- नेपाल प्रहरीको केन्द्रीय अनुसन्धान ब्युरो (सिआइबी)ले भदौ २७ गते ५० जनालाई प्रतिवादी बनाउन रायसहित प्रतिवेदन बुझाएको थियो
- अनुसन्धानका क्रममा अहिलेसम्म गिरोहले विभिन्न सातवटा कम्पनीबाट ३६२ किलोभन्दा बढी सुन तस्करी गरेको खुलेको दाबी
- मुद्दामा तीन अर्ब ५० करोड ३० लाख ९१ हजार बिगो दाबी
काठमाडौं– सय किलो भनिए पनि गालेर जोख्दा ६० किलो ७१६ ग्राममात्र भएको सुन तस्करी प्रकरणमा २९ जनाविरुद्ध मुद्दा दायर भएको छ । आइतबार जिल्ला सरकारी वकिलको कार्यालयले २९ जनाविरुद्ध जिल्ला अदालत काठमाडौंमा मुद्दा दायर गरेको हो ।
नेपाल प्रहरीको केन्द्रीय अनुसन्धान ब्युरो (सिआइबी)ले भदौ २७ गते ५० जनालाई प्रतिवादी बनाउन रायसहित प्रतिवेदन बुझाएको थियो । सोही प्रतिवेदनअनुुसार मुद्दा दायर गरिएको जिल्ला अदालत काठमाडौंका श्रेस्तेदार कौशलेश्वर ज्ञवालीले जानकारी दिए ।
अभियोगपत्रमा २९ जनालाई प्रतिवादी बनाउन माग गरिएको छ । मुद्दामा तीन अर्ब ५० करोड ३० लाख ९१ हजार रुपैयाँ बिगो दाबी गरिएको छ । सिआइबीले उनीहरुमाथि विभिन्न सातवटा कसूर लगाउन सिफारिस गरेको थियो । उक्त प्रकरणका आरोपीमाथि हालसम्म भन्सार ऐन, संगठित अपराध, नेपाल राष्ट्र बैंक ऐन, अपराधसंहिता, नेपाल नागरिकता ऐन, राहदानी ऐन र अध्यागमन ऐनअनुसार कारबाहीका लागि सिफारिस गर्ने गरी अनुसन्धान प्रतिवेदन तयार पारिएको सिआइबी प्रमुख तथा प्रहरी अतिरिक्त महानिरीक्षक किरण बज्राचार्यले पत्रकार सम्मेलनमार्फत बताएकी थिइन् ।
अनुसन्धानका क्रममा अहिलेसम्म गिरोहले विभिन्न सातवटा कम्पनीबाट ३६२ किलो (३०२ र ६० किलो) भन्दा बढी सुन तस्करी गरेको खुलेको दाबी सिआइबीको छ । सोही मूल्य बराबरको सुन तस्करी भएकाले सो रकमलाई बिगो कायम गरी मुद्दा अघि बढाउन पनि राय दिइएको थियो सिआइबीले । उक्त घटनामा आइतबारसम्म ३२ जना पक्राउ परेका छन् । त्यसमध्ये १८ जना फरार छन् ।
राजस्व अनुसन्धान विभागले साउन २ गते साँझ त्रिभुवन अन्तर्राष्ट्रिय विमानस्थल बाहिरिएको अवस्थामा सुन बरामद गरेको थियो । विभागले आवश्यक अनुसन्धान सकेर १८ दिनपछि सुन प्रकरणको अनुसन्धानको जिम्मा सिआइबीलाई दिएको थियो । ब्रेक सुसहितको सुन १५५ किलो भएको पाइए पनि गाल्दा ६० किलो ७१६ ग्राम पुगेको थियो । उक्त सुन अहिले नेपाल राष्ट्र बैंकको संरक्षणमा रहेको छ ।
चीन, भारत र बेल्जियमका नागरिक पनि प्रतिवादी
सरकारी वकिल कार्यालय यो प्रकरणमा २९ जनालाई प्रतिवादी किटान गरेको छ । प्रतिवादीमध्ये तीन जना फरार रहेका छन् । जसमध्ये ठमेलमा रहेको होटेल भियनाकी सञ्चालक अमला रोका, बाराको कलैयाका भोला साह सोनार र बर्दियाका जीवन चलाउने छन् । अमला सुन प्रकरणमा पक्राउ परेका बेल्जियम नागरिक दावा छिरिङकी श्रीमती हुन् ।
हङकङ हुँदै भित्रिएको सुन प्रकरणमा छ जना प्रतिवादी चिनियाँ नागरिक छन् । एलेक्स भन्ने याओ पुचेङ, रोजर वा स्टेप्स भन्ने लि नेङकाइ, साउतेन भन्ने डिङ सेङ फा, लिन चछ्याङ, होटल भियाना बस्ने याङ वेन र एममी सियन प्रतिवादी रहेका छन् । त्यसैगरी ताइवान स्थायी ठेगाना भएका अली भन्ने लि वेन सुङ, भारत स्थायी ठेगाना भई हाल काठमाडौं बस्ने ५३ वर्षीय टासी भन्ने थुप्तिन छिरिङ, बेल्जियम स्थायी ठेगाना भई कामनपा २६ कपुरधारामा बस्ने ४० वर्षीय दावा छिरिङ रहेका छन् ।
प्रतिवादी बनाइएका नेपालीमा भोजपुर अरुण गाउँपालिका वडा नम्बर ४ चरम्बीगाउँका ४९ वर्षीय हर्कराज राई, भोजपुरका ५५ वर्षीय कृष्णकुमार श्रेष्ठ, डडेलधुरा अजयमेरु गाउँपालिकाका ४९ वर्षीय पुष्करराज भट्ट, खोटाङ जन्तेढुङगा गाउपालिका ४ का ४६ वर्षीय राजेन्द्रकुमार राई, सिन्धुपाल्चोक बलेफी गाउँपालिका ७ खाडीचौर का ३५ वर्षीय यादव पराजुली छन् ।
त्यसैगरी चितवन रत्ननगर नगरपालिका १२, चितवनका ३८ वर्षीय सुदर्शन गौतम, दोलखा मेलुङ गाउँपालिका वडा नम्बर ३, घ्याङसुकाठोकरका रामकुमार भुजेल, मेलुङ गाउँपालिका वडा १ का दीलिप भुजेल, गुल्मी चन्दकोट गाउँपालिका ६ का ३४ वर्षीय सुमन खरेल, बारा कलैया उपमहानगरपालिका वडा नम्बर ४ का ४५ वर्षीय शिवकुमार सरार्फ, दोलखा भिमेश्वर नगरपालिका वडा नम्बर ११ का ४५ वर्षीय किशोर बस्नेत छन् ।
त्यसैगरी कैलाली धनगढी उपमहानगरपालिका वडा नम्बर ८ क्याम्पस रोडका ३४ वर्षीय सन्तोष चन्द, भन्सार अधिकृत ५६ वर्षीय गणेशप्रसाद पौडेल, नायब सुब्बा ३३ वर्षीय वीरेन्द्र नेपाली छन् । त्यसैगरी भन्सार खरिदार ५७ वर्षीय कुमार ढकाल, भन्सार कार्यालयमा टेलिफोन अपरेटर पदमा कार्यरत ५० वर्षीय सरोज श्रेष्ठ रहेका छन् ।
रुक्मिनाविरुद्ध पनि मुद्दा
भन्सार एजेन्ट रुक्मिना सुब्बाविरुद्ध पनि मुद्दा दायर भएको छ । मानवीय कारण ‘जिम्मा जमानी’मा रिहा भएकी उनीविरुद्ध पनि मुद्दा दायर भएको हो । उनी क्यान्सरबाट पीडित भएको हुनाले बोलाएको बेलामा हाजिर गराउने सर्तमा परिवारको जमानीमा रिहा गरिएको थियो । घाँटीको क्यान्सरबाट पीडित रुक्मिनालाई उपचारका लागि साउन १९ गते रिहा गरिएको थियो ।
