काठमाडौं- कोरोना भाइरसको संक्रमणबाट मृत्यु हुने अधिकांश खोप नलगाएका रहेको स्वास्थ्य तथा जनसंख्या मन्त्रालयले जनाएको छ । मन्त्रालयका सहप्रवक्ता डा. समिरकुमार अधिकारीका अनुसार हालसम्म मृत्यु भएकामध्ये ७५ प्रतिशतले कोरोना भाइरसविरुद्धको खोप नलगाएको पाइएको छ ।
उनले कोरोना भाइरसविरुद्धको खोप नलगाएका उच्च जोखिममा भएकाले खोप लगाउन आग्रह गरे ।
‘खोप नलगाएका उच्च जोखिममा रहेकाले खोप नलगाउनुभएका सबैले आफ्नो नजिकको स्वास्थ्य संस्थामा गई आवश्यकताअनुसार पहिलो, दोस्रो र बुस्टर मात्रा खोप लगाउन आग्रह गर्दछौं,’ सहप्रवक्ता अधिकारीले भने । मंगलबार मात्र कोरोना भाइरसको संक्रमणबाट दुई जनाको मृत्यु भएको छ । अहिलेसम्म नेपालमा ११ हजार ९७४ जनाको कोरोना संक्रमणका कारणले ज्यान गइसकेको तथ्यांक छ । नेपालमा संक्रमणका कारणले प्रति १० लाखमा ४१०.२ जनाको निधन भएको देखिन्छ । जसमध्ये सबैभन्दा धेरै ६० देखि ६९ वर्ष उमेर समूहका छन् ।
६० देखि ६९ वर्षका दुई हजार ५०८, ७०–७९ वर्षका दुई हजार ३८९, ५०–५९ का दुई हजार ३०३, ४०–४९ का एक हजार ६६५, ८० वर्ष माथिका एक हजार ६३९, ३०–३९ वर्षका ९६५, २०–२९ वर्षका ३८१, १०–१९ वर्षका ५७, नौ वर्षमुनिका ५१ र अज्ञात १३ जनाको मृत्यु भएको स्वास्थ्य मन्त्रालयको तथ्यांक छ ।
मन्त्रालयका अनुसार खोप नलगाएका मानिसलाई कोभिड–१९ संक्रमण भयो भने त्यस्ता मानिस गम्भीररूपमा बिरामी पर्ने र मृत्यु हुने सम्भावना खोप लगाएको मानिसको तुलनामा १० गुणा बढी हुने गर्दछ । मन्त्रालयले पहिलो र दोस्रो खोप लगाएकाहरूलाई बुस्टर मात्रा लगाउन आग्रह गरेको छ । बुस्टर मात्रा खोपले गम्भीर बिरामी पर्ने वा मृत्यु हुनबाट लगभग ८५ प्रतिशत सुरक्षा प्रदान गर्ने बताइन्छ ।
मन्त्रालयले लक्षित जनसंख्याको ९३.३ प्रतिशतले पहिलो मात्रा र ८८.५ प्रतिशतले दोस्रो मात्राको खोप लगाइसकेका जनाएको छ । कोभिड–१९ बाट संक्रमित ५० प्रतिशत मानिसमा कुनै पनि लक्षण नदेखिएकाले संक्रमणबाट बच्नका लागि खोप लगाउन आग्रह गरिएको छ ।
संक्रमणबाट बच्नका लागि नाक, मुख छोपिने गरी सही तरिकाले मास्क लगाउन, भौतिक दूरी कायम गर्न, खोक्दा वा हाच्छ्यु“ गर्दा पाखुरादेखि नाडीसम्मको भागले छोप्न, झ्याल सधैं खुला राख्न र बेलाबेलामा साबुन पानीले मिचीमिची हात धुन आग्रह गरेको छ । अहिले दैनिक एक हजारभन्दा बढी संक्रमण देखिने गरेको छ ।
स्वास्थ्य मन्त्रालयले अबको दुई हप्तामा कोरोना संक्रमण उत्कर्षमा पुग्ने अनुमान गरेको छ । मन्त्रालयका प्रवक्ता डा. अधिकारीले अब दुई हप्तामा कोरोना संक्रमण उच्च बिन्दुमा पुग्ने र त्यसपछि घट्दै जाने बताए । नजिकि“दो चाडपर्वले पनि कोरोना संक्रमणको जोखिम बढाउनसक्ने उनले बताए । चाडपर्वमा सामाजिक दूरी कायम नहुने, भीडभाड हुने भएकाले संक्रमण फैलिने सम्भावना बढेर जाने डा. अधिकारीको भनाइ छ ।
