काठमाडौं- राष्ट्रिय प्रजातन्त्र पार्टी (राप्रपा)मा शक्ति संघर्ष चलिरहेको बेला कुटपिटको घटना भएको छ । अध्यक्ष राजेन्द्र लिङ्देनका स्वकीय सचिव छत्र खडायत नै कुटपिटमा उत्रिएका हुन् ।
उनले बुधबार साँझ पार्टी केन्द्रीय कार्यालय धुम्बाराही नजिकको छाप्रो रेस्टुरेण्टमा चिया खाइरहेका पार्टीकै युवा नेता राजु गैरेलाई मोटरसाइकलको हेलमेटले कुटपिट गरेको सिसिटिभी फुटेजमा देखिएको छ । गैरेले प्रभावलाई बताएअनुसार ‘अध्यक्ष (राजेन्द्र)सँग निहुँ खोज्ने ? अध्यक्षले कुट भन्नुभएको छ, तँलाई म मार्दिन्छु’ भन्दै खडायतले आक्रमण गरे । पीडित गैरेले आफूलाई एक जना नचिनेका मान्छेले पक्रेको र खडायतले हेल्मेटले तीन/चारपटक प्रहार गरेको बताए । रेस्टुरेण्टमा भएका अन्यले छुट्याएकाले आफ्नो ज्यान जोगिएको उनको भनाइ छ ।
‘साइडमा लगेर हान्दै थियो । अर्को मान्छे थियो, त्यसले मलाई पक्रेको थियो र अरुले छुट्याएपछि मात्रै ज्यान बच्या हो,’ उनले भने, ‘गुण्डागर्दी शैलीमा ममाथि आक्रमण भयो ।’ घटना बुधबार साँझ ६ः३० बजेतिरको हो । घटनापछि पीडित गैरेले खठायतमाथि हदैसम्मको कानुनी कारबाहीको माग गर्दै महाराजगञ्जस्थित प्रहरी वृत्तमा उजुरी दिएका छन् । वृत्तले घटनाबारे थप अनुसन्धान भइरहेको र खडायतको खोजी भइरहेको जनाएको छ । खडायतलाई घटनाबारे बुझ्न खोज्दा उनको फोन ‘स्वीच अफ’ गरिएको थियो ।
