कांग्रेससँग मैले प्रस्ताव गरेको छैन, कांग्रेसले पनि मलाई प्रस्ताव गरेको छैन । तपाईं (पत्रकार)मार्फत जानकारी पाइरहेका छौं ।- केपी शर्मा ओली, अध्यक्ष, नेकपा एमाले
काठमाडौं - नेकपा एमालेका अध्यक्ष केपी शर्मा ओलीले आफ्नो पार्टी सरकार परिवर्तनको पक्षमा नभएको बताएका छन् । बिहीबार चितवन पुग्ने क्रममा भरतपुर विमानस्थलमा पत्रकारहरुसँग कुराकानी गर्दै अध्यक्ष ओलीले कांग्रेससँग आफूले सरकार गठनको कुनै प्रस्ताव नगरेको बताएका हुन् ।
‘कांग्रेससँग मैले प्रस्ताव गरेको छैन, कांग्रेसले पनि मलाई प्रस्ताव गरेको छैन । तपाईं (पत्रकार)मार्फत जानकारी पाइरहेका छौं,’ नयाँ सरकार गठनबारे सोधिएको प्रश्नमा ओलीको जवाफ थियो ।
पछिल्लोपटक कांग्रेस र एमालेबीच नयाँ सरकारको गठनका लागि भित्री सहमति जुटेको चर्चा चलेको थियो । यसका लागि पार्टीका दोस्रो तहका नेताहरुबीच छलफलसमेत चलेको थियो ।
पार्टीका दोस्रो तहका नेतामार्फत एमाले र कांग्रेस मिल्ने गरी कुराकानी गरिएको भन्ने विषयमा पनि आफूलाई कुनै जानकारी नभएको दाबी ओलीले गरे ।
यसैबीच कांग्रेस सभापति शेरबहादुर देउवाको लामो सिंगापुर बसाइँले सत्तारुढ दल माओवादी केन्द्र, जनता समाजवादी पार्टी र एकीकृत समाजवादी सशंकित भएका थिए ।
देउवा देशमा नभएको मौकामा यी दलली समाजवादी मोर्चासमेत घोषणा गरेका थिए । एकअर्कामा अविश्वास बढ्दै गएको समयमा जसपाका अध्यक्ष उपेन्द्र यादव र एकीकृत समाजवादीका अध्यक्ष माधवकुमार नेपालले संशोधनविना बजेट पारित हुन नदिने अडान राखेका थिए । तर, एकाएक जसपा र एकीकृतले आफ्नो निर्णय परिवर्तन ग¥यो । यद्यपि, बजेट पारित गर्नका लागि बहुमत मुश्किलले जुट्यो ।
हामी अस्थिरताको खेलमा छैनौं । मुलुकमा अस्थिरता नहोस् भन्ने हाम्रो चाहना हो ।-रवि लामिछाने, सभापति, रास्वपा
बिहीबार नै राष्ट्रिय स्वतन्त्र पार्टी (रास्वपा) का सभापति रवि लामिछानेले ओलीको भनाइसँगै मेल खाने मन्तव्य राखेका छन् । चितवनमा पत्रकारहरुसँग कुराकानी गर्दै उनले आफूहरु राजनीतिक अस्थिरताका पक्षमा नरहेको बताएका हुन् । ‘हामी अस्थिरताको खेलमा छैनौं ।
मुलुकमा अस्थिरता नहोस् भन्ने हाम्रो चाहना हो,’ लामिछानेले भने । एमाले र रास्वपा एकैसाथ सरकारमा पुगेको र मुद्दामा पनि अहिले समान धारणा राख्ने पार्टी हो । पछिल्लोपटक सदनमा दुई पार्टीले विरोधका मुद्दामा एकले अर्कोलाई साथ दिँदै आएको छ ।
सभापति लामिछानेले रास्वपा अहिले संगठन निर्माणका क्रममा रहेको भनाइ राखे । संगठन निर्माणसँगै रास्वपाले सरकारका कामप्रति निरन्तर खबरदारी गरिरहने उनले बताए । ओली आज हुने रोपाइँ कार्यक्रमका लागि भरतपुर पुगेका हुन् भने लामिछाने आफ्नो निर्वाचन क्षेत्रमा रहेका छन् ।
