकर्षण बढेको पाइएको आर्थिक विकास महाशाखाका प्रमुख मनहर कडरियाले बताएका छन् ।
कृषकहरूले पनि यसबाट आफूहरूले राम्रो आम्दानी गरिरहेको बताएका छन् ।मेलामा सहभागीहरूले स्थानीय स्तरमा उत्पादन भएको अर्ग्यानिक तरबुजाको स्वाद लिएका छन् भने यो निकै स्वादिलो र मीठो भएको प्रतिक्रिया दिएका छन् ।
