कांग्रेस भनेको राष्ट्रिय शक्ति हो । राष्ट्रको अगाडि आएको समस्या बुझ्छ । चिन्नसक्ने खुबी कांग्रेसमा छ । त्यसलाई सम्बोधन गर्ने सामाथ्र्य पनि राख्छ । देशभित्र एउटा उकुसमुकुस छ । तन्नेरी नौ जवानलाई देशप्रतिको भरोसा टुटेको छ । यो अप्ठ्यारोबाट देशलाई बाहिर निकाल्ने कांग्रेसले हो ।
गगन थापा
महामन्त्री, नेपाली कांग्रेस
काठमाडौं– सत्तारुढ दल नेपाली कांग्रेस र नेकपा एमालेमा फेरि खटपट सुरु भएको छ । केही समय मौन रहेका उच्चस्तरीय राजनीतिक संयन्त्रका सदस्यसमेत रहेका कांग्रेस महामन्त्री गगन थापाले सोमबार खटपटको संकेत गरेका हुन् ।
कांग्रेस चौतर्फी खुसी हुनुपर्ने बेलामा पनि देश भने अप्ठ्यारो अवस्थामा पुगिसकेको थापाले तर्क गरे । चैत २४ देखि गभर्नर पद रिक्त रहेको तर उक्त पदमा सत्तारुढ दल एमाले र कांग्रेसबीच नै हानथाप छ । तर थापाले गभर्नर कांग्रेसले पाउने उल्लेख गर्दै देशको नेतृत्वमा कांग्रेस पुग्नुपर्ने बेला आइसकेको तर्क गरे । ‘हामी अहिले नेपालको सबैभन्दा ठूलो पार्टी हो । सबैतिर सरकारमा छौं । पालिका, वडा, प्रदेश, संघ सबै सरकारमा छौं । अहिले हामीले बनाएको प्रधानमन्त्री र हुनेवाला प्रधानमन्त्री पनि हाम्रो, अब गभर्नर हाम्रो, सबै हाम्रो । खुसी हुनुपर्ने हो नि कांग्रेस । सबैतिर हाम्रो भएको बेलामा,’ थापाले भने ।
उनले कांग्रेस नेपालको राष्ट्रिय शक्ति भएको जिकिर गर्दै देशमा देखिएको समस्या चिनेर समाधान गर्ने जिम्मेवारी पनि आफूहरुको काँधमा आएको बताए । ‘कांग्रेस भनेको राष्ट्रिय शक्ति हो । राष्ट्रको अगाडि आएको समस्या बुझ्छ । चिन्नसक्ने खुबी कांग्रेसमा छ । त्यसलाई सम्बोधन गर्ने सामाथ्र्य पनि राख्छ । देशभित्र एउटा उकुसमुकुस छ । तन्नेरी नौ जवानलाई देशप्रतिको भरोसा टुटेको छ । यो अप्ठ्यारोबाट देशलाई बाहिर निकाल्ने कांग्रेसले हो,’ महामन्त्री थापाले भने । वैशाखयता राजनीतिक संयन्त्रको बैठक पनि बस्न सकेको छैन ।
हामीले एमाले नेतृत्वलाई पनि भनेका छौं, गठबन्धन भनेको एकअर्काको ‘प्वाइन्ट अफ भ्यु’लाई बुझ्ने हुनुपर्छ । मैले जे सोच्छु, त्यही नै ध्रुवसत्य हो, अरूले मेरो किन विरोध गरिरहेका होलान् भन्ने मानसिकताबाट गठबन्धन बन्दैन ।
डा. प्रकाशशरण महत
प्रवक्ता, नेपाली कांग्रेस
थापाले असन्तुष्टि व्यक्त गर्दै गर्दा सोमबार साँझ मन्त्रिपरिषद् बैठक बस्दै थियो । यद्यपि, प्रधानमन्त्री केपी शर्मा ओली र कांग्रेस सभापति शेरबहादुर देउवाको भेट तय भयो । बालुवाटारमा तय भएको भेट हुन नसकेको एमालेकै नेताहरु बताउँछन् । पछिल्लो समय नेपाल राष्ट्र बैंकको गभर्नर नियुक्तिको विषय पेचिलो बन्दै गएको छ । गभर्नर कांग्रेसले पाउने सहमति भइसकेको भनेर देउवाले सार्वजनिकरूपमै भने पनि अहिलेसम्म सरकारले नियुक्त गर्न सकेको छैन । एकपछि अर्को गर्दै गभर्नर छनोट समितिका सदस्यहरुले राजीनामा दिने र नयाँ सदस्य नियुक्तिको क्रम चलिरहेको छ ।
विवादकै कारण राष्ट्र बैंकले एक महिनाभन्दा बढी समयदेखि गभर्नर पाएको छैन । राष्ट्र बैंकको नियमावलीअनुसार बहालवाला गभर्नरले अवकाश पाउने एक महिना अगाडि नै नयाँ गभर्नरको टुंगो लगाउनुपर्नेमा रिक्त रहेकै करिब डेढ महिना भइसकेको छ ।कांग्रेस प्रवक्ता डा. प्रकाशशरण महतले ओली सरकारले सत्ता सहयात्रीलाई सँगै लैजान नखोजेको टिप्पणी गरेका छन् । कांग्रेस कास्की क्षेत्र नम्बर ३ को दोस्रो क्षेत्रीय सम्मेलनलाई सम्बोधन गर्दै महतले पार्टीभित्र असन्तुष्टि रहेको बताएका हुन् । ‘अहिले गठबन्धनको सरकार छ । ओलीजीजस्तो प्रधानमन्त्री हुनुहुन्छ । सबै कुरा हुँदैन । केही त होला नि ! सबै नभए पनि ५० प्रतिशत त हो नि ! अहिलेको गठबन्धनप्रति हाम्रा पनि केही असन्तुष्टिहरू छन् । नभएको होइन, हामीले भनिरहेका छौं,’ सोमबार महतले भने ।
गभर्नर नेपाली कांग्रेसले पाउनुपर्ने उल्लेख गर्दै महतले यसबारेमा एमालेले अरुका पनि कुरा बुझ्नुपर्ने धारणा राखे । ‘हामीले एमाले नेतृत्वलाई पनि भनेका छौं, गठबन्धन भनेको एकअर्काको ‘प्वाइन्ट अफ भ्यु’लाई बुझ्ने हुनुपर्छ । मैले जे सोच्छु, त्यही नै ध्रुवसत्य हो, अरूले मेरो किन विरोध गरिरहेका होलान् भन्ने मानसिकताबाट गठबन्धन बन्दैन । अहिले गभर्नरको कुरा छ । हामीले एउटा प्रोफेसनल मान्छे आओस् भनेका छौं,’ प्रवक्ता महतले भने ।
शनिबारमात्र नेपाली कांग्रेसले आफ्नो संसदीय दलको बैठक राखेको थियो । बैठकमा अधिकांश सांसदले सरकारको कार्यशैलीप्रति असन्तुष्टि जनाएका थिए । पछिल्लो दिन कांग्रेसबाट निर्वाचित सांसदहरुप्रति सरकारले निशाना साँधेको भन्दै कांग्रेस नेताहरुले असन्तुष्टि पोख्दै आएका छन् । कांग्रेस प्रवक्ता महतले मोहनबहादुर बस्नेतलाई सरकारले यसरी नै निशाना साँधेको आरोप लगाए । ‘अहिले मोहनजीको बारेमा पनि मैले बुझ्दा कल बाइपास रोक्ने प्रविधि चाहियो भनेर सिफारिस गर्नुभएको रहेछ । टेरामक्स भनिएको छैन । त्यसमा अब सबै उसैलाई जिम्मा लगाइदिएको छ । यो पनि के भएको हो, यसमा थप बुझ्ने कोसिस गरिरहेको छु, तर आश्चर्यजनक लागिरहेको छ,’ महतले भने ।
-1745656903.jpeg)