दोलखा– दोलखाको सदरमुकाम चरीकोटदेखि करिब ३० किलोमिटर दूरीको उत्तरी दुर्गम क्षेत्रमा रहेको खारे माध्यमिक विद्यालयले छोटो समयमा विद्यालयको शैक्षिक सुधार गर्न सफल भएको छ । दुर्गम भेगमा रहेको एउटा सिङ्गो गाउँलाई समेटेर निर्माण भएको उक्त विद्यालयले केही वर्ष अघि सम्म एसईईमा प्राय शून्य जाने गरेको थियो ।
गौरीशंकर गाउँपालिका वडा नम्बर ८ खारेमा रहेको खारे माध्यमिक विद्यालयको शैक्षिक अवस्था खस्कँदै गएपछि सो भेगका अभिभावक चिन्तित र विद्यालयप्रति आक्रोशित थिए । नरेन्द्र सिङ्म महत प्रधानाध्यपकको रूपमा खारे मा.वि.मा रहे सगै विद्यालयको शैक्षिकस्तर भौतिक संरचनामा आमूल परिवर्तन ल्याउनको साथै अनुशासन र विद्यालयलाई हेर्ने दृस्टिकोणमा समेत फरक आएको छ । भौगोलिक हिसाबले केही विकट मानियता पनि शैक्षिक गुणस्तरको हिसाबले शहर बजारको निजी विद्यालयसरह शिक्षा दिन सफल भएको छ।
केही वर्ष अघिसम्म छिमेकी गाविसका विद्यालयमा अध्ययन गराउन पठाउने अभिभावकहरु अहिले भने सकारात्मक उदाहरण दिँदै उत्तरी क्षेत्रको सरकारी विद्यालय खारे मा . वि रुचाउछन विद्यालयलाई यो स्तरसम्म ल्याउनलाइ आफ्नो योगदान रहेता पनि साथ दिने सहयात्री शिक्षक सहयोग गर्ने अभिभावक स्थानीय तह लगायत सम्पुर्णको बराबरी योगदान रहेको प्रधानाध्यपक महतको भनाइ छ।
गत वर्षको एसईई परीक्षामा जिल्लाकै उत्कृष्ट १० विद्यालयमा आफ्नो विद्यालय पर्न सफल भएको प्रअ महतले बताए । अहिले उक्त विद्यालय गौरीशंकर गाउँपालिका भित्रकै उत्कृष्ट विद्यालय घोषण भएको छ । शैक्षिक पाटोमा क्रमशः सुधार हुँदै आएपछि विद्यालयको भौतिक सुधार गर्नतर्फ लागेको प्र.अ महतले बताए ।
जिल्ला आयोजना कार्यान्वयन इकाइको करिब साढे दुई करोड बजेटमा चारवटा विद्यालय भवन निर्माण भएका छन् । विद्यालय भवन निर्माणसगै एक सय ९० जना विद्यार्थीको लागि पठनपाठनमा सहजता आएको छ । १५ लाख अनुदानमा पक्की शौचालयको पनि निर्माण भइरहेको उनले बताए ।
महत सो विद्यालयमा प्रअ भएर आएपछि विद्यालयको मुहार नै फेरिएको स्थानीय पदम मगरले बताए ।मगरका अनुसार विगत वर्षको एसएलसी तथा एसईई परीक्षामा शून्य नतिजा ल्याउने विद्यालयले गत वर्ष तीन दशमलव ४५ जीपीए नतिजा ल्याएर पालिकाभित्रकै उत्कृष्ट सम्मान थाप्न सफल भएको छ ।
हाल निजी विद्यालयमा अध्ययन गर्दै आएका विद्यार्थी समेत खारे माविको छात्रबासमा बसेर अध्ययन गरिरेका छन् । विद्यालयले अहिले विद्यार्थीलाई होस्टेल राखेर तीन समयमा कक्षा सञ्चालन गरिरहेको र पढाइसँगै अतिरिक्त क्रियाकलापले शिक्षामा थप उर्जा मिलेको र विद्यालयले अभिभावकको मागअनुसार रात्री कक्षा, दिवा कक्षा र बिहानको कक्षा गरी तीन समय अध्यापन गराइरहेको विद्यालयले जनाएको छ । विद्यालयमा हाल ५ थान कम्प्युटर, डिजिटल सूचना बोर्ड, सीसीटीभीलगायत सम्पूर्ण विज्ञान प्रयोगशालाहरू राखिएका छन् ।
