काठमाडाैं - घोराही सिमेन्ट कम्पनीले उद्योग प्रभावितहरुका लागि महंगो मूल्यमा बिक्रीमा ल्याएको प्राथमिक सेयर प्रभावित क्षेत्रका वासिन्दाले बहिस्कार गर्ने भएका छन् ।कम्पनीले स्थानीयलाई आर्थिक शोषण गर्न महंगो मूल्यमा प्रिमियम सहितको आईपीओ बेच्न खोजेकोले स्थानीयले बहिष्कार गर्ने भएका हुन् ।
घोराही उपमहानगरपालिकाको ४ नम्बर वडा अध्यक्ष मधुसुदन घिमिरेले मेराेलगानीलाई दिएकाे जानकारी अनुसार उद्योग प्रभावितहरुको भेलाले घोराहीको महंगो मूल्यको आईपीओ बहिष्कार गर्ने निर्णय गरेको हो ।
स्थानीयबासीहरुले उल्टै उद्योग बस्ती बीचमा स्थापना भई प्रदुषण बढाएर मानव स्वास्थ्यमा गम्भीर असर परेको भन्दै उद्योग नै स्थानान्तरणको माग गरेका छन् ।
यसैगरी उपमहानगरपालिकाका प्रमुख नरुलाल चाैधरीले पनि जनतालाई आईपीओ वारे कुनै चासाे नरहेकाे जानकारी दिए । उनले मेराेलगानीसँग भने, 'प्रदुषण गरेकाेले उद्याेग नै सार्नु पर्छ भन्दै माग राख्दै आएका जनताले त्यही सिमेन्टकाे शेयर नलिने मानसिकता बनाएका छन्, जनता आन्दाेलनमै छन् ।'
उद्योग प्रभावित क्षेत्र घोराही उप–महानगरपालिका वडा नं १, २, ३, ४, १४, १५, १७, १८, १९, बंगलाचुली गाउँपालिका–३, ४ र रोल्पाको त्रिवेणी गाउँ पालिका वडा नं ३ र ४ का स्थानीयहरुका लागि तीन लाख ९७ हजार एक सय ९० कित्ता साधारण शेयर निष्कासन गरेको छ ।
कम्पनीले बिक्रीमा ल्याएको सो सेयरलाई स्थानीयले प्रतिकित्ता ३०० रुपैयाँ प्रिमियम तिरेर ४०० रुपैयाँमा खरिद गर्नुपर्नेछ ।एकातिर वातावरणीय र मानवीय स्वास्थ्यमा प्रतिकुल असर परी बस्तिमा गंभीर परेको, पानीको मूल सुक्न थालेको छ भने अर्कोतिर
कम्पनीले बिक्री गर्न लागेको ७९ लाख ४३ हजार कित्ता मध्ये ६७ लाख ९१ हजार नौ सय ५० कित्ता सर्वसाधारणलाई र वैदेशिक रोजगारीमा रहेकाहरुलाई सात लाख ५४ हजार छ सय ६१ कित्ता बिक्री गर्ने सूचना जारी गरिएको छ । सर्वसाधारण र वैदेशिक रोजगारीमा रहेकाहरुले प्रतिकित्ता ३५० रुपैयाँ प्रिमियम तिरी प्रतिकित्ता ४३५ रुपैयााँमा किन्नुपर्ने उल्लेख छ ।
दोस्रो बजारमा शिवम सिमेन्टको सेयरको भाउ प्रतिकित्ता ४०० रुपैयाँ मुनी आईसकेको अवस्थामा घोराहीको महंगो आईपीओ कसले किन्ला भन्ने गम्भीर प्रश्न उब्जिएको छ । त्यही बेला स्थानीयपनि महंगो आईपीओ नकिन्ने घोषणा गरेपछि घोराहीको सेयर बिक्री संकटमा परेको छ ।
घोराही उपमहानगरपालिका वठा नम्बर ४ का अध्यक्ष घिमिरेले कम्पनीले स्थानीयहरुलाई झुक्याएर बिक्री गर्न खोजेको महंगो मूल्यको सेयर नकिन्ने निर्णय भएको बताएका छन् ।
कम्पनीले नेपाल विद्युत प्राधिकरणलाई एक अर्ब भन्दा बढी विद्युत महसुल तिर्न बाँकी भएको अपस्थामा आईपीओ बिक्रीको चलाखी गरेको स्थानीयबासीको आरोप छ । स्थानीयले तत्काल उद्योग स्थानान्तरण नगरे आफुहहरु आन्दोलनमा उत्रिने चेतावनी पनि दिएका छन् ।
