काठमाडौं - तेस्रो राष्ट्रिय डोरीतान (टग अफ वार) प्रतियोगिता यही फागुन १६ गतेदेखि हुने भएको छ । नेपाल डोरीतान संघको आयोजनामा फागुन १६ र १७ गते उक्त प्रतियोगिता हुन लागेको हो ।संघले सोमबार यहाँ पत्रकार सम्मेलन आयोजना गर्दै सातै प्रदेशका खेलाडीको सहभागिता रहनेगरी प्रतियोगिता गरिने जानकारी दिएको हो ।
संघका अध्यक्ष भवानीप्रसाद पौडेलले भक्तपुरको सानोठिमीस्थित एसओएस हर्मन माइनर स्कुलमा उक्त प्रतियोगिता आयोजना गर्न लागिएको जानकारी दिए । उनका अनुसार प्रतियोगितामा पुरुषतर्फ सात प्रदेश र तीन विभागीय सहित १० टोली तथा महिलातर्फ पाँच प्रदेश र तीन विभागीयसहित आठ टोलीको सहभागिता रहने छ । महिलातर्फ सुदूरपश्चिम र कर्णाली प्रदेश भने सहभागी नहुने आयोजकले जनाएको छ ।
कुल १८ टिमका एक सय ६२ खेलाडी सहभागी हुने अध्यक्ष पौडेलले जानकारी दिए । प्रतियोगिताको पुरुष विजेता टोलीले नगद रु एक लाख र उपविजेताले रु ५० हजार पुरस्कार प्राप्त गर्ने संघका अन्तरराष्ट्रिय प्रतिनिधि आनन्दकुमार यादवले जानकारी दिए ।
उनका अनुसार महिलातर्फका विजेताले नगद रु ६० हजार र उपविजेताले रु ४० हजार प्राप्त गर्नेछन् । नेपालको पुरानो मौलिक खेल भएर पनि लामो समयसम्म ओझेलमा परेकाले राष्ट्रियस्तरको प्रतियोगिताको आयोजना गरी यसको संरक्षण र प्रवर्द्धन गर्ने उद्देश्य राखिएको यादवले बताए । प्रतियोगिता सम्पन्न गर्न रु ३१ लाख लाग्ने आयोजकले अनुमान गरेको छ ।
