काठमाडौं - स्वास्थ्य तथा जनसङ्ख्या मन्त्रालयका सचिव डा.रोशन पोख्ररेलले स्वास्थ्य क्षेत्रलाई प्राथमिकताका साथ हेर्नुपर्ने बताएका छन् ।
राष्ट्रिय सरोकार तथा समन्वय समितिद्धारा आज आयोजित ‘स्वास्थ्य क्षेत्रको समग्र सुधार’ सम्बन्धी छलफल कार्यक्रममा सचिव पोख्ररेलले स्वास्थ्य क्षेत्रमा जनशक्ति व्यवस्थापन गर्न प्रमुख कठिनाई रहेकाले सेवासुविधामा वृद्धि गरी दुर्गम क्षेत्रमा जनशक्तिलाई टिकाउन स्वास्थ्य क्षेत्रलाई प्राथमिकतामा राख्न जरुरी रहेको बताए ।
“ जनशक्ति व्यवस्थापन हुन नसक्नु प्रमुख समस्या हो । सबै कर्मचारी केन्द्रीत हुन चाहान्छन् । दुर्गम क्षेत्रमा कर्मचारी जान नमानदा स्वास्थ्य सेवा प्रवाहमा समस्या देखापरेको छ । ” सचिव पोख्ररेलले भने। स्वास्थ्य क्षेत्रका जनशक्ति चौबिसै घण्टा तयार रहनुपर्नाले स्वास्थ्य क्षेत्रको समग्र सुधारको लागि दुर्गम क्षेत्रमा कर्मचारीको आकर्षण बढाउन पारिश्रमिक लगायतका अन्य सुविधालाई प्राथमिकतामा राख्नुपर्नेमा उनको भनाई छ ।
कार्यक्रममा, समिति सभापति दिलकुमारी रावल थापाले समग्र स्वास्थ्य क्षेत्रको सुधारमा सुदृढ बनाउनको लागि तीन तहबीच नीतिगत, कानुनी व्यवस्थामा स्पष्ट हुन कानुन निमार्णमा सहकार्य आवश्यक रहेको बताए । नागरिकलाई स्वास्थ्य सेवामा सहज रुपमा पहुँच वृद्धि गर्न र विद्यमान स्वास्थ्य प्रणाली सुधार गर्नको लागि मन्त्रालयले तहगत समन्वयन गरी अघि बढ्न आवश्यक रहेको सभापति थापाले जनाए । कोभिडको संक्रमणकालमा मन्त्रालयले गरेको जनचेतना कार्यक्रम लाभदायी भएकाले स्वास्थ्य क्षेत्रमा यस्ता कार्यक्रम प्रभावकारी हुने उनको भनाई छ ।
मन्त्रालयका सचिव देवकुमारी गुरागाईले स्वास्थ्य क्षेत्रमा सुधारका लागि तीन तहको समन्वयनका लागि कार्ययोजना तयार गरेको बताउँदै विगतको समयमाभन्दा हाल स्वास्थ्य क्षेत्रमा सुधार हुदैँ गएको बताए । कार्यक्रममा निःशुल्क प्राप्त गर्ने औषधीमा अनुगमन गर्न, सबै सरकारी अस्पतालबाट बिमा सेवा प्राप्त गर्न, सबै वर्गको स्वास्थ्य क्षेत्रमा पहुँच पुर्याउन, सरकारी अस्पताललाई सुदृढ बनाउन, म्याद नाघेका औषधी बिक्री वितरणमा कडाइ गरी नियमन गर्ने बिषयमा छलफल भएको थियो ।
त्यस्तै, सरकारको आवश्यकता अनुसार कर्मचारी व्यवस्थापन गर्न नीतिगत रुपमा प्रष्ट व्यवस्था गर्न आवश्यक, स्वास्थ्यमा हानीकारक वस्तुबाट उठेको राजस्व स्वास्थ्य क्षेत्रमा लगानी गर्नुपर्ने, अस्पतालमा आवश्यक उपकरणको उपलब्ध गराउनुपर्ने, जारी गरेको निर्देशन कार्यान्वयनमा अनुगमन गर्नुपर्ने लगायतका बिषय माथि छलफल भएको थियो ।
कार्यक्रममा, सभापति थापाले कोभिड संक्रमणकालमा समितिले दिएका निर्देशन मन्त्रालयले प्रभावकारी ढङ्गले कार्यान्वयन गरेको बताउँदै आज छलफलमा उठेका विषयमाथि विश्लेषण गरी आवश्यक निर्देशन दिने जानकारी दिए ।
