काठमाडौं- हिमाली बौद्ध परम्परा तथा बौद्ध दर्शनसम्बन्धी पाँचदिने प्रशिक्षण कार्यक्रम हुने भएको छ । बौद्धनाथ क्षेत्र विकास समितिको आयोजनामा आगामी जेठ १ देखि ५ गतेसम्म बौद्धमा प्रशिक्षण कार्यक्रम तय भएको हो । कार्यक्रमको संयोजन बौद्ध जागरण केन्द्रले गर्ने भएको छ ।
कार्यक्रममा एक दर्जन कार्यपत्र प्रस्तुत हुने समितिका अध्यक्ष राजकुमार लामाले जानकारी दिए । उनका अनुसार खेन्पो ञिमा दोन्डुबबाट झ्याङतेर ञिङमाको उत्पत्ति, विशेषता र महत्त्व, खेन्पो शिर लामा गुरुङबाट भार्दो थोडोलको प्रकार र महत्त्व, खेन रिन्पोछे ग्युर्मे छुल्ठिमबाट रिग्जिन ज्याछोन ञिङपो उत्पत्ति, विशेषता र महत्त्व, छ्योजे लामा फुन्छोक रिन्पोछेबाट फोवाको अर्थ र यसको आवश्यकता, लोसाङ नाम्ग्याल रिन्पोछेबाट बौद्ध धर्ममा अभिषेक, आगम र व्याख्या, खेन्पो सर्वजित गोङबा तामाङबाट नेलुङ, घेवा, सिठो, छाछाको अर्थ तथा महत्त्वबारे कार्यपत्र प्रस्तुत हुने छन् । यसैगरी खेन्पो कर्म गेन्दुनबाट मृत्यु संस्कारमा च्योइ साधना, गेसे लोब्साङ धावाबाट चार आर्य सत्य प्रतीत्यसमुत्पाद, गेसे थुप्तेन जिगडोलबाट चार परम्परा एवं गुम्बा व्यवस्थापनको अवस्था र महत्त्व, आचार्य नोर्बु शेर्पाबाट नेपालमा बौद्ध धर्म : विगत, वर्तमान र भविष्य शीर्षकमा कार्यपत्र प्रस्तुत हुने उनले बताए ।
कार्यक्रममा बौद्ध बाहुल्य जिल्लाका ५०० भन्दा बढी लामा गुरु तथा धर्मावलम्बीहरुको सहभागिता रहने अध्यक्ष लामाको भनाइ छ । 'चारवटै परम्पराका लामा गुरुहरूसँग सरसल्लाह गरेर कार्यक्रमलाई सफल बनाउन लागिपरेका छौं,' उनले भने ।
बौद्ध जागरण केन्द्रका महासचिव आले लामाले कार्यक्रममा सहभागी हुन यही वैशाख २० गतेसम्म नाम दर्ता गर्नुपर्ने बताए । केन्द्रका कोषाध्यक्ष रेञ्जेन लामाले बौद्धमा हुने कार्यक्रममा सहभागीहरूलाई पाँच दिनसम्म खाना र बासकोसमेत व्यवस्था गरिने जानकारी दिए ।
 copy1705724550.jpg)
