काठमाडाैं- होटल संघ नेपालले बागमती प्रदेश तदर्थ समितिको अध्यक्षमा भिलेज हाइल्यान्ड रिसोर्ट, रानिकोट (सूर्यविनायक, भक्तपुर) का प्रबन्ध निर्देशक राम सुन्दर बकेलाई मनोनयन गरेको छ। संघको आइतबार सम्पन्न कार्यसमिति बैठकको निर्णयअनुसार बकेलाई बागमती प्रदेश तदर्थ समितिको अध्यक्षको जिम्मेवारी प्रदान गरिएको हो।
बागमती प्रदेश अन्तर्गतका सबै जिल्लालाई समेट्दै प्रदेश समितिलाई प्रभावकारी, समावेशी र सुदृढ बनाउने उद्देश्यका साथ उनलाई उक्त जिम्मेवारी दिइएको होटल संघ नेपालले जनाएको छ। संघले बकेलाई होटल संघ नेपालको विधान तथा कार्यविधिअनुसार बागमती प्रदेशभित्रका जिल्लाका प्रतिनिधिहरूसँग आवश्यक समन्वय गरी प्रदेश समिति गठन गर्न तथा पदाधिकारी र सदस्यहरूको नामावली संघको सचिवालयमा उपलब्ध गराउन अनुरोध गरेको छ।
यस अवसरमा होटल संघ नेपालका अध्यक्ष विनायक शाहले बकेलाई बधाई तथा शुभकामना दिँदै प्रदेशस्तरमा होटल तथा पर्यटन क्षेत्रको विकास, व्यवसायिक हित संरक्षण तथा संघको संगठनात्मक सुदृढीकरणमा उनको नेतृत्व महत्वपूर्ण हुने विश्वास व्यक्त गरेका छन्। होटल संघ नेपालको यो निर्णयले बागमती प्रदेशमा संघको संगठन विस्तारसँगै होटल तथा पर्यटन व्यवसायको प्रवर्द्धन र व्यवसायीहरूको हित संरक्षणमा थप प्रभावकारी भूमिका निर्वाह गर्ने अपेक्षा गरिएको छ।
