- देशभर निर्वाचन सुरक्षा सतर्कता कडा
- एकीकृत निर्वाचन सुरक्षा कार्ययोजना कार्यान्वयनमा
- उपत्यकामा दुई सवारीसाधनमा आगजनी गरेको आरोपमा दुर्गा प्रसाईं समूहका दुई जना पक्राउ
- भक्तपुरबाट इन्सास राइफलसहित एक जना नियन्त्रणमा
- निर्वाचन बिथोल्ने आशंकामा १४२ जना पक्राउ
- अफवाह फैलाउने ३२ जना समातिए
- सुरक्षा अवस्था नियन्त्रणमै रहेको प्रहरीको दाबी
निर्वाचन विरोधी गतिविधि, अफवाह फैलाउने र आचारसंहिता उल्लंघन गर्नेहरूलाई निगरानीमा राखिएको छ ।
अविनारायण काफ्ले
प्रवक्ता, नेपाल प्रहरी
- सेनाले भन्यो- सुरक्षा मजबुत छ, ढुक्कले मतदानमा सहभागी बनौं
काठमाडौं- प्रतिनिधिसभा सदस्य निर्वाचनअन्तर्गत मौन अवधिको पहिलो दिन मंगलबार केही स्थानमा भएका छिटफुट घटनाबाहेक देशभरको अवस्था सामान्य रह्यो । सुरक्षा अधिकारीहरूका अनुसार छिटफुट आगजनी, शंकास्पद वस्तु फेला पर्नेजस्ता घटना भए पनि समग्र सुरक्षा अवस्था नियन्त्रणमै देखिएको हो ।
सरकारले निर्वाचनलाई शान्तिपूर्ण र भयरहितरुपले सम्पन्न गर्न एकीकृत निर्वाचन सुरक्षा कार्ययोजना २०८२ मा कार्यान्वयनमा ल्याएको छ । यसअनुसार नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागले संयुक्त रूपमा गस्ती, पेट्रोलिङ र निगरानी बढाएका छन् । नेपाली सेनाले बख्तरबन्द गाडीसहित उपत्यकाका संवेदनशील क्षेत्रमा गस्ती तीव्र बनाएको छ भने मोटरसाइकल गस्तीसमेत सक्रिय छ ।
यद्यपि, मौन अवधिको पहिलो दिन मंगलबार बिहानै काठमाडौंका दुई स्थानमा सवारीसाधनमा आगजनी भयो । सुकेधारामा बा ७ च १४०१ नम्बरको गाडी र नैकापमा बिएए २८३६ नम्बरको गाडीमा आगजनी भएको हो । जिल्ला प्रहरी परिसर काठमाडौंका प्रहरी उपरीक्षक (एसपी) पवनकुमार भट्टराईका अनुसार घटनास्थलमा दुर्गा प्रसाईं समूहको पर्चा फेला परेको थियो । घटनाको अनुसन्धान गरिरहेको प्रहरीले दुई जनालाई पक्राउ गरिसकेको छ । पक्राउ पर्नेहरूमा सुर्खेतको वीरेन्द्रनगर नगरपालिका घर भइ काठमाडौंको चन्द्रागिरी नगरपालिका-६ बस्ने २८ वर्षीय सुमन बोहरा र सोही ठाउँ स्थायी ठेगाना भएका ५५ वर्षीय कृष्ण मिजार छन् ।
उनीहरूलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो । कार्यालयका प्रहरी वरिष्ठ उपरीक्षक (एसएसपी) सन्तोष खड्काका अनुसार उनीहरूलाई चन्द्रागिरिबाट पक्राउ गरिएको हो । उनले भने, ‘पक्राउ परेका दुवै जना प्रसाईं समूहका कार्यकर्ता हुन् । हामीले आगजनी घटनाबारे थप अनुसन्धान थालेका छौं ।’
प्रसाईंलाई भने यसअघि नै भक्तपुरस्थित निवासबाट पक्राउ गरिएको थियो । उनी निर्वाचन सकिएपछि मात्रै हिरासतमुक्त हुने भएका छन् । जिल्ला प्रशासन कार्यालय भक्तपुरले उनलाई आइतबार मात्रै पाँच दिन हिरासतमा राखेर अनुसन्धान गर्न अनुमति दिएको थियो । प्रसाईं हिरासतमा छँदा उनका समूहले मंगलबार पनि सवारीसाधनमा आगजनी गरेको हो । मंगलबार नै सशस्त्र प्रहरीले भक्तपुरको सूर्यविनायक-८ भुम्डोलबाट इन्सास राइफल र गोलीसहित एक जनालाई पक्राउ गरेको छ । पक्राउ पर्ने ३१ वर्षीय आयन सेढाईं रहेका छन् । उनको साथबाट राइफल, विभिन्न प्रकारका गोली, खुकुरी, बञ्चरो र सिरिञ्ज बरामद भएको प्रहरीले जनाएको छ ।
बरामद हतियार गत भदौ २३ र २४ गतेको जेन-जी विद्रोहको क्रममा सुरक्षाकर्मीबाट लुटिएको हुनसक्ने आशंका छ । तर, प्रारम्भिक अनुसन्धानले उनी प्रत्यक्षरूपमा निर्वाचन बिथोल्ने योजनामा सक्रिय रहेको पुष्टि नभएको जनाइएको छ । उता कोशीको राजधानी विराटनगरमा जिल्ला प्रशासन कार्यालय नजिकै बमजस्तो देखिने शंकास्पद वस्तु भेटिएपछि मंगलबार बिहानै त्रास फैलियो । नेपाली सेनाको बम डिस्पोजल टोलीले उक्त वस्तु निष्क्रिय पार्दा त्यो हाँडी रहेको खुल्यो । मधेसको बर्दिबासमा पर्ने रातु पुलमा पनि त्यस्तै शंकास्पद वस्तु फेला परेको र सेनाले डिस्पोज गरेको जनाएको छ ।
देशभर १४२ जना पक्राउ
निर्वाचन बिथोल्ने आशंकामा देशभरबाट १४२ जना पक्राउ परेका छन् । नेपाल प्रहरीका केन्द्रीय प्रवक्ता तथा प्रहरी नायव महानिरीक्षक अविनारायण काफ्लेका अनुसार पक्राउ गरिएकामध्ये ७६ जना हिरासतमा रहेको बताए । ६६ जना भने अनुसन्धानपछि छुटेका छन् । सोमबार मात्रै ९ जना पक्राउ परेका थिए । उनले भने, ‘निर्वाचन विरोधी गतिविधि, अफवाह फैलाउने र आचारसंहिता उल्लंघन गर्नेहरूलाई निगरानीमा राखिएको छ ।’
नेपाल प्रहरीको प्रधान कार्यालयअन्तर्गतको केन्द्रीय निर्वाचन सेलले सामाजिक सञ्जालमार्फत अफवाह फैलाउने ३२ जनालाई नियन्त्रणमा लिएको जनाएको छ । साइबर सेलमार्फत सातै प्रदेशमा निगरानी बढाइएको छ । पक्राउ परेकामध्ये १५ जनालाई हिरासतमा राखेर अनुसन्धान अघि बढाएको प्ररही प्रवक्ता काफ्लेले बताए ।
उनका अनुसार ‘चुनाव हुँदैन’ भन्ने अभिव्यक्ति दिएका ज्योतिष रुद्रनाथ अधिकारीलाई पनि काठमाडौंको चन्द्रागिरिबाट पक्राउ गरिएको छ ।
विष्फोटमा बालबालिका घाइते
धनुषाको मिथिला नगरपालिका-२ मा को बडहरी पुलमा बम विष्फोट हुँदा दुई जना बालबालिका घाइते भएका छन् । विष्फोटमा मिथिला-८ जमुनिवासकी १५ वर्षीया आशा भुजेल र आठ वर्षीय सुशील माझी घाइते भएका हुन् । जिल्ला प्रहरी कार्यालय धनुषाका प्रवक्ता प्रहरी नायव उपरीक्षक (डिएसपी) गणेशबहादुर बमका अनुसार विष्फोटमा घाइते भएका दुवै बालबालिकाको अवस्था सामान्य छ । विष्फोट भएको बस्तु के थियो भन्ने स्पष्ट भइसकेको छैन । त्यसबारे थप अनुसन्धान भइरहेको डिएसपी बमले बताए ।
धनुषा-१ का रास्वपा उम्मेदवार साहको उम्मेदवारी खारेज
निर्वाचन आयोगले धनुषा-१ का राष्ट्रिय स्वतन्त्र पार्टी (रास्वपा) उम्मेदवार किशोरी साहको उम्मेदवारी खारेज गरेको छ । बैंक तथा वित्तीय संस्थाको कालोसूचीमा पटक-पटक परेको आधारमा साहको उम्मेदवारी खारेज गरिएको आयोगले जनाएको छ ।
आयोगका कार्यवाहक प्रमुख आयुक्त रामप्रसाद भण्डारीले आयोगमा प्राप्त उजुरीअनुसार प्रमाण पर्याप्त देखिएपछि उम्मेदवारी खारेजीको निर्णय गरिएको हो । साहविरुद्ध बैंक तथा वित्तीय संस्थाको कालोसूचीमा रहेको भन्दै उजुरी परेको थियो । उजुरीको छानबिनका क्रममा कर्जा सूचना केन्द्रको विवरणमा साह एकपटक होइन, आठपटकसम्म कालोसूचीमा परेको तथ्य भेटिएको आयोगले जानकारी दिएको छ ।
निर्माण व्यवसायी साह पहिलोपटक २०८० वैशाख १७ गते कालोसूचीमा परेका थिए । त्यसबेला उनकी साझेदार अञ्जली साह पनि कालोसूचीमा परेकी थिइन् । त्यसपछि २०८० असोज १७ गते साह र सञ्जितकुमार साह पुनः कालोसूचीमा परेका थिए । सोही मितिमा उनीहरू अर्को सूचीमासमेत दर्ता भएको रेकर्ड भेटिएको छ ।
त्यसको दुई दिनपछि १९ असोजमा साहसहित रामकुमार महासेठलाई सूचना केन्द्रले कालोसूचीमा राख्यो । २१ असोजमा पुनः साह र महासेठलाई अर्कोे सूचीमा राखिएको थियो । २०८० माघ २२ गते साह फेरि कालोसूचीमा परे, जसमा सञ्जितकुमार साह पनि संलग्न थिए ।
रास्वपाबाट टिकट लिएर चुनावी मैदानमा उत्रिसकेपछि समेत साह कालोसूचीमा परेको विवरण सार्वजनिक भएको थियो । गत माघ ४ र १० गते पनि उनलाई कालोसूचीमा राखिएको कर्जा सूचना केन्द्रको अभिलेखमा देखिएको छ ।
यसरी आठपटकसम्म कालोसूचीमा परेको तथ्य पुष्टि भएपछि आयोगले मंगलबार साहको उम्मेदवारी खारेज गरिदिएको हो । यससँगै रास्वपा धनुषा-१ मा उम्मेदवारविहीन बनेको छ ।
रास्वपाका समर्थकहरूले प्रत्यक्षमा अन्य पार्टीका उम्मेदवारहरूलाई रोज्नुपर्ने भएको छ । यद्यपि, मतपत्रमा भने घण्टी चिह्न कायम रहने छ । निर्वाचन आयोगका प्रवक्ता नारायणप्रसाद भट्टराईका अनुसार यदि उम्मेदवारविनाको निर्वाचन चिह्नमा मत आए स्वतः बदर हुने छ ।
साहले रास्वपा प्रवेश गरेकै दिन टिकट पाएका थिए । त्यसअघि उनी डा. चन्द्रकान्त राउत नेतृत्वको जनमत पार्टीमा थिए । साहको राजनीतिक पृष्ठभूमि भने एमालेबाट सुरु भएको हो । उनले २०७४ सालको निर्वाचनमा धनुषा १ (क) बाट एमालेको प्रवेशसभा उम्मेदवार बनेर जित हासिल गरे । २०७९ सालमा एमालेबाट टिकट नपाएपछि जनमत प्रवेश गरेर प्रतिनिधिसभा उम्मेदवार बने । तर, तेस्रो स्थानमा रहँदै पराजित भए । जनमतबाट फेरि टिकट पाउने अवस्था नदेखेपछि अहिले फेरि चुनावको मुखमा रास्वपा प्रवेश गरेर टिकट हत्याएका थिए ।
तर, एक करोड २५ लाखको चेक बाउन्स र १२ करोड रुपैयाँ बराबरको पुल निर्माण सात वर्षदेखि अलपत्र पारेको आरोप उनीमाथि छ । यसपछि उनलाई कर्जा सूचना केन्द्रले कालोसूचीमा २०८० को वैशाखदेखि राखेको हो ।
साहको उम्मेदवारी खारेज भएसँगै धनुषा-१ मा अब अन्य प्रमुख दलबीच प्रतिस्पर्धा हुने देखिएको छ । उक्त क्षेत्रमा नेपाली कांग्रेसका रामपलटन साह, नेकपा एमालेका रामचन्द्र मण्डल र नेपाली कम्युनिस्ट पार्टी (नेकपा)बाट मातृकाप्रसाद यादव चुनावी मैदानमा छन् । हालसम्म उक्त क्षेत्रमा ४२ जना उम्मेदवार प्रतिस्पर्धामा रहेको जनाइएको छ ।
