चितवन- चितवन राष्ट्रिय निकुञ्जमा भोलि असार १७ गतेदेखि जिप सफारी सेवा बन्द हुने भएको छ। वर्षायाम सुरु भएसँगै निकुञ्जमा पाइने अधिकांश वन्यजन्तु तथा चराचुरुङ्गीहरूको प्रजननका लागि यो समय उपयुक्त हुने भएकाले जिप सफारी बन्द गर्ने निर्णय गरिएको चितवन राष्ट्रिय निकुञ्ज कार्यालयले जनाएको हाे ।
निकुञ्जका अनुसार असार १७ गतेदेखि असोजको पहिलो सातासम्म जिप सफारी सञ्चालन गरिने छैन। वर्षायाममा निकुञ्जभित्रका कच्ची वनपथ बिग्रने, साना खोला–खोल्सीमा आकस्मिक बाढी आउने, रुख ढलेर बाटो अवरुद्ध हुने तथा पर्यटकहरूको सुरक्षामा समेत चुनौती थपिने भएकाले सफारी बन्द गर्न लागिएको निकुञ्जका सूचना अधिकारी अविनास थापामगरले जानकारी दिए।
यद्यपि, निकुञ्जभित्रको जिप सफारी बन्द भए पनि निकुञ्ज आसपासका मध्यवर्ती क्षेत्र तथा सामुदायिक वनहरूमा भने जिप सफारी सञ्चालन हुने जनाइएको छ। निकुञ्जभित्रको सेवा बन्द हुँदा पर्यटकहरू मुख्यतः मध्यवर्ती क्षेत्रतर्फ आकर्षित हुने गरेका छन्।
चितवन राष्ट्रिय निकुञ्जले हरेक वर्ष मध्य असारदेखि असोजको पहिलो सातासम्म वर्षायाम र वन्यजन्तुको प्रजनन अवधिलाई मध्यनजर गर्दै जिप सफारी बन्द गर्ने परम्परा कायम राख्दै आएको छ।
