काठमाडौं- प्रधानमन्त्री वालेन्द्र शाहले राष्ट्रिय अर्थतन्त्रलाई गतिशील बनाउन मौद्रिक नीतिमार्फत आवश्यक सहजीकरण र लचकता अपनाउन नेपाल राष्ट्र बैंकलाई सुझाव दिएका छन्।
प्रधानमन्त्री शाहले शुक्रबार सिंहदरबारमा नेपाल राष्ट्र बैंकका गभर्नर डा. विश्वनाथ पौडेलसँग करिब एक घण्टा छलफल गर्दै सरकार र केन्द्रीय बैंकबीचको प्रभावकारी सहकार्यबाट मात्र अर्थतन्त्रप्रतिको आत्मविश्वास बढाउन सकिने बताएका हुन्।
भेटमा प्रधानमन्त्री शाहले सेयर बजारका लगानीकर्ताको मनोबल बढाउने गरी मौद्रिक नीतिका सीमाहरू खुकुलो पार्न, बैंकहरूको ब्याजदर तथा कर्जा सर्तलाई उद्यममैत्री बनाउन आग्रह गरे। उनले महिला तथा पिछडिएका क्षेत्रका उद्यमीलाई कर्जा सहुलियतमा विशेष प्राथमिकता दिई उनीहरूलाई अर्थतन्त्रको मूल प्रवाहमा ल्याउन मौद्रिक उपकरण प्रभावकारी रूपमा परिचालन गर्नुपर्नेमा पनि जोड दिए।
जवाफमा गभर्नर डा. विश्वनाथ पौडेलले राष्ट्र बैंक मौद्रिक नीतिलाई थप व्यावसायिक, लचिलो र समयसापेक्ष बनाउने दिशामा प्रतिबद्ध रहेको बताए। अर्थतन्त्रलाई गति दिनु सरकार र केन्द्रीय बैंकको साझा उद्देश्य रहेको उल्लेख गर्दै उनले सेयर बजारका लगानीकर्तादेखि घरेलु उद्यमीसम्म सबैलाई सहज हुने गरी नीतिगत सहजीकरण गरिने विश्वास दिलाए।
प्रधानमन्त्री र गभर्नरबीचको छलफलमा अर्थतन्त्रमा देखिएको सुस्तता हटाउने, लगानीमैत्री वातावरण निर्माण गर्ने तथा निजी क्षेत्रको मनोबल अभिवृद्धि गर्ने विषयमा विशेष जोड दिइएको बताइएको छ।
