काठमाडाैँ - स्वास्थ्य तथा जनसङ्ख्यामन्त्री विरोध खतिवडाले अङ्गदानको घोषणा गरेका छन् । स्वास्थ्य सेवा दिवस–२०७८ को अवसरमा आयोजित समारोहमा उनले मरणोपरान्त आफ्ना अङ्गदान गर्ने घोषणा गरेका हुन्।
सो अवसरमा मन्त्री खतिवडाले आगामी चैतभित्र सबै नेपालीलाई कोभिडविरुद्धको खोप पूरा गर्ने बताएका छन्। स्वास्थ्य क्षेत्रमा भएका कमीकमजोरीलाई सुधार गरेर अगाडि बढने प्रतिबद्धता व्यक्त गर्दै उहाँले कोभिडको समयमा क्रियाशील रहेका सबै स्वास्थ्यकर्मीको सराहना गरेका छन्।
स्वास्थ्य राज्यमन्त्री भवानीप्रसाद खापुङ्को उपस्थितिमा भएको कार्यक्रममा नेपाल सरकारका मुख्यसचिव शङ्करदास बैरागीले पनि अङ्गदानको घोषणा गरेका छन् । मुख्यसचिव बैरागीले दिवसको सफलताको शुभकामना दिँदै गुणस्तरीय स्वास्थ्य सेवा सबै नागरिकमा पुर्याउन आवश्यक रहेको विचार व्यक्त गरे ।
स्वास्थ्य सचिव देवकुमारी गुरागाईंले कोभिड खोप अभियानमा उल्लेख्य प्रगति भएको बताए । त्यस अवसरमा रु एक लाख राशिको उत्कृष्ट स्वास्थ्यकर्मी पुरस्कार डा.जीतेन्द्र कँडेललाई र रु ५० हजार राशिको स्वास्थ्य सेवा पुरस्कार धनकला थापा, ओमराज आचार्य, रामप्रवेश साह र योगेन्द्र कट्टेललाई प्रदान गरिएको थियो ।
सो कार्यक्रममा स्वास्थ्यकर्मी सम्मान १० जनालाई प्रदान गरिएको थियो ।
-1755862759.jpeg)
