काठमाडौं- नेपाली कांग्रेसले संविधान संशोधनबारे आफ्नो आधिकारिक धारणा शुक्रबार सार्वजनिक गर्ने भएको छ। पार्टीका सभापति गगनकुमार थापाले ‘संविधान संशोधनमा नेपाली कांग्रेसको दृष्टिकोण’ शीर्षक दस्तावेज सार्वजनिक गर्ने कार्यक्रम तय भएको हो।
यसका लागि दिउँसो ३ बजे ललितपुरस्थित पार्टी केन्द्रीय कार्यालयमा विशेष कार्यक्रम आयोजना गरिएको छ। कांग्रेसले संविधान संशोधनसम्बन्धी अध्ययन र सुझाव तयार गर्न उपसभापति पुष्पा भुसालको संयोजकत्वमा वरिष्ठ अधिवक्ता तथा कानुनविद्हरू सम्मिलित विज्ञ समिति गठन गरेको थियो।
समितिले तयार पारेको प्रतिवेदन र सुझावका आधारमा पार्टीले आफ्नो औपचारिक धारणा सार्वजनिक गर्न लागेको जनाएको छ। संविधान संशोधनको विषयमा प्रमुख राजनीतिक दलहरूबीच मतभिन्नता कायमै रहेका बेला कांग्रेसले आफ्नो दृष्टिकोण सार्वजनिक गर्न लागेको हो।
यसअघि संशोधनसम्बन्धी बहस अघि बढाउन गठित ‘संविधान संशोधन बहसपत्र कार्यदल’बाट नेकपा एमाले, नेकपा, जसपा, लोसपा र राजमो बाहिरिएका थिए। यस्तो अवस्थामा कांग्रेसको धारणालाई राजनीतिक वृत्तमा अर्थपूर्ण रूपमा हेरिएको छ।
