काठमाडाैं - औद्योगिक क्षेत्रमा भइरहेको अघोषित लोडसेडिङ र अनियमित विद्युत आपूर्तिप्रति मोरङ उद्योग संघको गम्भीर ध्यानाकर्षण भएकाे जनाएकाे छ । विगत लामो समयदेखि मोरङ–सुनसरी औद्योगिक क्षेत्रका उद्योगहरुले खेप्दै आएको अनिर्धारित, अनियमित र अघोषित विद्युत आपूर्तिको समस्या हाल वर्षायामका दिनहरुमा समेत पुनः उत्कर्षमा पुगेकोप्रति मोरङ उद्योग व्यापार संघले एक विज्ञप्ति जारी गरी ध्यानाकर्षण भएको जनाएकाे हाे ।
विज्ञप्तिमा भनिएकाे छ ,'बिना कुनै पूर्वसूचना दैनिक रुपमा भइरहेको पटक–पटकको ट्रिपिङ, न्यून भोल्टेज र अघोषित लोडसेडिङका कारण यस क्षेत्रका उद्योग व्यवसायहरुमा नकारात्मक प्रभाव पर्दै धराशायी हुने अवस्थामा पुगेका छन् । नेपाल विद्युत प्राधिकरणले विद्युत आपूर्तिमा सुधार भएको दाबी गरिरहँदा वास्तविकतामा भने उद्योगहरुले दैनिक घन्टौंसम्म अनिश्चितताको सामना गर्नु परिरहेको छ । यस अनिर्धारित प्राविधिक गडबडी र लापरवाहीका कारण उद्योगहरुलागि चौतर्फी मार परिरहेको अवस्था छ ।
पटक–पटक आउने र जाने विद्युत ट्रिपिङका कारण उद्योगहरुमा जडान गरिएका करोडौँ मूल्यका अत्याधुनिक मेसिनरी, पार्टपुर्जाहरु, इलेक्ट्रोनिक प्यानल र सफ्टवेयर प्रणालीहरु बिग्रने क्रम अत्यधिक बढेको छ । जस कारण उद्योगीहरुमाथि मर्मत सम्भारको ठूलो र अनपेक्षित आर्थिक भार थपिएको छ । त्यस्तै, विशेषगरी प्लास्टिक, स्टील, सिमेन्ट, खाद्य र रासायनिक पदार्थ उत्पादन गर्ने उद्योगहरुमा प्रक्रियागत उत्पादनका क्रममा अचानक विद्युत काटिँदा मेसिन भित्रै कच्चा पदार्थहरु जमेर नष्ट हुने, डढ्ने र करोडौँको उत्पादन पूर्ण रुपमा खेर जाने गरेको छ ।
त्यसका साथै विद्युत आपूर्ति अनियमित हुँदा उद्योगहरुमा कार्यरत हजारौँ श्रमिकहरु घण्टौँसम्म कामविहीन भएर बस्नुपर्ने बाध्यता छ । काम नभए पनि उद्योगहरुले भुक्तानी गर्नुपर्ने पारिश्रमिक र सञ्चालन खर्च यथावत रहने र नेपाली उत्पादनले स्वदेशी तथा अन्तर्राष्ट्रिय बजारमा प्रतिस्पर्धा गर्ने क्षमता पूर्ण रुपमा गुमाउँदै गएको छ ।
त्यसका अतिरिक्त, समयमा उत्पादन हुन नसक्दा बजारमा सामानको अभाव सृजना हुने, माग अनुसार आपूर्ति गर्न नसक्दा उद्योगहरुको साख गुम्ने र आयातित वस्तुहरुले बजार ओगट्ने जोखिम बढेको छ । देशको अर्थतन्त्रको मेरुदण्डका रुपमा रहेको औद्योगिक क्षेत्रलाई यसरी बिना कुनै पूर्वसूचना र योजना अन्धकारमा राख्नु र उद्योगीहरुको समस्यालाई बेवास्ता गरिनु अत्यन्तै विडम्बनापूर्ण छ ।
अतः यस्तो गैरजिम्मेवारपूर्ण रवैयाले उद्योगीहरुमा चरम निराशा पैदा गरेको हुँदा नेपाल विद्युत प्राधिकरण लगायत सम्बन्धित उच्च निकायहरु समक्ष यसै विज्ञप्ति मार्फत मोरङ–सुनसरी औद्योगिक क्षेत्रको अघोषित लोडसेडिङ र ट्रिपिङको समस्यालाई तत्काल अन्त्य गर्न हामी जोडदार माग गर्दछौं । साथै, प्राविधिक कारणले विद्युत काट्नु पर्ने अवस्था आएमा त्यसको पूर्वसूचना यस संघ सहित सम्बन्धित उद्योग व्यवसाय प्रतिष्ठानहरुलाई अनिवार्य रुपमा उपलब्ध गराउन र स्वदेशी उद्योग व्यवसायको संरक्षणनार्थ गम्भीरतापूर्वक सचेत एवम् सक्रीय रहन हार्दिक अपिल गर्दछौं ।'
