भूकम्पलगत्तै नजिकका सुुरक्षा निकाय र स्थानीय सरकारहरूलाई परिचालन गर्यौं । प्रदेश राजधानीबाट पनि उद्धार कार्यका लागि चिकित्सकसहितको थप जनशक्ति परिचालित छ । शनिबार बिहान उज्यालो भएदेखि नै हवाई माध्यमबाट समेत उद्धार टोली परिचालित छ । पहिलो उडानबाट तीन जना घाइतेको उद्धार भयो । अन्य घाइतेहरूको पनि उद्धार गरेर अस्पताल पुर्याइसकेका छौं । काठमाडौंमा सात जना गम्भीर घाइतेहरूलाई थप उपचारका लागि पठायौं ।
शनिबार बिहानै प्रदेश विपद् व्यवस्थापन समितिको बैठक बसेर उद्धारका लागि सबै संयन्त्र परिचालन गर्ने र आवश्यक साधन स्रोतदेखि जनशक्तिहरू घटनास्थलमा परिचालित गर्ने निर्णय गरेर सोहीअनुसार भइरहेको छ । हामीले उद्धार र उपचारमा कुनै कमी नगर्ने प्रयास गरिरहेका छौं । एउटाचाहिँ दुर्गम क्षेत्रमा जान समस्या भएको छ । त्यसका लागि हवाई माध्यमबाट जानुपर्ने भएको छ ।
घाइतेहरू अस्पतालमा खचाखच रहेको र उपचार गर्न समस्या भएको विवरणहरू पनि आए । त्यस्तो त होइन । शनिबार बिहानैदेखि नेपाली सेनाको एउटा टोली रुकुम पश्चिमको आठबिसकोठ नगरपालिकामा घाइतेहरूको उपचार गरिरहेको छ । जाजरकोटमा पनि नेपाली सेनाको चार जनाको टोली सक्रिय छ । स्काई ट्रकमार्फत् काठमाडौंदेखि आएको नेपाली सेनाको अर्को चिकित्सकको टोलीले उपचार गरिरहेको छ ।
स्वास्थ्य तथा जनसंख्या मन्त्रालयले पठाएको अर्को चिकित्सकहरूको टोली पनि उपचारमै छ । सुदूरपश्चिम सरकार र लुम्बिनी सरकारले पनि चिकित्सकहरू पठाएका छन् । सशस्त्र प्रहरीका चिकित्सकहरू पनि आइपुगेका छन् । स्थानीय स्वास्थ्य संस्थाका स्वास्थ्यकर्मीहरू सबै जुटेका छन् । त्यसले गर्दा उपचारमा समस्या छैन ।
(मन्त्री जिसीसँग प्रभावले गरेको टेलिफोन कुराकानीमा आधारित)
