मोरङ - कोशी प्रदेशमा कृषि र पर्यटनको क्षेत्रमा लगानीको सम्भावना रहेकोमा विज्ञहरुले जोड दिएका छन् । विराटनगरमा जारी प्रदेश लगानी सम्मेलनको प्रदेशको समृद्धिमा पर्यटन र कृषि विषयक प्यानल छलफलमा कार्यपत्र प्रस्तुत गर्दै विज्ञहरूले लगानीका लागि उपयुक्त समय आएको बताए ।
पर्यटनको सम्भावनाका विषयमा कार्यपत्र प्रस्तुत गर्दै नेपाल पर्यटन बोर्डका कार्यकारी निर्देशक दीपकराज जोशीले विश्व पर्यटन बजारमा पर्यटकको शैली फेरिएकोबताए । जोशीले प्रविधिको भरपुर उपयोग गरी पर्यटकीय गन्तव्यको प्रचारप्रसार गर्न आवश्यक रहेकोबताए ।
कृषि क्षेत्रका विज्ञ डा तिलचन्द्र भट्टराईले कोशी प्रदेशका रैथाने बालीहरूको व्यावसायिक र आधुनिकीकरणमा लगानी गर्ने उपयुक्त समय भएकोबताए । उहाँले कृषिको प्रवद्र्धनका लागि ठूलो लगानीको खाँचो छ भन्दै कोदो, फापर अलैँची, अदुवा, चिया जस्ता क्षेत्रमा ठूलो लगानीको खाँचो रहेको उल्लेख गरे ।
नेपाल उद्योग वाणिज्य महासङ्घ कोशी प्रदेशका अध्यक्ष राजेन्द्र राउतले लगानीमैत्री वातावरण बनाउनका लागि विद्यामान नीति नियमहरूमा परिमार्जन गर्नुपर्नेमा जोड दिए । उनले भने, “एउटा उद्योग दर्ता गर्नका लागि वातावरणीय प्रभाव मूल्याङ्कन प्रतिवेदनमै १० महिना कुर्नपर्छ । यसले गर्दा तीन वर्षमा सम्पन्न गर्नुपर्ने परियोजना सम्पन्न गर्न ६ वर्ष लाग्छ, यो झन्झटिलो प्रक्रिया अन्त्य गर्नुपर्छ ।”
कृषि उद्यमी शारदा बाँस्कोटाले तीन तहका सरकारकारी नीतिका कारण कृषि क्षेत्रमा लगानी गर्न समस्या भएकोबताए । उहाँले यसका लागि सरकारले सहजीकरण गर्नुपर्ने सुझाव दिए।
