- यसपटक पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले पनि तीज गीतमा कम्मर मर्काएका छन्
- ‘सोचेझैं जिन्दगी रैनछ’ गीतमा वामदेव गौतम नाच्दा कतिपयले उनकै जीवनसँग मेल खाएको टिप्पणी गरेका छन्
- अघिल्लो तीजमा मन्त्री रहेकी एकीकृत समाजवादीकी नेतृ रामकुमारी झाँक्री गुल्मीको पुर्कोट म्यालपोखरी पुगेर तीजको कार्यक्रममा छमछमी नाचिन्
काठमाडौं– हरितालिका तीज हिन्दू नेपाली महिलाहरुको विशेष पर्व हो । संस्कृत भाषाका ‘हरित’ र ‘आलिका’ दुईवटा शब्द मिलेर हरितालिका शब्द बनेको छ । जसमा ‘हरित’ शब्दको अर्थ हरण गरिएको र ‘आलिका’ शब्दको अर्थ साथी भन्ने हुन्छ । सत्ययुगमा भाद्र शुक्ल तृतीयाको दिन निराहार व्रत बसी पार्वतीले श्रीमहादेव स्वामी पाएकीले यस दिनमा व्रत बस्दा मनोकामना पूरा हुने विश्वास छ ।
नारीको विशेष पर्वका रुपमा लिइए पनि यस पर्वलाई पुरुषहरुले पनि रमाइलो पर्वका रुपमा हेर्न थालेका छन् । अझ नेताहरु आफैं नै मञ्चमा बुरुकबुरुक नाच्ने गरेको हामीले देख्दै आएका छौं । यसपटक पूर्वप्रधानमन्त्री तथा नेकपा एमालेका अध्यक्ष केपी शर्मा ओली पनि तीज गीतमा कम्मर मर्काएर नाचेका छन् । अखिल नेपाल महिला संघ बालकोटले आयोजना गरेको तीज विशेष कार्यक्रममा ओलीले कम्मर मर्काएका हुन् । हुन त एमाले अध्यक्ष ओली यसपालामात्र हैन अघिल्लो तीजमा पनि पार्टीकै गीतमा छमछमी नाचेका थिए ।
रसिक मानिने नेता ओलीलाई उछिन्दै यसपाला राष्ट्रिय सभाका सदस्य वामदेव गौतम पनि छमछमी नाचेका छन् । राजनीतिक वृत्तमा खासै चर्चामा नरहेका गौतम तीजका दिन भने नाचका कारण चर्चामा छाएका छन् ।
२०७७ को अन्तिमतिर नेकपा (एमाले र माओवादी मिलेर बनेको पार्टी) विभाजन हुन लाग्दा पार्टी एकता महाअभियान बोकेर अघि बढेका थिए उनी । तर उनको प्रयास सफल हुन सकेन । त्यसपछि नेकपा एकता राष्ट्रिय अभियान सुरु गरेका थिए । उनलाई यो अभियानबाट युवराज सफलले हटाइदिए ।
उनै गौतम ‘सोचेझैं रैनछ जिन्दगी’ बोलको तीज गीतमा छमछमी नाचेको भिडियो अहिले सामाजिक सञ्जालमा छाएको छ । वामदेवले आफ्नै घरमा पत्नी र चेलीबेटीहरूसँग नाचेको गीत कतिपयले उनकै जीवनसँग मेल खाएको बताएका छन् ।
अघिल्लो तीजमा मन्त्री रहेकी एकीकृत समाजवादीकी नेतृ रामकुमारी झाँक्री गुल्मीको पुर्कोट म्यालपोखरी पुगेर तीजको कार्यक्रममा छमछमी नाचेकी थिइन् ।
पशुपतिमा पाँच लाख दर्शनार्थी
हिन्दू नारीहरुको महान् पर्व तीजका अवसरमा पशुपतिनाथ मन्दिरमा करिब पाँच लाख दर्शनार्थीले दर्शन, एवं पूजा आराधना गरेका छन् । बेलुकी ७ बजेसम्म करिब पाँच लाख भक्तजनले पशुपतिनाथ मन्दिरमा दर्शन गरेको कोषका कार्यकारी निर्देशक डा. घनश्याम खतिवडाले जानकारी दिए । पशुपति क्षेत्रमै आउने भक्तजन भने अझै बढी थिए । आएका धेरै भक्तजनले भने लाम बस्नुपर्ने भएकाले मूल मन्दिरभित्र प्रवेश नगरी परिसरबाटै गजुरको दर्शन गरेर फर्किएका छन् ।
बेलुकी आरती चलिरहेका बेला पनि पशुपति क्षेत्रमा भक्तजनको उत्तिकै भीड रहेको उनले सुनाए । भाद्र शुक्ल तृतीयका दिनमा सोमबार देवादिदेव महादेवको पूजा आराधना गरी महिलाले हरितालिका (तीज) पर्व मनाएका हुन् ।
पर्वका अवसरमा सोमबार पशुपतिनाथ मन्दिरमा बिहानैदेखि भक्तजनको भीड लागेको थियो । पशुपतिनाथ मन्दिरमा यस वर्ष विगतभन्दा सहजरूपमा दर्शन गर्न पाइएको भक्तजनले बताएका छन् । पन्ध्र वर्षपछि पशुपतिनाथको पूर्वी ढोका खोलेपछि भक्तजनलाई दर्शनमा सहज भएको पशुपति क्षेत्र विकास कोषले जनाएको छ ।
राजधानीको उत्तरपूर्वी भेगका गोकर्णेश्वर र नागेश्वर मन्दिर, भक्तपुरको डोलेश्वर, ललितपुरको सन्तानेश्वरलगायत काठमाडौं उपत्यका र देशभरका शिवालयमा बिहानैदेखि भक्तजनको भीड लागेको थियो । भाद्र शुक्ल तृतीयामा व्रत बसी शिव पार्वतीको पूजा, उपासना गरेमा सुख, शान्ति र कल्याण प्राप्ति हुने धार्मिक विश्वास छ । सत्ययुगमा हिमालय पुत्री पार्वतीले गौरीघाटमा बसी तपस्या गरेर श्री महादेव पति पाउने वरदान पाएकी थिइन् । तर पिता हिमालयले पार्वतीको इच्छाविपरीत विष्णुसित विवाह गरिदिन खोजेपछि साथीहरूलाई आफ्नो समस्या सुनाइन् ।
पार्वती समस्यामा परेको थाहा पाएपछि उनका साथीहरूले हरण गरेर लगी कसैले नदेख्ने ठाउँमा लुकाएर राखिदिए । साथीहरूले लुकाएकै ठाउँमा पार्वतीले निराहार व्रत गरी महादेवलाई पतिका रूपमा प्राप्त गरिन् । यसरी पार्वती साथीहरूद्वारा हरण भएको दिन भाद्र शुक्ल तृतीयाको दिन भएकाले त्यही समयदेखि हरितालिका (तीज) को व्रत लिने प्रचलन सुरु भएको धर्मशास्त्रीय मत छ ।
समग्रमा मनोकामना पूर्ण गराउने र सम्पूर्ण परिवारको कल्याणका लागि यो व्रतको प्रयोजन रहेकोे धर्मशास्त्रीहरूको मत छ । आत्मावादी र ईश्वरवादी दुवैले यो व्रत लिने गरेका छन् । समग्रमा परिवारको यस लोकमा सुख, शान्ति र पारलौकिक सद्गतिका लागि तीजको व्रतको महŒव छ ।
आइतबार राति दर खाएपछि औपचारिकरूपमा सुरु भएको तीज पर्व ऋषि पञ्चमीसम्म मनाइन्छ । तृतीयाका दिन हरितालिका व्रत, चौथीका दिन गणेश भगवान्को पूजा र पञ्चमीका दिन स्नान गरी अरुन्धतीसहित सप्तऋषिको पूजा गरी तीज समापन हुन्छ । यस वर्ष चौथी र पञ्चमी एकैदिन परेकाले दुवै पर्व आज (मंगलबार) नै मनाइने नेपाल पञ्चांग निर्णायक विकास समितिले जनाएको छ ।
