काठमाडौं- अहमदिया संघ नेपालले ईद मिलन कार्यक्रम सम्पन्न गरेको छ। शनिबार काठमाडौंको कार्निवल रेष्टुरो एण्ड मिटीङसमा अहमदिया संघ नेपालले ईदको अवसरमा एक भव्य ईद मिलन कार्यक्रम सम्पन्न गरेको हाे ।
कार्यक्रम आपसी सद्भाव, धार्मिक सहिष्णुता र सामाजिक एकताको सन्देश प्रवाह गर्ने उद्देश्यले आयोजना गरिएको थियो। कार्यक्रममा विभिन्न धर्म, समुदाय तथा समाजका अगुवाहरूको उल्लेखनीय उपस्थिति रहेको थियो।
सहभागीहरूले ईद पर्वले मानवता, सहिष्णुता र आपसी भाइचाराको भावना मजबुत बनाउने विश्वास व्यक्त गरे। संघका पदाधिकारीहरूले ईद केवल मुस्लिम समुदायको मात्र पर्व नभई सम्पूर्ण मानव समाजका लागि प्रेम, शान्ति र सहअस्तित्वको सन्देश दिने अवसर भएको बताए। उनीहरूले नेपालजस्तो बहुजातीय र बहुधार्मिक मुलुकमा यस्ता कार्यक्रमले सामाजिक एकता थप मजबुत बनाउने धारणा राखे।
कार्यक्रममा धार्मिक प्रवचन, शुभकामना आदान–प्रदान तथा सामूहिक भोजनको समेत आयोजना गरिएको थियो। सहभागीहरूले एकअर्कालाई ईदको शुभकामना दिँदै समाजमा शान्ति, सद्भाव र सहकार्य कायम राख्नुपर्नेमा जोड दिएका थिए। कार्यक्रमको प्रमुख अतिथि बूढानीलकण्ठ नगरपालिका उपमेयर अनिता लामा ज्यु,लगायतका अतिथिहरुको उपस्थिति रहेको थियो।
कार्यक्रमको अध्यक्षता अहमदिया मुस्लिम जमात नेपालको अध्यक्ष मोहन राउतले गरेका थिए। कार्यक्रमको सञ्चालन अहमदिया संघ नेपालका सदस्य सलीम अहमदले गरेका थिए। यस कार्यक्रमको शुभारम्भ काठमाडौंको सर्किल इन्चार्ज शेख नजीरूलहकद्वारा पवित्र कुरानको पाठबाट भयो। अन्त्यमा आयोजकले उपस्थित सम्पूर्ण अतिथि तथा सहयोगीहरूलाई धन्यवाद व्यक्त गर्दै यस्ता कार्यक्रम आगामी दिनमा पनि निरन्तर गर्ने प्रतिबद्धता जनाएको छ।
![सिण्डिकेटधारीविरुद्ध व्यवसायीको आक्रोशः २५ व्यवसायीको तस्बिरमा जुत्ता प्रहार [भिडियो]](https://www.prabhabonline.com/uploads/posts/200X200/jutta-prahar-bairo-1789318338.jpg)