काठमाडौं– भदौ मसान्तसम्म विद्यालय बन्द रहने भएको छ । सरकारले यसअघि १ भदौबाट विद्यार्थी भर्ना लिन सकिने भने पनि सोमबार बसेको मन्त्रिपरिषद् बैठकले भदौ मसान्तसम्म विद्यालय बन्द गर्ने निर्णय गरेको हो ।
त्यस्तै, बैठकले सरकारले भदौ १ गतेदेखि सुचारु गर्ने भनेको लामो दूरीका यातायात र हवाई यातायात भदौ मसान्तसम्म बन्द राख्ने निर्णय गरेको छ । भदौ १ गतेदेखि संचालन गर्ने गरी अनुमति प्रदान गरिएका छोटो, मध्यम र लामो दूरीमा अन्तरजिल्ला सञ्चालन हुने निजी तथा सार्वजनिक यात्रुबाहक सवारीसाधनहरू, आन्तरिक तथा अन्तर्राष्ट्रिय व्यावसायिक उडानहरू, प्रशिक्षण खेलकुद, विद्यार्थी भर्ना, शैक्षिक तथा अन्य परीक्षा सञ्चालनजस्ता कार्यहरू आगामी भदौ मसान्तसम्म स्थगित गर्ने निर्णय गरेको स्रोतको दाबी छ ।
कलकारखाना, उद्योग, निर्वाध रूपमा सञ्चालन भइ मजदुरहरूको दैनिक आवतजावत बढेकाले संक्रमणको जोखिम पनि बढेको भन्दै उद्योग तथा कलकारखानाभित्र क्वारेन्टिनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने निर्णय पनि मन्त्रिपरिषद् बैठकले गरेको छ ।
यसअघि साउन ५ गतेको मन्त्रिपरिषद् बैठकले १२० दिन लामो लकडाउन अन्त्य गर्दै लामो दूरीका यातायात, बाह्य तथा आन्तरिक हवाई उडान १ भदौदेखि खोल्ने निर्णय गरेको थियो । बैठकले सीमा नाकामा पनि अवैध आवतजावत जारी रहेको भन्दै थप कडाइ गर्ने निर्णय गरेको छ । साथै उपत्यका प्रवेश गर्ने नाकामा पनि कडाई गर्ने निर्णय गरेको छ ।
उपत्यकामा अत्यावश्यकबाहेक सबै सेवा बन्द
कोरोना संक्रमण फैलँदै गएपछि काठमाडौ उपत्यकाभित्रका स्थानीय तहले प्रवाह गर्ने अत्यावश्यकबाहेक १५ दिनमा लागि सबै सेवा बन्द गर्ने निर्णय गरेका छन् । सोमबार उपत्यकाभित्र रहेका नगरपालिकाका मेयरहरूको संगठन ‘नगरपालिका मेयर फोरम’को बैठकले स्थानीय तहबाट प्रवाह हुने अत्यावश्यकबाहेक अरु सेवा बन्द गर्ने निर्णय गरेको हो ।
फोरमका अध्यक्ष तथा काठमाडौं महानगरपालिकाका मेयर विद्यासुन्दर शाक्यका अनुसार समुदायमा कोरोना संक्रमण फैलिन जोखिम रहेकाले यस्तो निर्णय गरिएको हो । उपत्यकाभित्र समूदायस्तरमा संक्रमणको उच्च जोखिम देखिएसँगै भीडभाड कम गर्न अत्यावश्यकबाहेक सबै सेवा बन्द गर्ने निर्णय भएको उनले बताए ।
बैठकले सार्वजनिक यातायात पूर्ण रूपमा सञ्चालन भएपछि संक्रमण तीव्र गतिमा फैलिएको भन्दै सार्वजनिक यातायात सञ्चालनमा १५ भदौसम्म पुनः रोक लगाउन सरकारलाई अनुरोध गर्ने निर्णय गरेको छ । साथै, कलकारखाना, उद्योगधन्दाहरू, निर्वाध रूपमा सञ्चालन भइरहेका र मजदुरहरूको दैनिक आवतजावत बढेकाले संक्रमणको जोखिम बढेकोले उद्योग तथा कलकारखाना भित्रै क्वारेन्टाइनको व्यवस्था गर्ने र स्वास्थ्य मापदण्ड पूरा गरेपछि मात्रै सञ्चालन गर्न दिने पनि बैठकले निर्णय गरेको छ ।
काठमाडौं उपत्यकामा घनावस्ती रहेकाले कोरोना संक्रमण समुदायस्तरमा पुग्ने खतरा रहेको भन्दै उपत्यका प्रवेश गर्ने र प्रस्थान गर्ने विन्दूहरूमा कडाई गर्न सरकारलाई अनुरोध गर्ने निर्णय समेत बैठकले गरेको छ ।
संक्रमण फैलन सक्ने अवस्थालाई ध्यानमा राख्दै सरकारको समर्थन वा विरोधमा ¥याली, भेला, अनसन, जुलुुसलगायतका गतिविधिमा कडाईका साथ निषेध गर्ने र भीड हुने साँस्कृतिक गतिविधि जात्रा पर्व सञ्चालनमा रोक लगाउन सरकारलाई अनुरोध गर्ने निर्णय बैठकले गरेको छ । यस्तै मास्क नलगाई आवतजावत गर्न तथा मास्कलाई उपयुक्तरूपमा प्रयोग नगर्नेहरूलाई कारबाही गर्ने विषयमा समन्वय गर्ने निर्णय पनि बैठकले गरेको छ ।
साथै, पीसीआर परीक्षणको आर्थिक भार बढी हुने र यसको उपयोगिता परीक्षण गरिएको सिमित अवधिलाई मात्र रहने भएकाले परीक्षणको दायरा र दरलाई बढाउनेमात्रै भन्दा संक्रमण रोकथामका लागि क्वारेन्टाइनको संख्या र गुणस्तरमा ध्यान दिने निर्णय समेत भएको बैठकपछि प्रमुख शाक्यले जानकारी दिएका छन् ।
