- व्यवसायी दुर्गा प्रसाईंसँगको ‘डिल’ बाहिरिएपछि श्रेष्ठलाई रास्वपाले गत चैत २६ गते पदबाट निलम्बन गरेको थियो
- त्यतिबेला पदबाट जोगाइदिन र उक्त अडियो आफ्नो नभएको बताएका श्रेष्ठले अहिले पार्टीले तीन करोड मागेको खुलासा गरेका छन्
- श्रेष्ठले रवि लामिछानेको ‘कोर टिम’का मोहनजंग थापामार्फत पटक–पटक पैसा मागेकोसमेत आरोप लगाएका छन्
काठमाडौं– मन्त्री बन्न दुई करोड रुपैयाँको ‘डिल’ गरेको आरोप लागेपछि सांसद पद गुमाएका डा. ढाकाकुमार श्रेष्ठ पुनः चर्चामा छन् । राष्ट्रिय स्वतन्त्र पार्टी (रास्वपा)ले समानुपातितर्फ सांसद बनाएको श्रेष्ठले पुष्पकमल दाहाल नेतृत्वको सरकारमा जान पार्टीले आफूसँग उक्त रकम मागेको बताएका थिए । त्यतिबेला पार्टी सभापति रवि लामिछाने रास्वपाको नेतृत्व गर्दै सरकारमा सहभागी भएका थिए ।
व्यवसायी दुर्गा प्रसाईंसँगको डिल बाहिरिएपछि श्रेष्ठलाई रास्वपाले गत चैत २६ गते पदबाट निलम्बित गरेको थियो । पद जोगाउन उनी सर्वोच्च अदालतसमेत पुगेका थिए । सर्वोच्चले केही समयका लागि उनको पद जोगाए पनि वैशाख १२ गते उनको पद गएको प्रतिनिधिसभामा सुनाइयो ।
त्यतिबेला स्वास्थ्य मन्त्रालय पाउने भएकोले आफूलाई पार्टीले पैसा मागेका कारण साथ दिन श्रेष्ठले प्रसाईंसँग गुहारेको अडियो सार्वजनिक भएको थियो । ‘स्वास्थ्य हामीले पाउने भयो, पार्टीलाई सहयोग गर, साढे दुईजति चाहियो भन्दै थिए । मेरो पक्का भयो, मैले आज फिक्स्ड गर्नु छ क्या सर ! मन्त्री पनि बन्नुप¥यो, धोइपखाली गरेर स्वास्थ्य क्षेत्र पूरा सफा पनि गर्नु छ । मैले धेरै गर्छु भनेर सोचेको छु, त्यसमा हजुरहरूको सहयोग पनि चाहियो,’ श्रेष्ठले अडियोमा भनेका छन् ।
सुरुदेखि नै रास्वपा सभापति लामिछानेलाई सहयोग गर्दै आएको कोर टिमले रकम मागेको श्रेष्ठले बताएका थिए । ‘रवि सर देखा पर्नुभएको छैन, बाहिरका दुई–तीनजना साथी हुनुहुन्छ । उहाँहरूलाई दिने हो, पार्टीलाई जान्छ भनेका छन्,’ श्रेष्ठले प्रसाईंसँगको संवादमा भनेका छन् । पार्टीको अनुशासन समितिमा भने श्रेष्ठले उक्त आवाज आफ्नो नभएको दाबी गरेका थिए । पद गएको चार महिनापछि भने उनी रुँदै मिडियामा फेरि छाउन थालेका हुन् ।
‘कोर टिम’बारे बल्ल बोले
विभिन्न टेलिभिजन अन्तर्वार्ताहरुमा श्रेष्ठले पार्टीका केन्द्रीय सदस्य मोहनजंग थापामार्फत मन्त्री बनाउनका लागि तीन करोड मागिएको खुलासा गरेका छन् । मोहनजंग पार्टी सभापति रवि लामिछानेकै घरमा बस्ने गरेको र लामिछानेकी धर्मपत्नी निकिता पौडेलसँग पनि उनले तीन करोड दिए मन्त्रीका लागि लबिइङ गरिदिन्छु भनेको दाबी गरेका छन् । ‘केन्द्रीय सदस्य मोहनजंग थापाले मन्त्री बन्नका लागि तीन करोड माग्नुभयो । उहाँमार्फत मसँग पैसा मागिएको हो,’ श्रेष्ठले भनेका छन् । थापा हाल अमेरिकामा रहेका छन् ।
रास्वपाको दाबी– पार्टी सक्काउँछु भन्थे श्रेष्ठ
रास्वपाले एक विज्ञप्ति जारी गर्दै श्रेष्ठको बोली बाझिएको तर्क गरेको छ । बुधबार महामन्त्री डा. मुकुल ढकालले एक विज्ञप्ति जारी गर्दै अनुशासन समितिमा उक्त अडियो आफ्नो नभएको श्रेष्ठले दाबी गरेको बताइएको छ । ‘अनुसन्धानको क्रममा उहाँले अनुशासन समितिका सदस्यहरुसँग आफूलाई पार्टीले साथ नदिए आफूलाई मन लागेका पार्टीका सदस्यलाई पोेल्दिन्छु भन्नुका साथै बाहिरिएको अडियोमा भएको आवाज आफ्नो हो÷होइन भनी परीक्षण गर्न इन्कारीसमेत गर्नुभयो,’ रास्वपाको विज्ञप्तिमा भनिएको छ, ‘यस विवरणको अडियो रेकर्ड पार्टीसँग हाल पनि सुरक्षित छ ।’
त्यतिबेला पार्टीले जोगाइदिनुप¥यो भनी अनुरोध गर्दै अनुरोध गरेको र नजोगाएर पार्टीलाई सक्काइदिने भनी धम्कीसमेत दिएको रास्वपाले जनाएको छ । ‘स्पष्टीकरण दिने क्रममा उहाँले पार्टीले मलाई जोगाइदिनु प¥यो, नत्र पार्टीको जोकोहीको नाम पोल्दिन्छु, पार्टीलाई सक्काई दिन्छु भनेर केन्द्रीय समितिलाई धम्क्याउनुभयो,’ महामन्त्री ढकालले जारी गरेको विज्ञप्तिमा भनिएको छ, ‘पार्टीमा कोर टिम को हो भनेर सोध्दा उहाँले त्यस्तो कोही छैन भन्नुभएको थियो ।’
ठोस प्रमाण लिएर आए ७२ घण्टाभित्र जोकोहीलाई कारबाही गर्न तयार रहेकोसमेत रास्वपाले जनाएको छ । ‘राष्ट्रिय स्वतन्त्र पार्टी पारदर्शिता, जवाफदेहिता र भ्रष्ट्राचारप्रति शून्य सहनशीलताको नीति अनुशरण गर्ने पार्टी भएकाले यस प्रकरणमा अझै पनि पार्टीका कुनै पनि तहको पदाधिकारी वा केन्द्रीय सदस्यले पार्टीको नाम प्रयोग गरी कसैसँग पैसा मागेको ठोस प्रमाण लिएर डा. श्रेष्ठ वा जोकोही आउनुभएको अवस्थामा पार्टीले त्यस्ता सदस्य जोकोही भए पनि प्रमाण पेस भएको ७२ घण्टाभित्र कारबाही गरिने व्यहोरा सम्बन्धित सबैमा जानकारी गराउँदछौं,’ विज्ञप्तिमा भनिएको छ ।
थापामाथि छानबिन सुरु
रास्वपाका प्रमुख सचेतक सन्तोष परियारले श्रेष्ठलाई मन्त्री बनाइदिने भनी पैसा माग गरेको आरोप लागेका पार्टीका नेतामाथि छानबिन भइरहेको बताएका छन् । बिहीबार प्रतिनिधिसभा बैठकपछि प्रमुख सचेतक परियारले श्रेष्ठसँग पैसा मागेको आरोप लागेका पार्टीका केन्द्रीय सदस्य थापामाथि छानबिन भइरहेको बताएका हुन् ।
आरोप प्रमाणित भए थापालाई पनि कारबाही गरिने उनले बताए । ‘हामी त्यसको पनि छानबिन गरिरहेका छौं । जसरी उहाँले गरेका कुरा प्रमाणित भएर उहाँलाई पार्टीले जसरी कारबाही ग¥यो,’ परियारले भने, ‘त्यसैगरी उहाँले अहिले बोलेका कुराहरू सत्यतथ्य प्रमाणित भयो भने त्यहाँ पनि कारबाही हुन्छ । हामी छानबिन गर्दै छौं त्यो टुंग्याउँछौं । चाँडै नै हुन्छ ।’
श्रेष्ठबारे भ्रम फैलाउने पक्राउ
पूर्वसांसद श्रेष्ठबारे सामाजिक सञ्जालमा भ्रामक सूचना सम्प्रेषण गरेको आरोपमा प्रहरीले एक जनालाई पक्राउ गरेको छ । बिहीबार पक्राउ पर्नेमा स्याङजा आँधीखोला गाउँपालिका–५, ठूलीबराहका ३५ वर्षीय सुर्यबहादुर रेग्मी छन् ।रेग्मीले केही दिनअघि सामाजिक सञ्जाल फेसबुकमा श्रेष्ठलाई आक्रमण गरेको भन्दै भ्रामक सूचना फैलाएको थिए ।
‘श्रेष्ठलाई अज्ञात समूहले उनकै निवास अगाडि धारिलो हतियार प्रयोग गरी घाइते बनाएको र उनलाई उपचारको लागि मणिपाल शिक्षण अस्पताल लगिएको, अवस्था चिन्ताजनक रहेको डाक्टरबाट जानकारी, थप समाचार आउन बाँकी,’ रेग्मीले स्टाटस राखेका थिए ।
आफूबारे नभएको सूचना सामाजिक सञ्जालमा देखेपछि श्रेष्ठले रेग्मीविरुद्ध प्रहरीमा उजुरी दिएका थिए । सोही उजुरीका आधारमा रेग्मीलाई बिहीबार पक्राउ गरिएको जिल्ला प्रहरी कास्कीले जनाएको छ । पक्राउ परेका रेग्मीलाई विद्युतीय कारोबार ऐन, २०६३ विपरीतको कसूर (साइबर अपराध) अन्तर्गत अनुसन्धान प्रक्रिया अगाडि बढाइएको प्रहरीले जनाएको छ ।
-1752335779.jpg)
