काठमाडौं- भूकम्प प्रभावित क्षेत्र जाजरकोट र रुकुम पश्चिममा उद्धार कार्यको नेतृत्व गरेका प्रधानमन्त्री पुष्पकमल दाहालले आज (आइतबार)देखि राहत र पुनःस्थापनाको काम गरिने बताएका छन् । त्यसका लागि आज बिहान ८ बजे मन्त्रिपरिषद् र विपद् व्यस्थापन समितिको बैठक बोलाइएको बताए ।
‘मन्त्रिपरिषद् बैठक बोलाइसकेको छु । त्यसपछि विपद् व्यवस्थापनको बैठक बसेर राहत र पुनःस्थानाको काममा लाग्छौं,’ शनिबार भूूकम्पप्रभावित क्षेत्रबाट फर्केपछि प्रधानमन्त्री दाहालले भने ।शनिबार बिहानै उनी नेपाली सेनाका चिकित्सकहरू लिएर जाजरकोट र रुकुम पश्चिम गएका थिए ।
घण्टौंसम्म त्यहीँ बसेर उद्धारको कामलाई प्रभावकारी बनाउन संयोजनसमेत गरे । उनले भूकम्पीय घटनामा परी ज्यान गुमाएकाहरूप्रति दुःख व्यक्त गरेका छन् । भूकम्पपीडितलाई राहत, पुनःस्थापना र घाइतेको उपचारमा सरकार गम्भीर रहेको उनले बताए । भूकम्पपीडितसमक्ष उनले राज्य साथमा रहेको भन्दै नआत्तिन आग्रह गरेका थिए ।
जुट्दै सहयोगी हात
विनासकारी भूूकम्पले कर्णाली प्रदेशको दुई जिल्ला जाजरकोट र रुकुम पश्चिममा जनधनको ठूलो क्षति पु¥याउँदा सरकारी तथा निजी संस्थाहरूले हातेमालो गरेका छन् । संघीय सरकारले दुवै जिल्लामा तत्कालका लागि उद्धार र राहतका लागि पाँच÷पाँच करोड रुपैयाँ सहायता पठाउने भएको छ । बागमती प्रदेश सरकारले एक करोड ५० लाख र सुदूरपश्चिम प्रदेश सरकारले एक करोड रुपैयाँ सहायता प्रदान गर्ने घोषणा गरेको छ ।
लुुम्बिनी प्रदेश सरकारले पनि डेढ करोड रुपैयाँ सहयोग गर्ने प्रदेशका आर्थिक मामिला तथा योजनामन्त्री धनबहादुुर मास्कीले जानकारी दिए । कोशी प्रदेश सरकारले तत्कालका लागि भूूकम्पपीडितलाई एक करोड रुपैयाँसहित राहत सामग्री पठाउने भएको छ । प्रदेशका मुख्यमन्त्री केदार कार्कीले प्रदेश विपद् व्यवस्थापन कोषमा जम्मा हुनेगरी उक्त सहायता रकम पठाइने बताए ।
गण्डकी प्रदेश सरकारले भूकम्पबाट प्रभावित क्षेत्रमा स्वास्थ्य सामग्रीसहितको चिकित्सक र स्वास्थ्यकर्कीको टोली पठाएको छ । मुख्यमन्त्री सुरेन्द्रराज पाण्डेले शनिबार एक अपिल जारी गरी प्रभावित क्षेत्रमा मानवीय सहायता पु¥याउने उद्देश्यले चिकित्सकसहितको टोली त्यसतर्फ पठाइएको जानकारी दिए । सरकारले प्रदेश सरकार मातहतको संक्रामक तथा सरुवा रोग अस्पतालका प्रमुख डा. विकास गौचनको नेतृत्वमा मेडिकल, हाडजोर्नी र एनेस्थिसियाको विशेषज्ञ चिकित्सक र स्वास्थ्यकर्कीका साथै उपचार सामग्री भूकम्प प्रभावित क्षेत्र जाजरकोट र रुकुम पश्चिममा पठाएको हो ।
सत्तारूढ दल नेपाली कांग्रेसले भूकम्पपीडितका लागि ५० लाख रुपैयाँ आर्थिक सहायता दिने भएको छ । स्वदेश तथा विदेशमा रहेका नेपालीहरूलाई पनि सहायताका लागि कांग्रेसले अपिल गरेको छ । नेत्रविक्रम चन्द नेतृत्वको दलले पनि भूकम्पपीडितहरूलाई एक लाख रुपैयाँ दिने भएको छ । यता नेपाल आयल निगमले उद्धारमा खटिने नेपाल एयरलाइन्सको विमान तथा सेनाको हेलिकप्टरका लागि निःशुल्क इन्धनको व्यवस्था गरेको छ । निगमले सामाजिक उत्तरदायित्व कोषबाट हवाई इन्धन सहयोग गर्ने जनाएको छ ।
‘रुकुम पश्चिम र जाजरकोटमा उडान भर्नका लागि चौरजहारीमा एयरपोर्ट छ । त्यहाँ ट्विनअटर मात्रै जान सक्ने हुँदा नेपाल एयरलायन्सको ट्विनअटरका लागि निःशुल्क इन्धन उपलब्ध गराउने भएका हौं,’ निगम प्रवक्ता मनोज ठाकुरले भने, ‘उद्धारका लागि होलिकप्टर जहाँ पनि जानसक्छ, त्यसको इन्धन खर्च निगमले व्यहोर्छ ।’
भूकम्पप्रभावित जाजरकोट, रुकुम पश्चिम र पूर्वमा नेपाल टेलिकमले पाँच दिनसम्म निःशुल्क फोन र मेसेज सेवाको व्यवस्था गरेको छ । सूचना आदानप्रदानलाई निरन्तरता दिन यस्तो सेवा घोषणा गरेको टेलिकमले जनाएको छ ।काठमाडौं मेडिकल कलेजले भूकम्पका कारण घाइते भएकाहरूको उपचार निःशुल्क गर्ने भएको छ । कलेजले शनिबार यस्तो घोषणा गरेको हो ।
राष्ट्रिय सभाका अध्यक्ष गणेशप्रसाद तिमिल्सिनाले एक महिना बराबरको तलब भूकम्पपीडितलाई दिने भएका छन् । लुुम्बिनी प्रदेश सरकारले भूकम्पप्रभावित जिल्लाहरूमा घाइतेहरूको उपचारका लागि राप्ती प्रादेशिक अस्पताल तुलसीपुरका मेडिकल सुपरिटेन्डेन्ट डा. पदमराज अधिकारीको नेतृत्वमा स्वास्थ्यकर्मी र स्वास्थ्यकर्मी पनि पठाएको छ ।
कांग्रेसको विद्यार्थी संगठन नेपाल विद्यार्थी संघले पनि भूकम्पपीडितका लागि प्रत्येक केन्द्रीय सदस्यबाट एक हजार रुपैयाँ रकम उठाउने भएको छ । घाइतेहरूको उपचारमा रगत अभाव हुने भएपछि नेपालगञ्जका युवाहरूले स्वतःस्फूर्त रक्तदान गरेका छन् । राष्ट्रिय स्वतन्त्र पार्टीले पार्टीमा आबद्ध भएका डाक्टरहरूको दुुईवटा टोली जाजरकोट र रुकुम पश्चिम पठाएको जानकारी दिएको छ ।
सरकारले काठमाडौंदेखि जाजरकोट र रुकुम पश्चिम निःशुल्क जान चारवटा बसको व्यवस्था गरेको छ । स्वास्थ्य तथा जनसंख्यामन्त्री मोहनबहादुर बस्नेतका अनुसार काठमाडौं उपत्यकामा रहेका भूूकम्पप्रभावित क्षेत्रका जनतालाई घर जान सहायता होस् भनेर निःशुल्क बसको व्यवस्था गरिएको हो ।
मित्रराष्ट्रको साथ
कर्णाली प्रदेशको जाजरकोट र रुकुम पश्चिम भूूकम्पीय घटनाले शोकाकुल छँदा मित्रराष्ट्रहरूले सहयोग गर्ने जनाएका छन् । भारतीय प्रधानमन्त्री नरेन्द्र मोदीले दुःखको यस घडीमा आफ्नो देश नेपालको साथमा रहेको र आवश्यक सबै सहायता उपलब्ध गराउने बताए । सामाजिक सञ्जाल ‘एक्स’मार्फत उनले घटनाप्रति दुःख व्यक्त गर्दै घाइतेहरूको स्वास्थ्य लाभको कामना पनि गरेका छन् । २०७२ सालको विनासकारी भूकम्पका बेला पनि भारतले नेपाललाई सहायता उपलब्ध गराएको थियो ।
अर्को उत्तरी मित्रराष्ट्र चीनका राजदूत छन् सङले पनि भूूकम्पपीडित नेपालीको साथमा रहेको बताएका छन् । काठमाडौंस्थित अमेरिकी राजदूतावासले भूकम्पमा परी ज्यान गुमाएकाहरूप्रति दुःख व्यक्त गर्दै क्षतिपछिको पुनर्लाभ हासिल गर्न नेपाललाई आवश्यक सहयोग गर्न तयार रहेको जनाएको छ ।
चीनले १० करोडको सहायता सामग्री उपलब्ध गराउने
चीनले जाजरकोट भूकम्पपीडितका लागि १० करोड रुपैयाँ बराबरको सहायता सामग्री उपलब्ध गराउने घोषणा गरेको छ । नेपालका लागि चीनका राजदूत छन सङले सामाजिक सञ्जाल एक्समा उक्त रकम बराबरका आपत्कालीन सहायता सामग्री प्रदान गर्ने घोषणा गरेका हुन् ।त्रिपाल, कम्बललगायत राहत सामग्री चीनबाट नेपालतर्फ पठाइएको र केही दिनभित्रै ती सामग्री नेपाल सरकारमार्फत पीडितलाई प्रदान गरिने जनाइएको छ ।
रुसी राष्ट्रपतिद्वारा दुःख व्यक्त
रुसका राष्ट्रपति भ्लादिमिर पुटिनले नेपालको जाजरकोट भूकम्पबाट भएको धनजनको क्षतिप्रति दुःख व्यक्त गरेका छन् । आफ्ना नेपाली समकक्षी राष्ट्रपति रामचन्द्र पौडेललाई शनिबार शोक सन्देश पठाउँदै प्राकृतिक विपत्तिको यस दुखद् घटनाबाट पीडित नेपालीप्रति गहिरो समवेदना प्रकट गरेका राष्ट्रपतिको कार्यालयले जनाएको छ । सन्देशमा राष्ट्रपति पुटिनले नेपाली जनताप्रति ऐक्यबद्धता प्रकट गर्दै घाइतेको शीघ्र स्वास्थ्यलाभको कामना गरेका छन् ।
