काठमाडौं– नेपाली महिला भलिबल टोलीले भारतविरुद्ध ऐतिहासिक जित हात पारेको छ । त्रिपुरेश्वरस्थित राष्ट्रिय खेलकुद परिषद्को कभर्डहलमा जारी काभा महिला भलिबल नेसन्स लिग प्रतियोगिताअन्तर्गत शनिबार दक्षिण एसियाली ‘जायन्ट’ मानिने भारतमाथि ऐतिहासिक जित निकालेको हो । नेपालले भारतलाई हराएको यो नै पहिलोपटक हो ।
अरुणा शाहीको कप्तानीमा रहेको नेपाली टोलीले पाँच सेटको खेल ३–२ ले आफ्नो पक्षमा पार्यो । दुवै टोलीले दुई–दुई सेट जितेपछि खेल निकै प्रतिस्पर्धात्मक र रोमाञ्चक बनेको थियो । अन्तिम सेट जित्नैपर्ने दबाबकाबीच नेपालले सुरुआतबाटै अग्रता लियो । भारतीय टोलीले कडा चुनौती दिए पनि नेपाललाई पछि पार्न सकेन । खेल जित्न नेपाललाई एक अंकमात्र चाहिएको स्थिति रहँदा भारत एक अंकले मात्र पछि थियो । अन्तिम अंक जोड्दै खेल जिताउनेक्रममा उषा भण्डारीले चलाखीपूर्ण प्रदर्शन गरिन् ।
नेपाली टोलीले जित हातपारेसँगै कभर्डहलमा उपस्थित युवा तथा खेलकुदमन्त्री तेजुलाल चौधरीलगायतका ‘भिआइपी’हरुले लगातार ताली बजाए । र, मन्त्री चौधरी उठेर खेलाडीहरुलाई बधाई दिए ।उपाधिको प्रमुख लक्ष्यसहित श्रीलंकाविरुद्धको पहिलो खेलमा ३–० को सोझो सेटको जितसहित प्रतियोगिताको सुरुआत गरेको नेपालले प्रतियोगिताकै बलियो टिम भारतविरुद्धको ऐतिहासिक जितका लागि एक घण्टा ५५ मिनेट ४३ सेकेन्डको समय खेल्नुपरेको थियो ।
२५–१८ ले जित्यो । दोस्रो सेटमा भारतले पुनरागमन गर्दै नेपाललाई फराकिलो अन्तर २५–१२ ले सेट आफ्नो पक्षमा पार्यो । दोस्रो सेट गुमाएको नेपाल तेस्रो सेटमा पुनः फर्कियो । तेस्रो सेटमा नेपालले भारतलाई २५–१७ ले हराउँदै दबाब दियो । लगातार दोस्रो सेट जित्दै ऐतिहासिक जितको खोजीमा रहेको नेपालले चौथो सेटमा भने केही लय गुमाउँदै १८–२५ अन्तरले भारतलाई सुम्पियो ।त्यसपछि निर्णायक रहेको अन्तिम सेटमा नेपालले भारतविरुद्ध १५–१३ ले जित हात पार्दै नेपालको इतिहासमा अहिलेसम्मकै सबैभन्दा ठूलो नतिजा हात पार्न सफल भयो । नेपालको उक्त ऐतिहासिक जितले कर्भडहलमा उपस्थित दर्शक र आमनेपालीलाई खुसी दिलाएको छ ।
नेपाल र भारतबीचको यस खेल हेर्न खेलकुदमन्त्री, राखेप सदस्यसचिवलगायतका खेलप्रेमी कभर्डहल पुगेका थिए । भारतविरुद्धको अन्तिम अंकको प्रत्यक्ष साक्षी बनेका भलिबलप्रेमीहरुका आँखा रसाएका थिए । पूर्वमन्त्रीसमेत रहेकी रामकुमारी झाँक्रीसमेत उपस्थित रहेको कभर्डहलमा नेपालको जितसँगै खेलाडीहरुसमेतको आँखा हर्षका आँशुले भरिएको थियो ।
यस जितसँगै कप्तान शाहीले अहिले नै आफ्नो लक्ष्य पूरा नभएको जनाउँदै इरानविरुद्धको जित हात पार्दै शीर्षस्थानमा रहेर सेमिफाइनल प्रवेश गर्नुपर्ने बताइन् । यसअघि नेपाल र भारतबीचको महिला भलिबलमा सबैभन्दा उत्कृष्ट प्रदर्शन २०१९ को दक्षिण एसियाली खेलकुद (साग) को फाइनल दशरथ रंगशालामा थियो । उक्त खेलमा नेपाल ३–२ सेटले हार्दै स्वर्ण जित्नबाट चुकेको थियो ।
जारी प्रतियोगितामा नेपालसहित भारत, श्रीलंका, माल्दिभ्स र इरानको सहभागिता छ । शीर्ष चार टोलीले सेमिफाइनल खेल्ने छन् । उक्त प्रतियोगिताअन्तर्गत आज (आइतबार) नेपालले अर्को बलियो टिम इरानसँग खेल्ने छ भने अर्को खेलमा श्रीलंका र माल्दिभ्स भिड्ने छन् ।
-1762839922.jpg)
