काठमाडाैं - नेपाल बीमक संघले कृषि बीमालेख बिक्री बन्द गरेको छ । सरकारले कृषि बीमा वापत बीमा कम्पनीहरुले प्राप्त गर्नुपर्ने अनुदान रकम उपलब्ध नगराएको भन्दै निर्जीवन बीमा कम्पनीहरुको संगठन नेपाल बीमक संघले कृषि बीमा बन्द गरेको हो ।
सरकारले कृषि बीमामा करिब ३ अर्ब रुपैयाँ अनुदान वापतको बीमाशुल्क प्राप्त भएको संघका अध्यक्ष चंकी क्षेत्रीले बताएकाे स्राेतले जनाएकाे छ । 'विभिन्न चरणको गरी सरकारले करिब ३ अर्ब रुपैयाँ बीमा कम्पनीहरुलाई पठाउन बाँकी छ । तर सरकारले अहिलेसम्म अनुदान रकम निकासा गरेको छैन्,'उनले भने, 'बक्यौता रकम प्राप्त नभएसम्म कृषि बीमालेख बिक्री गर्दैनौं ।'
अनुदान रकम उपलब्ध गराउन नेपाल सरकार, कृषि तथा पशुपंक्षी मन्त्रालय,कृषि विभाग,बीमा प्राधिकरणलाई पटक पटक मौखिक तथा लिखित अनुरोध गर्दा समेत हालसम्म प्राप्त नभएकोले बीमा कम्पनीहरु अत्यधिक जोखिममा रहेको संघले जनाएको छ ।
सरकारबाट प्राप्त हुनुपर्ने वक्यौता अनुदान रकम पूर्णरुपमा प्राप्त नहुन्जेल कृषिसँग सम्बन्धित सबै बीमाको बीमालेख जारी गर्न र सोसँग सम्बन्धित क्षतिको दाबी भुक्तानी दिन कम्पनीहरु असमर्थ रहेको पनि संघले जनाएको छ ।
कृषि बीमा अन्तरगत माछाको अनुदान रकम २०७७ देखि बाँकी रहेको संघले जनाएको छ । यस्तै बाली बीमाको अनुदान रकम २०७८ असोजदेखि चैत मसान्तसम्म आंशिक दिई हालसम्म बाँकी रहेको स्राेतले जनाएकाे हाे ।
पशुपन्छी बीमाको अनुदान रकम २०७८ असोजदेखिको बाँकी रहेको संघले जनाएको छ ।संघले बीमालेखको बीमांकमा कृषि विभागको असहमति रहेकोले बीमांक एकिन नगरी दाबी भुक्तानी दिन नसकिने जनाउदै कृषिसँग सम्बन्धित बीमालेखहरु जारी गर्न तथा दाबी भुक्तानी दिन स्थगन गरेको जनाएको छ ।
यता नेपाल बीमा प्राधिकरणका कार्यकारी निर्देशक राजु रमण पौडेलले भने अनुदान रकम उपलब्ध गराउन पहल भइरहेको बताएका छन् ।'कृषि बीमाको अनुदान रकम प्राप्त नभएको भन्दै निर्जीवन बीमा कम्पनीहरुले कृषि बीमालेख बिक्री बन्द गरेका छन् । हामीले कृषि मन्त्रालयसँग समन्वय गरेर रकम निकासा गर्ने प्रयास गर्दैछौं,' उनले भने, 'यस सम्बन्धमा हामीले छलफल गरिसकेका छौं । छिटै समस्या समधान हुन्छ ।'
सरकारले २०६९ देखि कृषक र कृषिलाई प्राथमिकता दिई कृषि बीमाशुल्कमा अनुदान प्रदान गर्दै आइरहेको छ । सरकारले कृषि तथा पशुपन्छी बीमामा बीमाशुल्कको ८० प्रतिशत अनुदान प्रदान गर्दै आइरहेको छ ।
प्रकाशित मिति: सोमबार, जेठ ८, २०८० १५:२५
