काठमाडौं– शैक्षिक संस्थाहरू अनिश्चितकाललाई बन्द हुने भएका छन् । सरकारले कोरोना जोखिम रहेकाले अर्को सूचना जारी नभएसम्म शैक्षिक संस्था बन्द रहने जनाएको हो । यस्तै, सीमानाका ३१ भदौसम्म बन्द गर्ने निर्णय गरिएको छ । सोमबार बसेको मन्त्रिपरिषद्का निर्णयहरू मंगलबार सार्वजनिक गर्दै सरकारका प्रवक्ता डा.युवराज खतिवडाले अर्को सूचना जारी नभएसम्मका लागि विद्यालय एवं शैक्षिक संस्थाहरू बन्द रहने र सीमानाका ३१ भदौसम्म बन्द गर्ने निर्णय भएको बताए ।
यस्तै, यसअघि सरकारले होटल तथा रेष्टुरेण्टको सेवा खुला गरेकोमा अब होटल तथा रेस्टुरेन्टबाट तयार गरिएका खाद्य परिकार लैजाने सेवा मात्र दिने निर्णय गरेको छ । दिनदिनै कोरोनाको उच्च जोखिम बढ्दै गएकोले सरकारले यसअघिका आफ्नो निर्णयमा हेरफेर गरेको हो । मंगलबारमात्रै देशभर थप ६३८ जनामा कोरोना संक्रमण देखिएको छ । जसमध्ये काठमाडौं उपत्यकामा पछिल्लो २४ घण्टामा थप १३४ जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले विभिन्न प्रयोगशालामा गरिएको परीक्षणमा मंगलबार थप १३४ जनामा कोरोना संक्रमण भएको पुष्टि जानकारी दिए हुन् । काठमाडौंका ११०, भक्तपुरमा ८ र ललितपुरमा १६ जनामा गरी कुल १३४ जनामा कोरोना पुष्टि भएको स्वास्थ्य मन्त्रालयले जनाएको छ । यस्तै, स्वास्थ्य तथा जनसंख्या मन्त्रालयका प्रवक्ता डा. गौतमका अनुसार नयाँसहित कूल संक्रमितको संख्या २३ हजार ९४८ पुगेको भने कोरोनाबाट थप चारको मृत्यु भएको छ । मन्त्रालयका प्रवक्ता प्राडा गौतमले धनुषा, काभ्रेपलाञ्चोक र सिन्धुपाल्चोकका गरी थप चारको मृत्यु भएको जानकारी दिए ।
मृत्यु हुनेमा धनुषाका ५० र ६० वर्षीय पुरुष रहेका छन् । त्यस्तै काभ्रेका ५० वर्षीया महिला तथा सिन्धुपाल्चोकका ८४ वर्षीय पुरुष छन् । पछिल्लो २४ घण्टामा १७१ जना कोरोना जितेर डिस्चार्ज भएका छन् भने हालसम्म कोरोना संक्रमणमुक्त हुनेको संख्या १६ हजार ६६४ पुगेको मन्त्रालयले जनाएको छ ।
प्रवक्ता डा. खतिवडाले कोरोना संक्रमण बढ्दै गएकाले कार्यसम्पादन एवं सेवा प्रवाहका लागि बढीमा ५० प्रतिशत कर्मचारी कार्यालयमा आलोपालो गरी उपस्थित हुने र अन्य कर्मचारीहरूलाई सुरक्षित रूपमा घरबाटै सम्पादन गर्ने गरी ‘वर्क फ्रम होम’को निर्णय गरिएको बताए । सो व्यवस्था सम्बन्धित कार्यालय प्रमुखले मिलाउने पनि उनले बताए ।
अनलाइन, भर्चुअल वा विद्युतीय माध्यमबाट सेवा प्रवाह गर्न सम्भव नहुने र बढी जनसम्पर्क हुने कार्य अर्को निर्णय नभएसम्मका लागि स्थगित गर्ने पनि सरकारले निर्णय गरेको छ । संक्रमणको जोखिम बढ्दै गएको देखिएको हुँदा धार्मिकस्थलहरूमा दैनिक नित्य पूजाबाहेक अन्य कुनै पनि गतिविधि सञ्चालन नगर्ने नगराउने निर्णय पनि भएको छ ।
यस्तै, सबै प्रकारका सभा, गोष्ठी, तालिम, सेमिनार, सबै प्रकारका प्रदर्शन, भेला तथा सम्मेलन, सिनेमा हल, पार्टी प्यालेस, डान्सबारलगायतका मनोरञ्जन स्थल, सैलुन, ब्युटीपार्लर तथा स्पा, स्वीमिङ पुल, जिमखानालगायत हेल्थ क्लब, समूहमा खेलिने खेलकुद र खेल मैदानमा हुने प्रस्तुति, सबै प्रकारका धार्मिक तथा सामाजिक स्थल, पुस्तकालय, संग्रहालय र चिडियाखाना हाल सञ्चालन निषेधकै अवस्थामा रहेको हुँदा सम्बन्धित मन्त्रालयबाट यसको नियमित अनुगमन गरी कडाइका साथ पालना गर्ने गराउने एवं उल्लंघन गर्नेलाई प्रचलित कानुनबमोजिम कारबाही गर्ने पनि खतिवडाले बताए ।
