- निर्वाचन हुन २५ दिनमात्र बाँकी हुँदा सार्वजनिक भएनन् दलका घोषणापत्र
- कांग्रेस सभापति गगन थापा, एमाले अध्यक्ष केपी शर्मा ओलीको नेतृत्वमा घोषणापत्र लेख्दै
- छिट्टै घोषणापत्र सार्वजनिक गर्ने तयारीमा नेकपा र रास्वपा
- जेन-जी विद्रोहपछि नयाँ मुद्दा घोषणापत्रमार्फत सार्वजनिक गर्नुपर्ने बाध्यतामा पुराना दल
- नयाँ दलहरू पुरानालेभन्दा फरक र मतदाता आकर्षित गर्ने घोषणापत्र ल्याउनुपर्ने दबाबमा
सभापतिज्यूलाई घोषणापत्र लेखनको जिम्मेवारी केन्द्रीय समितिको पहिलो बैठकले दिएको हो र उहाँकै नेतृत्वमा घोषणापत्र लेख्ने काम भइरहेको छ, छिट्टै सार्वजनिक हुन्छ ।
देवराज चालिसे
प्रवक्ता, नेपाली कांग्रेस
काठमाडौं- प्रतिनिधिसभा सदस्यको निर्वाचन हुन २५ दिन बाँकी छ । राजनीतिक दलका र स्वतन्त्र उम्मेदवारहरू घरदैलो अभियानमा छन् । फागुन ४ गतेपछि औपचारिकरुपमा चुनावीसभामा उम्मेदवारहरू निस्किने छन् । निर्वाचन आयोगले चुनावी तयारी तीव्र पारेको छ । सरकारले चुनावी सुरक्षाका लागि एक महिनाअघि नै नेपाली सेनालाई सडकमा उतारेको छ । म्यादी प्रहरीहरू तालिममा छन् । नेपाल प्रहरी र सशस्त्र प्रहरी केन्द्रीय सुरक्षा रणनीतिअनुसार परिचालित हुन भने बाँकी छ । यसरी सुरक्षा दृष्टिले पनि देश चुनावमय भएको देखाउँछ ।
‘समृद्ध नेपाल, सुखी नेपाली’को राष्ट्रिय अभिभारालाई हामीले पूरा गर्नुछ । त्यसका लागि पहिलो सर्त भनेकै एमालेलाई निर्णायक शक्ति बनाउनु हो, त्यो संकल्पसहितको स्पष्ट कार्यक्रम समेटेर घोषणापत्र बनाउँछौं ।
प्रदीप ज्ञवाली
नेता, नेकपा एमाले
चुनावबाट जनादेश प्राप्त गरी वैधानिकरूपले सत्ताको नेतृत्व गर्ने दलीय आकांक्षा छ । त्यसका लागि दलहरूले जनतामाझ एकल बहुमत आए पाँच वर्षे संसद्को कार्यकालमा गर्न सकिने कार्यक्रमिक रूपरेखासमेत भनिने घोषणापत्र सार्वजनिक गर्ने प्रचलन छ । तर, अहिलेसम्म दलहरूले घोषणापत्र सार्वजनिक गरेका छैनन् । नेपाली कांग्रेसले सभापति गगन थापाको नेतृत्वमा घोषणापत्र तयार पार्दै छ । विशेष महाधिवेशनपछि ललितपुरको कुपण्डोलस्थित एक होटलमा बसेको पार्टीको पहिलोपटक केन्द्रीय समिति बैठकले सभापति थापाको नेतृत्वमा घोषणापत्र लेख्ने निर्णय गरेको थियो । सोहीअनुसार घोषणापत्र लेखनको काम भइरहेको प्रवक्ता देवराज चालिसेले बताए ।
‘सभापतिज्यूलाई घोषणापत्र लेखनको जिम्मेवारी केन्द्रीय समितिको पहिलो बैठकले दिएको हो र उहाँकै नेतृत्वमा घोषणापत्र लेख्ने काम भइरहेको छ, छिट्टै सार्वजनिक हुन्छ,’ उनले भने । उनका अनुसार घोषणापत्र लेखन विशेष महाधिवेशनमा पारित तत्कालीन महामन्त्रीद्वय थापा र विश्वप्रकाश शर्माको प्रस्तुत प्रतिवेदनका आधारमा हुने छ ।
नेकपा एमालेको घोषणापत्र अध्यक्ष केपी शर्मा ओली नेतृत्वको समितिले लेख्दै छ । नेता प्रदीप ज्ञवालीका अनुसार एमालेले ‘समृद्ध नेपाल, सुखी नेपाली’को मूल अभिभारालाई पूरा गर्नेगरी घोषणापत्रमा कार्यक्रम समेटिने छ । उनले घोषणापत्र एमालेलाई निर्णायक शक्ति बनाउने संकल्पसहितको हुने बताए ।
‘देश अहिले संकटमा छ, संकटबाट देशलाई मुक्त गर्दै एमालेले विगतमा भन्दै आएको समृद्ध नेपाल, सुखी नेपालीको राष्ट्रिय अभिभारालाई हामीले पूरा गर्नुछ,’ उनले भने, ‘त्यसका लागि पहिलो सर्त भनेकै एमालेलाई निर्णायक शक्ति बनाउनु हो, त्यो संकल्पसहितको स्पष्ट कार्यक्रम समेटेर घोषणापत्र बनाउँछौं ।’ अध्यक्ष ओली संयोजक रहेको घोषणापत्र मस्यौदा कमिटीमा उपाध्यक्षद्वय रामबहादुर थापा र विष्णु पौडेल, महासचिव शंकर पोखरेल, नेताहरू ईश्वर पोखरेल, प्रदीप ज्ञवाली र विष्णु रिमाल सदस्य छन् ।
नेपाली कम्युनिस्ट पार्टी (नेकपा)ले यो निर्वाचनमा सुशासन, सामाजिक न्याय र समृद्धिको प्रमुख मुद्दा घोषणापत्रमा समेट्ने जनाएको छ । नेकपाको घोषणापत्र लेखन समितिका सदस्य राजेन्द्र श्रेष्ठका अनुसार घोषणापत्र मस्यौदा कमिटीले मस्यौदा तयार गरिरहे पनि सार्वजनिक गर्ने मिति तय भइसकेको छैन । नेकपाको घोषणापत्र लेखन समितिमा नेता प्रमेश हमाल, भीम रावल, देव गुरुङ, गिरिराजमणि पोखरेल, शक्ति बस्नेत, हरिबोल गजुरेल, राजेन्द्र श्रेष्ठ, पम्फा भुसाल, रामचन्द्र झा, हरि चौधरी, हाकिकुल्ला खाँ, अजम्बर काङबाङलगायत छन् ।
राष्ट्रिय स्वतन्त्र पार्टी (रास्वपा)ले उपसभापति स्वर्णिम वाग्लेको संयोजकत्वमा घोषणापत्र तयार गरिरहेको छ । महामन्त्री कविन्द्र बुर्लाकोटीका अनुसार घोषणापत्र तयारी अन्तिम चरणमा पुगेको र केही दिनमा सार्वजनिक गरिने छ । ‘हाम्रो घोषणापत्र फाइनल हुन लाग्यो र छिट्टै सार्वजनिक गर्छौं,’ उनले भने, ‘जेन-जी आन्दोलनको मूल भावना त्यहाँ समेटिन्छ ।’
राष्ट्रिय प्रजातन्त्र पार्टी, जनमत पार्टी, श्रम संस्कृति पार्टी, उज्यालो नेपाल, नेकपा संयुक्तलगायत दलले पनि चुनावी घोषणापत्र बनाइरहेका छन् । आगामी निर्वाचनमा नयाँ दलहरू जेन-जी आन्दोलनको रापतापलाई आफ्नो पक्षमा पार्ने प्रयासमा छन् । पुराना दलहरू आफ्नो वर्चश्व जोगाउन कसरतमा देखिएका छन् । उनीहरूसामु गत भदौ २३ र २४ मा भएको जेन-जी आन्दोलनपछि घोषणापत्रमार्फत नयाँ मुद्दा अघि सार्ने दबाबमा छन् । नयाँ दलहरूले पनि पुरानाभन्दा फरक र जनचाहनाअनुसारका मुद्दा समेटेर मतदाता आकर्षित गर्नेगरिको घोषणापत्र तयार गर्नुपर्ने स्थिति देखिएको छ ।
यहीबीच विगतका निर्वाचनमा दल र उम्मेदवारहरूले मत माग्न जाँदा घोषणापत्रमा गरेका बाचा कार्यान्वयन नभएकोमा चर्कोे आलोचना भइरहेको छ । त्यसो हुँदा निर्वाचनमा पुराना दललाई कार्यान्वयन गर्न सक्ने ठोस कार्यक्रम र योजनामात्र घोषणापत्रमा राख्नुपर्ने बाध्यता छ ।
