काठमाडौं– संस्कृति, पर्यटन तथा नागरिक उड्डयनमन्त्री सुदन किरातीको हातमा शनिबार बिहानै कुटो देखियो । त्यही कुटोले खनेर ललितपुरको हात्तीवनमा उनले बिरुवा रोपे ।उनका साथमा अभिनेता आर्यन सिग्देलदेखि चर्चित गायक राजेशपायल राईलगायत देखिए । बिरुवा रोप्ने कार्यक्रम मन्त्री किरातीले राखेका हुन् । हर्क साम्पाङको शैलीमा शुक्रबार नै उनले फेसबुकमा लेखेका थिए, ‘बिरुवा रोप्न हात्तीवन जाऔं ।’
बुधबार उनले गृहजिल्ला भोजपुरमा एक जना वृद्धालाई समात्दै हिँडाएको तस्बिर सार्वजनिक गरे । उक्त तस्बिरमा पनि लेखे, ‘भ्रम छर्ने, घेरा हाल्ने र सखाप पार्ने दुस्मनको रणनीतिबाट कोही भ्रममा नपर्न अनुरोध गर्दछु ।’
एकातिर प्रधानमन्त्री पुष्पकमल दाहालको भारत भ्रमणबारे चर्को टिप्पणी गरेर पार्टीभित्र आलोचित छन् । यस्तो अवस्थाबीच उनले एक जना वृद्धालाई समातेर डोर्याएको एउटा तस्बिर राखेर आफूविरुद्ध घेराबन्दी भएको गुनासो पोखेका हुन् ।
गत साताको शुक्रबार पनि किरातीले भोजपुरकै डाँडागाउँ क्षेत्रमा बाटो किनारको फोहोर टिपे । कहिले उनी कुचो, कोदालो त कहिले साबेल बोकेर हिँडेको देखिन्छन् । उनलाई खासमा ऐन कानुन बनाउन भोजपुरवासीले विधायकको रूपमा तेस्रोपटक संसद्मा पठाएका हुन् । उनी हाल मन्त्री छन् । संस्कृति, पर्यटन र नागरिक उड्डयनको क्षेत्रमा देखिएका तमाम् नीतिगतदेखि व्यावहारिक समस्याहरू समाधान गर्ने जिम्मेवारी छ ।
तर, उनी भने हातमा कुटो, कुचो र फोहोर बोकेर हिँडिरहेका छन् । किरातीको यस्ता कार्यलाई उनकै एक जना शुभेच्छुकसमेत रहेका अमृत सागरले ‘बढी स्टन्टबाजी’ भएको भन्दै टिप्पणी गरेका छन् । तर, पनि अमृतले ‘राम्रो काम गर्नुहोस्’ भन्दै शुभेच्छा प्रकट गरेका छन् । अमृतले जसरी किरातीको कामलाई ‘स्टन्ट’ देख्नेहरू थुप्रै छन् ।फेरि, मन्त्री किराती नेतृत्वको मन्त्रालयको क्षेत्राधिकारअन्तर्गत समस्याहरू नभएका होइनन् । उ
ड्डयन अधिकारीहरूका अनुसार नेपाल वायु सेवा निगम डुब्न लागेको छ । नेपालमा हवाई दुर्घटना न्यूनीकरण हुन सकेको छैन । युरोपियन युनियनको उडान प्रतिबन्ध फुकुवा भएको छैन । पोखरा क्षेत्रीय विमानस्थल र भैरहवा अन्तर्राष्ट्रिय विमानस्थल सञ्चालनमा ल्याउन सकेको छैन । धेरै विमानस्थलहरू गौचर भएका छन् । उड्डयन क्षेत्रमा सुधार गर्नुपर्ने यस्ता धेरै समस्या छन् । तर, उनीचाहिँ ‘स्टन्ट’ गरिरहेका छन् ।
गत ५ वैशाखमा भने उनले उड्डयन क्षेत्र र वायु सेवा निगमको क्षेत्रमा अभूतपूर्व परिवर्तनका लागि निगमको र उड्डयन प्राधिकरणको व्यवस्थापन टिम परिवर्तन गर्ने प्रभाव सम्वादातासँग बताएका थिए । नभए व्यवस्थापन पक्षमा पुनःसंरचना गर्ने उनको भनाइ थियो । नभन्दै उड्डयन प्राधिकरणका महानिर्देशक प्रदीप अधिकारीलाई दोस्रोपटक स्पष्टीकरण सोधे । तर, अधिकारीले जवाफ दिएका छैनन् । बरु, एक प्रकारले मन्त्री र अधिकारीबीच शीतयुद्ध सुरु भयो ।
यसले उड्डयन प्राधिकरणको व्यवस्थापन टिम परिवर्तनमा किरातीले सफलता नपाउने छाँट देखिएको चर्चा हुन थालेको छ । नेपालमै पाइलट उत्पादनका लागि ‘फ्लाइङ स्कुल’ स्थापना गर्ने उनको योजना हो । शुभम् एभिएसन प्रालि र चन्द्रसूर्य एभिएसनलाई कार्यविधि संशोधन गरेर इजाजत दिएका छन् । तर, यसमा प्रगति हुन सकेको छैन ।
‘स्टन्ट’मै व्यस्त रवि
गत ४ मंसिरमा भएको चुनावमा सर्वाधिक मतदाताले रुचाएका नेता हुन्– रवि लामिछाने । उनी एक महिना उपप्रधान तथा गृहमन्त्रीसमेत भए । जनताको अपार अभिमत प्राप्त रवि उनकै शब्दमा ‘बिग्रिएको देशलाई बनाउन’ राजनीतिमा आएका हुन् । यतिबेला भने विभिन्न ‘स्टन्ट’मा रमाइरहेका छन् ।
शुक्रबार मात्रै उनी बाजुरामा एउटा कार्यक्रममा पुगेका थिए । पानी पर्न थालेपछि कार्यक्रममा आएकाहरू प्रांगणमै छँदा उनी भने एउटा पुरानो घरको बरण्डा गएर उपरखुटी लगाएर हाँस्दै बसे । जुन भिडियो यतिबेला टिकटकमा भाइरल छ ।
केही दिनअघि मात्रै उनी नारायणगढ–मुग्लिन सडकखण्ड पहिरोले अवरुद्ध हुँदा त्यहीँ पुगेर ढुंगा पन्छाइरहेको भिडियो भाइरल भएको थियो । कहिले उनी पर्यटनमन्त्री सुदन किरातीले जसरी समर्थकलाई बोक्दै गरेका देखिन्छन् । कहिले ट्रकबाट पाइप अनलोड गर्दै गरेको पनि देखिन्छ । जबकि, उनी देश बिग्रिएको र बनाउने जिम्मा देऊ भन्दै जनअभिमत प्राप्त गरेका नेता हुन् ।
