- पूर्वमाओवादी नेताहरू एमाले नेताहरूबाट अपमानित हुनुपरेको गुनासो
- एमाले नेताहरूले माओवादीका बारेमा जथाभावी बोल्दा पीडा हुने भनाइ
- माओवादी नेताहरू रामबहादुर थापा, टोपबहादुर रायमाझी, मणि थापालगायत नेकपा विघटनपछि एमालेमा लागेका थिए
- पूर्वमाओवादीलाई आकर्षित गर्न ओलीले बाँडेका थिए सरकारमा मन्त्री बनाउनेदेखि अनेक लाभका पद
- १०औं महाधिवेशनपछि भने अध्यक्ष ओलीले पूर्वमाओवादीहरूलाई न टाढा न नजिक राखे
- निष्क्रिय बस्दै आएका पूर्वमाओवादी नेता मणि थापाले गत वर्ष पार्टी छाडे
काठमाडौं– नेकपा माओवादी केन्द्रले भन्दै आएको ‘जनयुद्ध’लाई प्रधानमन्त्रीसमेत रहेका एमाले अध्यक्ष केपी शर्मा ओली र उनको दल एमालेका नेताहरूले ‘हिंसा’ भन्दै आएका छन् । १ फागुनमा माओवादीले मनाउने ‘जनयुद्ध दिवस’लाई हिंसा सुरु गरेको दिन भनेर खिल्ली उडाउने गरेका छन् ।
गत संसद्को बर्खे अधिवेशनमा एमाले सचिव योगेशकुमार भट्टराईले जनयुद्धलाई ‘हिंसा’ भनेपछि माओवादी सांसदहरूले संसद् बैठक नै पटक–पटक अवरुद्ध गरेका थिए । उनीहरूले त्यसबेला भट्टराईको अभिव्यक्तिप्रति गम्भीर आपत्ति जनाएका थिए । माओवादी सशस्त्र विद्रोहमा सहभागी तथा पछिल्लो समय एमालेमा रहेका पूर्वमाओवादी नेताहरू भने अस्वाभाविकरूपमा मौन थिए । तर, एमाले सचिव रहेका पूर्वमाओवादी नेता लेखराज भट्टको हालै सार्वजनिक एउटा अडियो सम्बोधन सार्वजनिक भयो । त्यहाँ उनले पूर्वमाओवादी नेताहरू अहंकारी एमाले नेताहरूबाट अपमानित हुनुपरेको बताएका छन् । आफूसमेत सहभागी भएको जनयुद्धलाई हिंसा भन्दा पीडा भएको उनले प्रकट गरेका छन् ।
माओवादीबारे घोचपेच गर्नुहुन्छ । राम्रो लाग्दैन । अध्यक्षले त केही भन्नुभएको छैन । तर, अरु नेताहरूले माओवादीका बारेमा जथाभावी भन्दा मन दुख्छ । पीडा हुन्छ । नभने हुन्थ्यो जस्तो लाग्छ ।
लेखराज भट्ट
सचिव, नेकपा एमाले
अडियोमा उनले एमाले अध्यक्ष केपी शर्मा ओलीको खरो आलोचना गरेका छन् । तर, हिजो माओवादी अध्यक्ष पुष्पकमल दाहालसँग लडेर आएकोमा अहिले ओलीसँग जुध्न भने नसकेको गुनासो गरेका छन् । भट्टको यो अडियो सार्वजनिक भएपछि पूर्वमाओवादी नेताहरू एमालेभित्र उकुसमुकुस भएर बसिरहेको चर्चाले फेरि व्यापकता पाएको हो । कतिपयले त एमालेबाट पूर्वमाओवादी नेताहरू बिस्तारै पलायन हुने अनुमान गर्न थालेका छन् ।
भट्टको उक्त अडियो सम्बोधन यतिबेला भाइरल बनेको छ । उनले आफूले दुई वर्षअघि आफूनिकट पूर्वमाओवादी नेताहरूलाई भनिएको स्वीकारेका छन् । ‘दुई वर्ष पहिला भएको कुराकानी हो । साथीहरू आएर गुनासो गर्नुभयो । मैले जे भएको छ, त्यही कुरा बोलेको छु । कसैले रेकर्ड गरेको रहेछ । त्यतिबेला मैले आज भएन भने भोलि व्यवस्थापन हुन्छ भनेको हुँ,’ उनले प्रभावसँग भने ।
सार्वजनिक भएको अडियोले आफूलाई केही पनि अप्ठेरो नहुने उनले बताए । एमाले पार्टी पनि नछाड्ने उनको भनाइ छ । ‘होइन, मलाई यहीँ ठीक छ । म अहिले पनि पार्टीकै काममा छु । मलाई अडियोले केही असर गरेको छैन र पार्टी छाड्ने कुरा आउँदैन,’ भट्टले भने । तर, अध्यक्ष ओलीबाहेकका नेताहरू माओवादीका बारेमा जथाभावी बोल्दा पीडा हुने गरेको उनले बताए । घोचपेचलेसमेत पीडा हुने उनको भनाइ छ । ‘माओवादीबारे घोचपेच गर्नुहुन्छ । राम्रो लाग्दैन । अध्यक्षले त केही भन्नुभएको छैन,’ उनले भने, ‘तर, अरु नेताहरूले माओवादीका बारेमा जथाभावी भन्दा मन दुख्छ । पीडा हुन्छ । नभने हुन्थ्यो जस्तो लाग्छ ।’
भट्टसहित माओवादी नेताहरू रामबहादुर थापा, टोपबहादुर रायमाझी, मणि थापालगायत नेकपा विघटनपछि एमालेमा लागेका थिए । विघटनपछिका केही महिना पूर्वमाओवादीलाई आकर्षित गर्न ओलीले सरकारमा मन्त्री बनाउनेदेखि अनेक लाभका पद थमाइदिएका थिए । पूर्वजनमुक्ति सेनालाई आकर्षण गर्न पनि उनले अनेक गरे । तर, पार्टीको १०औं महाधिवेशनपछि अध्यक्ष ओलीले पूर्वमाओवादीहरूलाई टाढा न नजिक राखे । अनि, निष्क्रिय बस्दै आएका पूर्वमाओवादी नेता मणि थापाले गत वर्ष पार्टी छाडे । स्थायी कमिटी सदस्य रहेका थापालाई एमालेले पदमुक्त गरिसकेको छ ।
हालै सचिव भट्टले पनि एमाले छाड्ने चर्चा चलेको थियो । उनको गृहजिल्ला कैलालीको गोदावारी नगरपालिकाका ४६ जनाले पार्टी परित्याग गरेको र भट्टले पनि पार्टी परित्याग गर्ने हल्ला थियो । तर, उनले पार्टी नछाड्ने बताइसकेका छन् । त्यस्तो हल्ला भने नियोजित रूपमा माओवादीले चलाएको भन्दै आपत्ति जनाए । यद्यपि, माओवादी जनयुद्धलाई हेर्ने दृष्टिकोणमा पार्टी नेतृत्वसँग आफ्नो मतभेद रहेको उनले स्वीकारे । व्यवस्था परिवर्तनका लागि भएका बलिदान, योद्धालाई होच्याउने काम एमाले नेताबाट भए त्यसको विरोध गर्ने भट्टको भनाइ छ ।
‘एमालेमा माओवादी जनयुद्धलाई हेर्ने दृष्टिकोणमा मतभेद छन् । त्यसमा मैले प्रतिवाद गर्दै आएको छु । जनयुद्धमा मेरो पनि योगदान छ । एमालेको नेतृत्वले जनयुद्धलाई हिंसा भन्दा हामीलाई पनि चित्त दुख्छ । त्यसको प्रतिवाद गर्दै आएको छु,’ उनले भने । पूर्वमाओवादी नेता प्रभु साहले २०७९ को निर्वाचनअघि एमालेसँग विद्रोह गरेर छुट्टै पार्टी गठन गरेका छन् । हाल उनको नेतृत्वमा आम जनता पार्टी नेपाल छ । उनी नेकपा विघटनपछि भट्टसँगै एमालेमा बसेका थिए । तर, आमनिर्वाचनअघि उनले पनि एमालेसँग विद्रोह गरे । स्वतन्त्र रूपमा चुनाव लडे । जितेर संसद् आएपछि उनले दल गठन गरेका हुन् ।
लेखराज भट्टसँगै एमालेमा गएका सरल भाट माओवादीमा फर्केर २०७९ सालमा कञ्चनपुरबाट प्रदेशसभामा प्रत्यक्ष निर्वाचित भए । यतिमात्र होइन, एमालेमा पूर्वमाओवादीहरूलाई टिकट दिने कुरा र भूमिका दिने कुरामा पनि अन्याय भएको अर्का एक पूर्वमाओवादी नेताले बताए ।
