काठमाडौं- काठमाडौं उपत्यकामा हैजा संक्रमणको जोखिम बढ्दै गएको छ । उपत्यकामा पहिलोपटक यही असार ५ गते दुई जनामा हैजा पुष्टि भएकामा हाल संक्रमितको संख्या १२ पुगिसकेको छ । स्वास्थ्य तथा जनसंख्या मन्त्रालयले हैजा संक्रमणबाट जोगिन आह्वान गर्दै आएको छ ।
प्रतिनिधिसभाको शिक्षा तथा स्वास्थ्य समितिको सोमबारको बैठकमा स्वास्थ्य सेवा विभागका महानिर्देशक डा.दीपेन्द्ररमण सिंहले हालसम्म १२ जनामा हैजा पुष्टि भएको जानकारी दिए । तीमध्ये आठ जना उपचारपछि घर फर्किसकेको उनले जानकारी दिए । चार जनाको शुक्रराज ट्रपिकल तथा सरुवा रोग अस्पताल टेकुमा उपचार भइरहेको उनले बताए ।
उपत्यकाको खानेपानी प्रदूषित भएको कारणले हैजा देखिएको पाइएको छ । प्रतिनिधिसभाको शिक्षा तथा स्वास्थ्य समितिमा हैजा रोगबारे गरिएको छलफलमा स्वास्थ्य तथा जनसंख्या मन्त्रालयको इपिडिमियोलोजी तथा सरुवा रोग नियन्त्रण महाशाखाका निर्देशक डा. चुमनलाल दासले खानेपानी प्रदूषित भएकाले हैजा देखिएको बताए ।
महाशाखाले हैजा देखिएको ठाउँ बागबजार, डिल्लीबजार र सानेपामा रहेका पानी परीक्षण गरेको थियो । डा. दासले धाराको पानी, जार, टु्युवेल, बोरिङको पानी परीक्षण गर्दा प्रदूषित पाइएको बताए । उनका अनुसार बागबजारको खानेपानी प्रदूषित रहेको छ । यस्तै सानेपामा परीक्षणका क्रममा ६२ प्रतिशत प्रदूषित भेटिएको उनले जानकारी दिए ।
‘पानी कसरी प्रदूषित भयो भनेर हामीले अध्ययन गरिरहेका छौँ,’ उनले भने, ‘अध्ययनका लागि सबै ठाउँको पानीको नमूना संकलन गरिरहेका छाैँ।’यस्तै बूढानीलकण्ठ नगरपालिकाले गरेको पानीको परीक्षणमा ७२ प्रतिशत प्रदूषित र जारको पानी १५ प्रतिशत प्रदूषित भेटिएको छ । नगरपालिकाले जार, ढुंगेधारा, बोरिङको पानी परीक्षण गरेको थियो ।
यस्तै काठमाडौं उपत्यका खानेपानी लिमिटेडले पनि विभिन्न ठाउँको १० वटा खानेपानीको नमूना परीक्षण गरिरहेको छ ।
महाशाखाका निर्देशक डा. दासले बल्खु र कोटेश्वरको पानीको सातवटा नमूना लिई परीक्षण भइरहेको जानकारी दिए । उनले महाशाखा र काठमाडौं उपत्यका खानेपानी कम्पनी लिमिटेडस“ग मिलेर खानेपानीको परीक्षण भइरहेको बताए ।
महाशाखाका निर्देशक डा. दासले हैजाको सम्भावित रोकथाम र नियन्त्रणका लागि अस्पतालहरुलाई तयारी अवस्थामा राखिएको बताए ।यसैबीच हैजाको सम्भावित जोखिम नियन्त्रण गर्न उपत्यकाका स्थानीय तहले समेत पहल थालेका छन् । काठमाडौं महानगरपालिकाले हैजा फैलिन नदिन काम थालेको जनाएको छ ।
ललितपुर महानगरपालिकाले महानगरभित्र पानी पुरी र चटपटे बेच्न प्रतिबन्ध लगाएको छ । प्रदूषित पानीका कारण यो रोगको संक्रमण हुने भएकोले पानी पुरी र चटपटे बेच्न प्रतिबन्ध लगाइएको महानगरको भनाइ छ ।
